試幻想下，如果你出business trip，第二朝起身見到老細條底褲喺你頭頂，請問會有咩感受？
第一次同老細出trip就瀨晒嘢，老細係男人，有老婆，我都係男人，呢個唔係愈男愈愛嘅故事，反而係我人生嘅陰影。
個trip有啲急，因為間廠我跟開，所以老細同我一齊去，佢話大家麻甩佬book間大啲嘅房一齊住，點都抵過book兩間，幫公司慳下錢喎！
我以為冇咩所謂，結果第一晚已經嚇親，我走出房行去走廊斟水，返到嚟老細開門，佢係一絲不掛條條fing咁對住我，個畫面極度震撼又嘔心，我下意識退後一步問：「搞咩？小心畀人見到呀！」
老細：「驚X咩！尾房都冇人經過。」
驚魂未定咁行入房，老細繼續講：「屋企慣咗唔著呀，男人老狗唔通搞你咩！我鍾意女人㗎！」
唔係驚你搞我，但呢度唔係你屋企吖嘛！
心諗兩日一夜短trip就算啦，成晚睇住佢唔著衫行嚟行去已經好眼冤，點知第二朝起身仲驚嚇，擘大眼見到頭頂有條底褲……
我「嘩」咗一聲，全裸喺度執緊行李嘅老細仲理直氣壯咁話：「我㗎！你嗰邊近風口吖嘛，掛住先囉，乾晒㗎喇，乾淨㗎！」
未經歷過嘅人一定會話太誇張，所以我趁佢唔為意影咗張相用嚟投稿。
以後無論乜嘢情況都好，我都唔會再同老細出trip，最多自己另外book間房㗎啫，諗起佢條底褲喺我頭頂真係想作嘔！