失業7個半月嘅我終於搵到工，8：55 返到新公司，合理啦係咪？太早驚負責同事未返，又或者畀對方太大壓力，準時啱啱好又怕你介意，所以返新工第一日早5分鐘應該係標準啦，大家留個好印象。
Receptionist帶我入去所屬部門坐低，同組4個同事果然唔係人人準時，個部門主管自己都係返9：20，打完招呼佢話晏啲同我去人事部，到時要交銀行戶口號碼畀HR同埋搞staff card：「新同事你坐坐先，9：30老細主持例會。」
戇居居齋坐半個鐘，睇住同組新同事食早餐，然後另一個部門有個唔知咩人就繞場一周拍住手講：「Everybody，開會開會！放低啲工作先，開會開會！」
哦，原來唔止我呢條team，而係全公司都要一齊開。
呢間公司係做美容相關行業，外面仲有門市，當然店舖Sales唔喺度，不過目測office都有30人左右，會議室根本就冇咁多位，所以一半以上嘅人係企，我哋條team啲人就正正企喺老細前面。
老細大喝一聲：「各位同事早晨！」
「早晨！！！！」幾廿個同事一齊應早晨，我猝不及防差啲耳膜都穿。
老細：「精唔精神？」
「精神！！！！」又係幾廿個同事一齊高呼。
老細繼續亢奮tone：「話畀我知，你哋今日諗住用乜嘢心態去做嘢？」
「全力以赴！全力以赴！全力以赴！」原來已經有model answer，睇嚟呢種激勵士氣嘅早會係恆常咁舉行，我唔知頭唔知路梗係碌木咁企喺度啦，成班同事答得勁齊，有少少似黑社會準備出發幫大佬做嘢。
老細：「乜嘢話？我聽唔到！」
你撞聾㗎咩！咁大聲都聽唔到？點知老細撞聾，班同事就撞邪，成班人真係用更大嘅分貝再講一次：「全力以赴！全力以赴！全力以赴！」
老細：「準備好未？」
「準備好！XX精神，勤奮過人，服務用心，以客為本，我哋會做足200分！」XX係公司名，我費事開名喇。
然後老細見到我呆咗喺度冇嗌口號，佢就望住我講：「呢位同事……」
我個部門主管出聲幫我解圍：「佢係新人嚟㗎，第一日返工。」
老細聽到之後就行埋嚟搭住我膊頭，其實佢連我叫咩名都未知，不過就一路搭住我一路向會議室裡面成班人講：「好！又有新成員加入我哋公司，大家用熱烈嘅掌聲歡迎佢！」
成班人好似冇靈魂咁拍手起哄。
老細：「等我同大家介紹呢位新成員，你叫咩名？」妖！又話等你同大家介紹，你又要問我咩名！
我：「我叫Louis。」
老細：「聽唔到，大聲啲！」
我：「Louis！」我已經大聲咗。
老細：「再大聲啲！」
騎虎難下嘅我唯有再大聲啲：「Louis！」
老細轉而面向其他人講：「你哋聽唔聽到？」
其他人：「聽唔到！」
嘩！原來呢度班人集體撞聾㗎喎！
我硬住頭皮又一次大嗌自己個名，因為唔習慣咁樣大叫，講Louis咁簡單都走埋音，不過所有人隨即拍手。
老細：「好！Louis，你第一日返工有咩想同大家講，而家大聲講出嚟！」
我：「我……有咩同大家講……自我介紹？」
老細：「你唔使自我介紹，我哋知你個名就夠，你同大家講下有咩工作抱負。」
我：「工作抱負？」其實我嘅工作抱負就係準時收工，希望公司準時出糧，係咁多，真係可以講出嚟咩？
見我沉默咗咁耐，老細拍埋我另一邊膊頭，形成面向我兩隻手都搭住我膊頭嘅姿勢。
老細：「唔使唔好意思，大聲講出嚟！」
喂，真係搞唔掂喎！莫講話小弟冇工作抱負啦，就算有都唔會當住咁多人面前講啦係咪呀？
老細仲未放過我：「初時係會有啲唔好意思，但你一定要鼓起勇氣大聲講出嚟，因為你嘅夢想！你嘅抱負！同時都會成為其他同事嘅推動力！各位同事，我哋再一次用熱烈嘅掌聲幫Louis打氣！」
老細講完之後全場掌聲雷動，我有掃過呢班同事嘅面孔，堅似撞邪，唔係玩膠。
由於我真係講唔出，又唔知可以點，尷尬又尷到極點，所以當時就用咗呢招……
我：「可能呢度多人，焗得滯，我有少少暈，請問有冇白花油？」
我個部門經理終於有啲用，佢問我要唔要出去抖抖氣，老細亦放我一馬，佢話：「出去抖抖先，嗱，聽日唔准暈㗎喇，聽朝個早會要精精神神同大家講下自己嘅工作抱負，記得準備下。」
我：「知道，唔好意思，我出去抖抖氣先。」
一出會議室，我直奔埋去個位度拎起個背囊，兜嘢孭上膊成個動作一氣呵成，頭也不會就衝出大門口走人，撳開門掣嘅時候突然有把聲同我講嘢：「咦，你孭袋去邊呀？」
原來係receptionist，全公司得佢一個唔使開早會。
我：「去屙屎！」
Receptionist：「屙屎孭袋？」
我冇答receptionist，出咗門口之後決定電梯都唔搭，我驚班人散會呀，所以決定行樓梯落去，好在公司喺5樓唔算好高，沿路行去搭巴士嘅時候收到7至8個電話，我一律唔接唔聽，就係咁，失業7個半月嘅我喺搵到新工唔夠一個鐘嘅情況下又再失業，而家要再周圍send CV搵工。
將呢單經歷同朋友講，啲friend問我係咪做Sales？唔係呀，我做editor咋，佢請我返嚟係update公司個網、FB同IG，有時要剪少少片，份糧得$16,000，唔好咁痴線啦好冇？