之前嘅投稿都係讀者分享一啲好完整嘅故事，但其實我發現有唔少人會拋出一啲問題，冇結局嘅，甚至係想大家幫手決定個結局應該點樣做，所以從今日開始會增設一個 #問問問詢問處 系列，刊登出原汁原味嘅問題之餘，我都會畀自己嘅意見，更加希望每個人可以講下自己嘅睇法。
「辦公室日報版主你好，我有個職場問題好困擾，因為會主宰自己嘅去留，同時有急切性要做選擇，首先講下我公司，其實成個2024年都冇試過準時出糧，但又唔會遲好多，有時一日，有時兩三日，拖最耐嗰次都係一個星期之內就會出，所以office已經吹緊話公司好唔掂，有機會執笠。
而啱啱呢一個月，老細就逐個逐個叫我哋入房傾，打聽過每位同事都係講同一堆嘢，就係老細提出一個條件，佢希望我哋未來三個月至半年唔好收人工住，原因係公司嘅流動資金好緊拙，唔夠現金流出糧，但係老細就講明唔會要我哋蝕，如果願意三個月至半年後先一炮過出返啲糧，佢到時會畀返double我哋！
我當時問老細，點解冇一個確實時間？而係講三個月至半年。佢答我係因為控制唔到啲客幾時找數，所以唔想講到個日期咁死，老細仲強調下個月都冇把握準時出糧，而且未必遲幾日咁少，所以先至開出呢個條件，總之等公司過咗呢個難關，到時就會雙倍奉還。
老細開宗明義講埋如果不能接受，就請我哋自行離職，所以呢個唔係提議咁簡單，我係要作出抉擇。
其實有邊個打工仔會接受遲出糧吖？我好啲㗎喇，未結婚，冇小朋友，又唔使供車供樓，不過每個月都有卡數要找，有家用要畀。但令我最猶疑嘅係呢份『雙糧』，目前我嘅月薪係21,000，double即係有成42,000，老細仲話3個月至半年嘅糧都係雙倍找數，咁我咪最少賺多60,000，最多更加有賺120,000囉！
呢樣嘢就係我揸唔定主意嘅原因，多少少耐性就可以賺多啲喎！我甚至計過自己嘅積蓄，慳慳地用絕對應付到3個月至半年冇糧出，家用可以同屋企人傾㗎啫！
有啲同事已經講咗唔接受，有啲就ok咗，另外有幾個仲未決定，包括我（公司大約15人），可唔可以畀啲意見我呀？暫時我都冇其他offer，感謝版主！」
－－－－－
睇完呢位讀者嘅問題，加返條分隔線清晰啲，以下係我個人嘅睇法：
我咁諗，出去問財務公司借錢，無論係銀行定係邦X、安X呢一類財務公司，利息都唔會收你100％咁多，咁你老細點解唔出去借，而係要offer半年後畀double人工大家呢？而家唔係講緊你一個21,000月薪喎！十幾個同事，應該有高有低，可能部分人萬幾蚊，部分人仲高過你，拖你半年之後先double還，呢條數嘅利息點止120,000，照計冇100萬都幾十萬啦！
如果你老細出去搵銀行或者財務公司借嚟出糧畀員工，將來負債嘅比率會大大減少，所以咁慷慨開呢個條件畀班同事，可能性有兩個：1）間公司根本捱唔到半年，爛尾機會大，呢個只係老細嘅拖延策略；2）「自選高息」都唔問銀行唔問財仔，係因為你老細明白出面啲數唔可以拖，但係同事啲數佢就可以拖，甚至係直接走數，唔排除你某年某月某日朝早返到公司已經落咗閘。
一間公司結業，要取消BR，要清空銀行嘅錢同埋取消戶口，背後唔多唔少都需要時間，你到時睇落去係突然結業，而其實你老細可能已經做緊嘢，舉個例，就好似舒適堡單嘢咁，難道個老細喺嗰朝先決定唔開門？肯定唔係啦！
仲有，當你洗濕咗個頭，例如答應咗呢個半年後出雙倍嘅offer，如果中途轉工呢？到時兩個月後或者三個月後你要走，咁double出糧嘅承諾仲兌唔兌現？咁荒謬嘅offer照計唔會同你black and white啦！因為遲出糧本身就係犯法，員工拎住白紙黑字嘅contract已經可以告你，咁你答應完然後中途走又點追？
我嘅意見未必啱晒，大家睇完有咩諗法都可以拎出嚟研究。