本人女，返咗新工幾日之後，畀老細捉埋一邊「傾計」，原來佢見到我隻手有紋身。不如我講下自己個紋身先，喺手腕對上嘅位置，有一個大約5cm左右嘅十字架圖案，其實5cm真係好細。
老細：「點解你有紋身㗎？啱啱整㗎？」
「唔係，不嬲都有。」
老細：「見工睇唔到嘅，你係咪刻意隱瞞？」
「我冇呀，見工著長袖恤衫，而家返工著普通短袖……」
老細：「我唔想其他同事見到，佢哋會覺得係反社會人格，啲後生同事一陣又有樣學樣走去紋。」
當時只係做咗幾日，以為佢會炒我，但老細隨即又話：「聽日開始一係戴錶，一係黐膠布，一係求其紮住繃帶，總之遮住佢啦！」
我同男友傾過呢件事，男友嗌我去平機會告個老細，首先我唔知告唔告得入，其次係佢冇炒我，如果玩到咁大，我亦都冇任何得益，所以最終就日日纏住繃帶做人，因為手腕對上位置戴錶遮唔到。
講真我唔覺一個5cm嘅十字架紋身代表反社會人格，其次同事都有思想，我紋佢又紋咩！好嬲自己咁輕易妥協，因為我太需要份工。