「嗱！你都知阿John唔做啦！我唔打算升嗰班跟開佢嘅人，你出隻招聘廣告先，睇下撈唔撈到啲fit馬返嚟，如果冇好嘢先至搵獵頭公司。」因為我哋有個部門主管級同事遞咗信，而家仲有唔夠一個月就last day，老細終於畀指令我出ad請人喇！
「阿John係叻仔，不過做嘢就獨行獨斷，我唔鍾意咁樣，佢呢啲性格好難夾，喂你淨係條數靚冇用㗎喎！服從性都好緊要㗎嘛！講一句駁十句，而家邊個係老細呀？你唔好再搵呢啲人返嚟，最緊要跑到數又聽聽話話，我要求唔過份吖！或者你有冇識得嘅人介紹？可以嚟見下喎！」老細不斷補充，務求我搵到隻fit馬畀公司。
我：「有！我有個舊同事就係又叻又聽話，而且好捱得，叫佢做乜都冇怨言。」
老細：「係喎！你之前公司都係做啲美容用品同埋保健品，應該有network請到呢啲人，你個舊同事點㗎？形容嚟聽下。」
我：「個舊同事男仔嚟嘅，好肯做，真係睇住佢由咩都唔識捱到專家咁款，我記得舊公司有段時間要不斷去大陸同台灣搵新廠，因為長期出差，好多人都唔肯去，得呢個男仔願意任何時間出差，有時佢直頭會短期駐喺當地，因為要睇生產線，試過幾個月都唔見佢返嚟公司一次，不過真係一句怨言都冇，舊老細叫佢去邊就去邊。」
老細：「正！我就係要呢啲！」
我：「印象中呢個舊同事好誇張㗎！半夜三更又覆email，星期六日同假期都照覆啲客，我哋初頭都懷疑過佢係咪set咗時間掣auto send，不過後來真係見到佢好勤力，所以喺公司短短幾年之嘛，舊老細已經develop咗個新部門畀佢睇，升職快過坐直昇機。」
老細：「Good喎！係咪好自我啲人先，我唔想又請個翻版阿John，到時頂心頂肺。」
我：「我自己就未見過呢位舊同事駁老細嘴喇，咩都say yes㗎佢！」
老細：「聽落就唔錯喇！不過淨係請隻牛返嚟係唔夠，佢做唔做到數先？」
我：「做到，嗰陣時佢仲幫舊公司走去傾萬寧同埋屈臣氏上架，廠嗰邊又傾到啲靚價返嚟，即係對外對內都係佢一腳踢，生產成本減咗，賣出去嘅渠道又多咗，叻仔嚟㗎！」
老細：「好喎！你試下問佢想唔想轉工吖，人工可以傾下。」
我：「要搵搵佢先，好耐冇聯絡，唔知有冇改電話。」
老細：「你打返去舊公司搵佢咪得囉！」
我：「佢冇做好耐㗎喇！」
老細：「吓！點解呀？做得好地地，又開個新department畀佢睇都唔做？」
我：「因為佢後來自立門戶開咗間新公司，又係賣差唔多啲product，造價再靚好多，始終當時係佢出去同人傾，廠又同佢熟，客又同佢熟，講真啲人識佢都唔識我哋老細，呢個舊同事要倒模創業話都冇咁易。」
老細：「所以佢後來冇做呀？唔怪得啦！咁反骨！」
我：「咁舊公司人工少，又要佢一個打十個，又要佢聽話，又要勤力同跑到數，佢咁有料又有晒network，仲使鬼打工咩！不如自己做老闆，就係因為佢開公司之後扯走咗好多生意同埋生產商，搞到我舊老細愈嚟愈唔掂，最終我先至轉工之嘛，咪轉咗嚟呢度囉！」
講完之後，老細陷入咗沉默，過咗十零秒左右啦，老細終於開口講嘢：「得㗎喇，照出ad先啦，呀！一係咁，你估我再約阿John傾下好唔好？佢係自我啲，不過都幾做得嘢，或者我同佢傾下加人工，睇下留唔留得住啦！」
我講舊公司嘅事出嚟唔係想嚇老細呀，其實要搵個又叻又聽話嘅fit馬，仲要任勞任怨兼跑到數，或者真係唔難嘅，香港大把叻人啦，問題係滿足到以上條件，人哋點解唔自己做呢？而一間公司想搵個十全十美員工嘅同時，又有冇衡量你畀啲乜嘢待遇人？