當年見工已經覺得好奇怪，上到間公司清一色全部男性，連in我個HR都係男，見工過程係好正常冇特別，但係當我in完行出房就見到奇怪嘅一幕喇，因為有個阿叔唔著衫行過，短褲同時襯皮鞋，上身露兩點，順理成章望咗眼，嗰陣我以為係啲裝修師父上嚟office做嘢。
後來個男HR打畀我confirm offer，佢喺電話度講：「有樣嘢要同你講咗先，我哋老細就比較奔放嘅。」我識呢個形容詞，不過好少聽人喺現實生活中拎出嚟用囉！所以我都問返個HR：「奔放？點奔放呀？」
HR：「我哋老細有時會打大赤肋喺office周圍行嘅，所以講定你聽先，不過你唔使擔心嘅，佢份人冇乜嘢，千祈唔好覺得係騷擾呀，呢個係佢嘅style，你介唔介意？」
我：「哦，咁我有印象喇，上次見完工有個人行過冇著衫，嗰個就係老細？」
HR：「係呀，咁你係唔介意啦嘛？」
我：「有咩好介意吖！大家都係男人。」
HR：「係呀，你講得啱，做嘢啫，咁係㗎喇喎！下星期一返工！」
雖然男人打大赤肋好正常，我老豆喺屋企淨係著孖煙囪添啦！性感過呢位老細呀……我最初的確係咁諗，加上大家係男人，真係冇乜好介意，不過當我正式返工之後，仍然覺得呢個情景好喪，試幻想下，喺office做做下嘢有個阿叔露兩點行過你面前，嗰種違和感唔係老豆喺屋企唔著衫可以媲美，成件事係幾癲。
同埋HR話老細「有時」打大赤肋周圍行，好明顯係修飾咗喇，因為唔係有時，係日日呀！
撞正我入去做嘅時候係夏天，連續三個月冇見過老細著衫，日日露兩點騰出騰入。
做落全男班又幾輕鬆自在嘅，雖然冇女係dry啲，但原來呢間公司之前都曾經請過女性，對方係一位50幾歲嘅女士，完全唔介意老細露兩點周圍行，而且一做就做咗6年，真係乜都睇慣晒，後來因為仔女唔想佢再操勞先至辭職冇做。
HR後來同我講，由於我係男人，所以約見工嘅時候唔會特別mention老細鍾意唔著衫周圍走呢樣嘢。
我：「咁女求職者呢？電話度問人介唔介意呀？」
HR：「其實老細講過盡量請男仔，雖然佢話盡量，但我識做啦！請個女仔返嚟盞麻煩，所以就好似默許咗淨係見仔。」
我：「咁你又話之前有個女人喺度做？」
HR：「嗰個阿姐係老細啲friend介紹，私底下一早講明，加上佢好豪邁㗎！我估老細就算連褲都唔著，個阿姐都唔會介意。」
我：「不過又真係有啲踩界嘅，辦公室地方打大赤肋露兩點行嚟行去，就算係男都可以告佢性騷擾，而且你哋唔請女人其實算性別歧視。」
HR：「所以我哋出廣告請人係唔會講明，唉，講真吖，好多公司都調返轉淨係請女仔㗎，招聘廣告都唔會講明，收到男性求職者CV咪唔見囉，大把呢啲公司啦！每度都有啲不成文規定，咪又係得裡面做嘅人先會知。」
有冇人睇到呢度會覺得係BL劇情？唔使幻想喇，老細除咗係一個阿叔之外，身型更加係不修邊幅，嗰對「肥仔波」震下震下係唔會令你有任何非份之想，忍到笑都好犀利，真係唔好代入咩BL辦公室情節。
你以為對住自己人先至咁「奔放」？有次要開個zoom meeting，老細又係唔著衫露兩點行入會議室，有同事好聲好氣提佢：「許生，著返件衫先好喎，一陣同個客zoom傾嘢，開鏡頭㗎！」
老細：「Diu！對面阿Ben未見過咩？佢上次嚟我哋公司都見過我唔著衫啦！」睇嚟老細真係好堅持要露兩點……
開咗鏡頭之後，對面嗰位阿Ben尷尷尬尬咁叫我老細著返件衫，原來轉頭佢哋有女同事都會參與呢次zoom meeting，結果老細先至死死地氣著返件衫，仲要係白色小背心咋，依然係扯晒lin旗同埋凸晒點，我見人哋公司個女同事都不敢直視鏡頭。
咁冬天點呀？冬天就好啲，老細都會著返件白背心或者白tee，不過都係好緊身好透嗰隻，對肥仔波一樣咁搶鏡，佢話自己係「熱底」喎！成日笑啲同事著羽絨，喂！你熱底啫，我哋正常人嚟㗎！
我有返去同老豆講呢單嘢，可能佢係同路人，句句都撐我老細：「大驚小怪，咁你公司冇女仔怕咩啫？地盤佬同裝修佬都係唔著衫做嘢啦！好多街外人行過都見到㗎！唔通又告佢喇喎！唔著上身啫，唔係露械吖嘛！」
老豆又唔係冇道理，不過我公司始終係文職office，你置身其中就會覺得怪啲囉，再強調一次，老細真係唔著上身，金利來皮帶加一條短褲，黑色短襪（仲要少少絲質），然後襯返工皮鞋，好有個人風格，唔係咁簡單㗎！
男仔喺度做照計唔介意，想問下如果女仔遇到呢種老細，係咪絕對唔會考慮入嚟做呢？