
「你公司請唔請人啫?乜嘢position都得㗎,斟茶遞水冇問題喎!冇同事走㗎咩?有冇考慮擴充請多啲人?幫幫手啦!」細妹呢5年不斷重複以上嘅要求,最初每個月講兩三次,後來就幾個月講一次,而我嘅答案都係:「都冇人走,請咩人呀?有就即刻通知你啦,但好多同事啲friend都排緊。」
5年前,因為我部門有同事放產假,需要一個臨時工頂幾個月,因利乘便我叫咗當時待業嘅細妹嚟做,反正係普通文職,唔需要咩經驗同特別技能,識用excel就得㗎喇,結果細妹返咗幾個月之後唔捨得走,後來佢雖然有做其他工作,但keep住時不時問我公司有冇空缺。
我公司唔大,連埋老細得24個人,24好似唔係幾好意頭,唔知係咪因為咁,生意做極唔大,永遠停留喺一個規模,但因為有一班熟客關照,每一季嘅單都好穩定,所以公司亦從來冇咩低潮,包括疫情嗰段期間,咩擴充咩上市就唔使諗㗎喇,不過裁員減薪都冇我哋份,每年仲有少少人工加。
我喺呢間公司做咗7年,呢7年我未見過任何同事辭職,係零流失率,誇唔誇張?我7年都冇開過一個會,其他部門都唔使開會,老細一個星期只有一至兩日返office,仲要半日就走,但佢會定期同我哋食lunch,大時大節會係咁易食餐勁,而除咗工作上必要嘅指令,老細係從來唔會同我哋傾公事,食飯坐埋一齊只會傾閒計同講笑。
我結婚請婚假,佢畀咗8000蚊人情我(冇請佢去飲),聽講有另外幾位同事結婚佢都係畀呢個銀碼。
同事生仔,老細會買兩大袋BB衫送畀個員工,雖然taste好差,以致啲款有啲難搞,但老細的確係自掏腰包送出嚟。
同事屋企有白事,老細私下畀咗5位數做帛金,迫人放10日假收拾心情。
除咗辦公時間以內出去食lunch,仲有一年一次嘅Annual Dinner同春茗之外,公司係完全冇任何Gathering,不如簡單啲講,呢間公司啲人同呢個老細係唔會打擾你私人時間,試過有客戶星期五晚WhatsApp我問嘢,冇辦法之下我要請示老細,但老細唔應機,直至星期一返到公司先覆我,而明明weekend我見到佢個WhatsApp有顯示「在線上」。
不過咁,好似啲中秋同端午雖然冇公司飯局,但老細會訂足月餅劵同埋糭劵畀同事,以前佢買現成㗎,後來有人話放工由公司拎返屋企唔方便,後期就轉咗買劵,等啲同事自己去就近嘅分店換領。
其實成班同事都有種感覺,就係覺得老細刻意避我哋,平時一過6pm同埋假期都唔會覆msg,meeting又唔開,返office半日就走,想同佢講下嘢或者問下工作意見都冇機會,唔知真係以為佢有社恐。
最誇張係我哋試過3年冇見老細,因為當中有兩年係疫情,所以嗰兩年亦冇搞Annual Dinner,第三年佢只係出錢,個人就冇出席,呢條友已經好少返公司,嗰3年仲要影都冇……
老細唔返公司點樣簽文件?我哋一般嘅單都可以由Manager簽,加埋公司印就可以,如果必須要老細簽,佢就一早整好個「退地」嘅簽名檔,由同事以Adobe嗰啲Fill & Sign「貼」上去,假設一定要親筆簽名,例如報稅文件,同事會成疊寄去佢屋企,究竟呢個老細神隱3年做咩呢?
公司班同事好自律,老細長期見首不見尾,大家仍然會憑良心打卡,咩叫憑良心打卡?就用我同事做例子,佢早排同奶奶反咗面,而家個仔放學冇人接,所以呢位同事就自行推前返工時間,7點半返公司,4點半放工,童叟無欺。
又會有同事晏咗返工……好似我咁,唔知醒遲起身,11點到office,咁我就8點先收工,除咗個老細之外,呢度所有人都好自律,真係憑良心打卡。
所謂打卡,其實係門口「Do」卡,我哋要「Do」staff card先入到office,個系統會自動紀錄埋In and Out時間,但負責嘅同事話老細根本唔care,從來唔會問佢拎record睇。
我承認呢度嘅同事都係「貪圖安逸」,我做咗7年,咁耐都冇見過人走,不過之前老細3年唔返公司,我哋懷疑過佢仲認唔認得啲人,條友最近放風話想同老婆試下旅居……旅居喎!咁肯定又會成年見唔到個老細,明白佢疑似社恐同埋唔鍾意office hour以外覆msg,但係有時啲嘢好急要知答案,其實都想佢答一句。
喺呢種管理方式之下返工,好講求互相尊重同埋自律,如果有人持熟賣熟做啲好過份嘅嘢,例如遲到早退唔交帶,或者食lunch食幾個鐘先返,咁可能成件事就會玩爛咗,好在個個同事都識做,享受呢份自由度,亦珍惜呢份自由度。
我細妹當年嚟做臨時工覺得好free同埋冇壓力,所以keep住問會唔會請full time,真係sorry,呢間公司同呢度啲人都係不思進取,短期內照計唔會有人走,亦唔慌會擴充,而家個老細仲打算旅居,希望佢返嚟仲認到班同事啦!