我細佬早排好似等錢使，放咗工走去7仔做兼職，其實佢嘅性格不嬲都好宅，淨係鍾意留喺屋企打機，所以對於佢突然咁勤奮搵part-time真係好意外，問過佢係咪有嘢想買或者識咗女朋友，但細佬話冇，跟住就不願多談，本來一個24歲嘅小朋友努力賺錢係冇問題，奇就奇在佢私下問阿媽可唔可以減一半家用。
呢單嘢都係阿媽走嚟問我先至知，所以件事就有啲唔合邏輯喇，唔係介意細佬畀少咗家用，事實上佢唔畀都冇問題，屋企唔係等住呢筆錢開飯，我哋作為家人只係擔心，因為錢你就賺多咗，點解反而仲窮過之前呢？後來我呢個做家姐嘅幫全家做醜人，打爛沙盤問到篤終於知道答案。
唔識寫嘢，加上希望原汁原味講出嚟，以下對話直接交代。
我：「搞咩返7仔呀你？份糧唔夠使咩？有嘢唔怕講喎！」
「爭緊老闆錢呀，想快啲清晒條數，你唔好同阿爸阿媽講，費事佢哋問長問短。」
我：「無端端點解會爭老闆錢？」
「有次我喺pantry唔小心撞跌咗老闆支酒，好貴，而家分期還緊條數畀佢。」
我：「分期咁嚴重呀？好貴㗎？」
「日本酒，佢話嗰支係山崎唔知幾多年，成200萬！」
初時聽到我真係嚇一跳，200萬？畀首期都得喎！我又唔識酒呢！
我：「飲咗識飛㗎？點都好，冇可能叫個員工賠200萬喎！你係咪畀人屈呀？」
「200萬Yen，唔係港紙，但老闆話佢係日圓7算嘅時候買，所以支酒值成十幾萬港紙，我都賠唔起，所以要分期每個月還。」
雖然知道係200萬Yen之後，我個心的確係定咗，但仍然充滿疑問，第一；整爛人哋嘢要負責係理解嘅，不過老闆擺喺咩位置先？真係我細佬一個人嘅責任？第二；200萬Yen又好，十幾萬港紙又好，有冇收據證明？舉個例，有人整爛我手袋，然後我話個袋係高價買返嚟，叫你賠個炒價，咁係咪合理先？
本身都係想了解下呢啲問題，但聽到細佬話，老闆要佢每個月畀cash找數，咁我就覺得唔對路喇，真係冇屈水成份？你話我小人之心都好啦！可能因為勞工法例問題，你唔可以直接喺份糧裡面扣，不過叫細佬私底下找現金，而且還錢冇收據，支酒係咪值咁多又冇人知，好冇保障啫！
連續幾日思前想後，我決定打去細佬公司問清楚，如果係我理虧最多講對唔住囉，但若然成件事好唔合理，呢份工真係唔做都罷。
我知細佬做咩公司，上網check到總機number再打去，向聽電話嘅人道明來意，我話睇下可唔可以一次過幫細佬還晒條數，最終獲轉駁畀個老闆聽。
呢位所謂老闆最初好好態度，可能以為我肯孭條數，不過我堅持要知道呢支酒嘅詳細資料，又要求睇購買收據，咁你唔係買緊20蚊嘢喎，既然話支酒值200萬Yen，網上bid又好買實物又好，唔會一啲record都冇啩！
見我問長問短，佢老闆嘅態度即刻180度轉變：「話咗係200萬就200萬啦！而家係你細佬打爛我支酒在先，已經畀佢分期喇喎，仲想賴皮呀？」
我：「唔係賴皮，200萬Yen對一個小朋友嚟講唔係細數目，你知唔知佢放工去做兼職還錢畀你呀？我作為家姐想知清楚都唔係好過份啫！」
呢個老闆繼續扯晒火好晦氣：「咁你仲想知啲咩？當年買酒嘅單我就冇㗎喇，一係寫張借據畀你，列清楚你細佬仲爭幾多先還晒！」
我：「你連支酒嘅基本資料都畀唔到，仲要我寫借據？係咪應該你寫張詳細內容畀我呢？我細佬好似連自己賠緊咩都唔清楚喎！唔係話唔賠，但呢啲錢銀嘢均真啲唔係仲好咩？之後有咩爭拗對大家都唔好吖！」
嗰次喺電話「攤牌」可以話不歡而散，收咗線冇幾耐我就收到細佬call，細佬叫我唔好咁多事，因為打畀老闆令佢好難做，搞到佢畀人嗌咗入房鬧……
我覺得如果有理據同埋正路，你點解唔拎多啲資料出嚟呢？淨係識得一味發惡，我覺得有啲唔妥，再重申一次，整爛人哋啲嘢賠錢好合理，但你起碼畀人知道賠緊咩？賠錢畀你嘅人都需要受到保障，呢一點我十分堅持。
夜晚返到屋企，細佬話老闆send咗WhatsApp畀佢，裡面係一張相，話細佬就係撞跌呢支酒。
我將幅相forward畀個朋友睇，朋友話相中嘅山崎係一支機場免稅店買到嘅日本酒，約值一千幾百，絕對唔會值200萬Yen，係咪畀錯相呀？
細佬話佢有印象係打爛呢支，我更加嬲！第二日再打去理論，佢老闆話嗰張相只係類似「示意圖」，支酒係有年份喎！
我相信你要搵張有年份嘅山崎日本酒相片話都冇咁易，呢個世界有google，但佢老闆講嘅嘢就係冇根冇據，首先話打爛嗰支「應該」係12年，應該？200萬Yen你唔肯定係幾多年？我一路同佢講電話一路search，12年呀？正路係3萬幾Yen咋喎！
我：「不如簡單啲，我賠返兩支山崎12年畀你。」
「呀！唔係！我記得係廿幾年先啱！」
12年變廿幾年，你不如話100年啦！
我：「唔好蝦細路仔啦！佢都係得萬幾蚊人工，你每個月叫佢出糧後撳返幾千蚊畀你，半份糧冇晒，你搵到單嘅，我照價賠返畀你又得，買過支新嘅都得，但我唔可以不明不白。以我理解，我細佬萬幾蚊一個月，年薪都係十幾萬，你叫緊佢賠個年薪畀你，成年同你白做，你好唔好意思呀？」
「得啦咁！唔使再講落去！」
我：「咁即係點呀？心平氣和同你傾啫！」
「得㗎喇！你都係想唔賠啫！」
我：「你咁嘅態度好難傾喎！我都解決個問題，賠錢都要有盡頭啩！唔係唔賠……」未講完，佢老闆cut我線，如果係我私人事一定再打返去，但而家係細佬嘅事，我亦唔能夠嘈得咁過份。
同一晚，細佬返嚟話老闆叫佢唔使再賠，當然面口係好難睇啦！佢話老闆單單打打好晦氣喎！我幾驚細佬會為咗啖氣，又或者覺得唔好意思而決定繼續賠，好在佢冇，仲即刻辭埋份7仔，細佬話每個月還8000真係好辛苦，而家終於斷尾。
咪住先！每個月還8000？問多兩句，細佬原來連續賠咗5個月，8000 x 5個月＝4萬蚊，嘩！咩都還晒啦！而家連支酒係機場免稅店版定係12年都唔知，一時一樣仲話廿幾年，呢啲去報警又唔係，去勞工處又唔係，真係唔知搵咩人幫忙。
雖然係解決咗，但聽到細佬連月嚟節衣縮食搵part time，仲要飽受咁大財政壓力，我真係覺得好心痛，勸咗細佬搵過另一份工，因為呢個老闆擺明心地唔好，細佬話會邊做邊搵，希望搵到新工先走，希望佢而家喺公司嘅日子唔會太難捱啦！
我都想借呢個機會問下，有冇人覺得我係錯呢？其實我唔係想令到細佬咁難堪，但無啦啦要還咁大筆錢，真係唔可以糊裡糊塗，我要單據都唔係好過份啫，佢老闆過份好多啩！