「第一日返工？返咩工？邊個請你㗎？」當我聽到呢幾句說話嘅時候真係O晒嘴，其實走入新公司之前已經覺得奇怪，間公司名唔同咗嘅？Reception前面張二人梳化又冇得坐，唔知搞咩畀人用保鮮紙圍晒咁綑住，好似即將要搬走咁。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
我：「之前我嚟見Stella，佢請我㗎，個position係E-Commerce Executive……」
Receptionist係一個年紀都幾大嘅女人，唔係想話佢老，只係之前嚟過兩次interview，Receptionist明明係一個後生靚女，忽然又轉咗人？
呢位Receptionist隨即用佢枱頭部電話打內線唔知搵邊個，過咗陣就有個女人行出嚟，又問我差唔多嘅問題：「Hello，有人叫你返工？可唔可以講多次係咩position？full-time呀？」
然後我又答多一次。
呢個女人帶咗我入office，裡面嘅環境我當時分唔清係剛剛搬嚟，定係準備要搬走，有啲紙皮箱就疊到好高，部分辦公室傢私又係被保鮮紙圍住綑起。
雖然之前只係嚟過兩次interview，未至於認得啲新同事，但係都覺得好多人轉晒，因為本來女多男少，而家變成男多女少，而且所有人嘅年齡都好似大咗好多，所以一眼望落去已經明顯唔同晒。
我被安排先坐喺會議室等，過咗陣個女人再同HR一齊入嚟，終於有個人我係上次見過喇，就係個HR呀！
「係呀，你上一手請㗎！同你提過啦，仲有email你。」
「但係我部門已經夠人喇喎！」
「你嗰度唔係仲有兩個吉位咩？」
「吉位係有，但係工作分配好晒吖嘛！」
「咁都冇辦法，冇理由叫人走，何況我通知咗你今日有新人。」
「好似有印象，我又唔係叫佢走，有冇其他department要人？一係轉部門。」
「好複雜喎，佢E-Commerce得你department啱，唔通轉去會計呀？」
Hello！點樣㗎？扯貓尾呀？你兩個傾好先入嚟吖嘛！
後來個女人出返去先，淨低個HR同我傾。
HR：「冇問題㗎，我之前同佢講咗會有新同事返工，係佢自己唔記得。」
我：「但佢好似未準備好……」
HR：「冇問題㗎喇，我email一早通知咗佢。」
喂！點樣冇問題呀？究竟發生過甚麼事？溝通好似好大問題喎！
我：「點解公司好似唔同晒嘅？我見門口個名同牌都唔同咗。」
HR：「我哋易咗手，即係轉咗老闆，咁有好多同事都走咗，走咗三分二啦！跟住新老闆帶咗好多佢嘅人過嚟，公司名雖然改咗，但業務一樣，大同小異，你唔使擔心。」
好難唔擔心喎！
我：「咁我上次見嗰位Stella都走埋？」
HR：「走咗喇，頭先嗰位叫Giselle，佢就係代Stella，係你直屬上司。」
原來如此，好彩仲有個HR認得我咋，當時心知不妙，間公司好似立立亂咁，但我真係辭咗份工兼一個月通知咁樣過嚟，如果唔做會損失好大，唔通再出去搵過第二份？唔知搵幾耐㗎喎，既然HR話只係人變咗，公司業務不變，硬住頭皮都要做住先啦！
做落之後發現，嗰位叫Giselle嘅直屬上司都冇乜嘢，亦feel唔到新同事排斥我，但我仍然會keep住搵工，有機會就走囉，氣氛雖然冇問題，但工作內容就有啲問題，Giselle帶嚟嘅人當中，已經有幾個係E-Commerce，由junior到senior都有，所以我被迫要處理好多唔關事嘅工作，job duty轉晒，繼續做落去對自己嘅career path有好大影響。
雖然好感激個HR認得我，令我不致於第一日返工冇人知發生咩事，甚至無啦啦冇咗份新工，但個人認為間公司易手咁大變化，人都走咗三分二，連當初請我嘅部門主管都走埋，HR應該係咁易打嚟講聲，雖然我知佢當時肯定好忙，但你公司名都轉埋喎，業務一樣啫，公司background都唔同啦，同埋啲CV可以唔同公司「溝埋」咁樣用咩？
我都係繼續搵工先，費事年尾仲難搵。（完）
情迷下屬親大佬 女上司隨時變阿嫂
https://youtu.be/nWfN74b93a0