去隔籬部門搵人跟少少嘢，發現佢哋成個department吉晒，不過仲有一個女同事坐喺度：「想問下Alex有冇返呀？」
同事：「有呀，佢哋去晒開會。」
差啲衝口而出講「咁你唔使開嘅？」不過我都係無謂多事，因為同類型情況好似見過幾次，唔止開會冇叫佢，平時食lunch或者放工gathering，佢哋成team人出去都係冇嗌呢位女同事，就好似唔相識咁。
印象最深刻有一次公司請食飯，酒樓book幾圍嗰隻，呢個部門明明得6個人，都坐唔爆一張枱，但係佢阿姐都叫咗我個department埋去坐，踢咗呢位女同事去第二張枱同其他department坐。
平時行過見到佢哋成個部門有講有笑吹水，呢位女同事都係冇參與（定唔知被排斥），佢淨係做自己嘢。
咁我年資尚淺，雖然冇直接問，但都有向其他人打聽下點解會咁。
「哦，好似話唔鍾意呢個女同事。」
我：「但我見佢平時冇乜嘢㗎喎！」
「唉，你點知啫，同其他部門相處冇嘢，可能係工作上冇衝突呢！據我所知，佢哋department自己有個WhatsApp group，都係冇呢個女仔喺入面。」
我：「算唔算冷暴力呢？」
「梗係算啦！之前公司派月餅劵，佢阿姐同Admin攞嘅時候特登攞少一張，淨係唔派畀佢，最後佢要自己行去Admin度拎。」
我：「都幾仆街喎！」
「不過佢部門6個人都唔鍾意佢，應該係有啲嘢嘅。」
或者係啦，只係我有時會諗，開會唔預佢、食晏gathering唔嗌佢、WhatsApp group唔add佢，就連月餅劵都唔派畀佢，點解呢位女同事仲要繼續喺度做呢？