幾年前有個叫Avery嘅男同事追我，其實佢係隔籬部門，大家已經共事咗差唔多一年，平時喺工作上又唔算經常接觸同溝通，我都唔明佢點解會無端端對我有興趣，最慘係嚴重影響我嘅工作同形象。
惡夢係由一次放工開始，Avery喺公司樓下拎住紮花等我，留意返，我同佢係同事，本來就喺同一個地方做嘢，唔明佢點解要走落樓拎住紮花等，係唔想其他同事見到？但我放工落樓都有幾個同事一齊喎，咪一樣有人見到。
Avery：「送畀你㗎Vani！」
因為太過九唔搭八，之前又冇跡象佢想追我，所以第一下真係覺得條友玩嘢。
「無啦啦送咩花畀我？」最乞人憎係幾個同我一齊落樓嘅同事見到隨即起哄，係咁「嘩！嘩！嘩！」嘩乜嘢啫！
Avery：「唔係無啦啦㗎！我想約你食飯。」
一來太尷尬，二來我對佢完全冇興趣，所以就避開佢同紮花，講咗句「咪玩啦！」跟住就離開。
辦公室傳播消息嘅速度仲快過病毒，當晚我已經收到幾個當時不在場嘅同事WhatsApp，內容不外乎係問我幾時同咗Avery一齊？點解收得咁埋？我哋開始咗幾耐？
然後第二日返到office仲未完，Avery又拎住個包晒花紙嘅盒過嚟畀我，我唔肯收，晏晝佢又搵其他同事轉交，其實佢搞到咁高調，好快已經全公司知道晒，再之後嘅日子，Avery仲係三日唔埋兩日就行過嚟擺低啲嘢喺我枱面，有時係零食，有時係花，有時係小擺設，有時係外賣咖啡奶茶。
其實最困擾係麻煩到其他同事，因為Avery知我一定拒收，佢經常會叫人代送畀我，連pantry lady個嬸嬸都幫佢做過「送貨」，而由於唔係個個同事都知道我對佢冇興趣，亦唔清楚我同Avery之間係冇任何曖昧，所以我成日聽到以下說話：
「Avery幾好仔吖，咪對人咁冷淡啦！」
「做咩呀？你哋鬧交呀？點解佢唔親自畀你嘅？」
「好心你咪咁絕情啦，睇得出Avery好鍾意你，其實佢幾專一㗎喎！」
因為Avery會私下WhatsApp甚至喺office hour以外打畀我，所以我已經多次用message同埋親口講得好清楚，冇興趣就冇興趣，冇機會就冇機會，我絕對唔希望大家唔清唔楚，始終同一間公司做嘢，無謂搞到咁難為情啦！
但再發展到後來，office就開始有人話我收兵，或者係當Avery係兵，有啲說話仲要好難聽，點解要咁呀？我冇收兵，我先至係受害者，拒絕一個自己唔鍾意嘅人都有問題？
「Morning！知唔知醒呀？要唔要買早餐畀你？」
「你瞓未呀？唔好咁夜瞓呀，對皮膚唔好，希望你發個好夢，今晚同你夢中見，早唞！」
以上係其中兩次Avery send嚟嘅WhatsApp，我唔知大家有冇遇過唔鍾意嘅人死纏爛打，如果你對嗰個人冇興趣，其實收到呢啲咁嘅message係好嘔心㗎！嗰種嘔心程度仲要好難啟齒，試想像我同旁邊個同事分享Avery留言話「夢中見」，我諗換轉係你都會笑咗先。
一直基於大家係同事，所以我冇block Avery，不過有次真係忍無可忍，條友個留言係咁：「做咩成日唔覆我msg呀？我淨係想你開心，不如我買個名牌銀包畀你吖，我見你嗰個銀包都好舊喇，只要你鍾意，我捱餓都會買畀你！」
首先，我覺得Avery嘅行為唔係想我開心，佢係想自己開心，其次，亦係最重要嘅一個point，就係我自己有錢，我要咩可以自己買，唔需要你捱餓送咩名牌畀我，我亦從來冇收過佢任何禮物，花又好、擺設又好、零食又好，咖啡奶茶都好，通通我都係掉咗佢或者畀其他同事，因為Avery唔肯收返，我亦唔想同佢喺office有多餘嘅糾纏，無謂惹來更多是非。
Block咗Avery之後，佢就開始賣慘，喺佢自己Facebook同IG講埋啲咩「 好難過！」「飲酒飲到入咗醫院…」「鍾意嘅人對我好冷漠…」「我淨係鍾意Vani一個，我究竟做錯啲咩？」
因為部分同事有Avery嘅Facebook同IG，所以我成日會收到啲截圖，其實我唔想睇亦冇興趣知，但見到截圖裡面仲有Avery出面朋友嘅留言，有人話「呢啲女仔唔使恨」、「蛇蠍心腸」、「而家啲女淨係睇錢」……我睇到就覺得自己好無辜，跟住就嗌其他同事唔好再send呢啲截圖畀我。
今日投呢段稿，係因為嗰個Avery今年年初已經轉工走咗，心態上我當然鬆一口氣，但你知唔知直至而家6月份，公司仍然有人喺講起我嗰陣會話：「呢……嗰個女仔呢，之前當Avery係兵嗰個呀！」
其實我都曾經暗戀人，但絕對唔會做呢種騷擾行為，更加唔會將唔關事嘅人綑綁埋一齊，試圖製造群眾壓力或者情緒勒索。
希望第日啲同事講起我嘅時候，唔會再用「之前當Avery係兵嗰個」、「玩Avery嗰個」、「Avery好鍾意嗰個」，我就係我，我有名㗎！
不過Avery呢件事都教識咗我要換位思考，令我知道原來糾纏一個唔鍾意自己嘅人係好煩，好乞人憎，有啲嘢見好就收，知道衰咗就唔該走啦，鍾意一個人無罪，唔鍾意一個人都冇罪㗎！