成日都聽到有女性遭遇職場性騷擾，其實男性都有㗎！而且更加難啟齒，我估呢篇投稿畀人第一個反應肯定係：「嘩，男人畀人性騷擾咁犀利呀？你一定好靚仔，一係就好大隻。」就係因為有呢啲質疑，令到講出嚟嗰陣都唔好意思，我唔靚仔亦唔大隻，但真係遇到吖嘛！
我間公司女多男少，比例係20女5男，不過唔使太多幻想，20女全部清一色好大年紀，好喇，講到呢度，又會有人話：「妖！即係如果畀後生靚女性騷擾就冇所謂啦！」呢句說話正正由我個friend口中講出嚟，我都係描述返真實情況啫，唔係話年紀大就當性騷擾，後生女就會enjoy啲。
第一次遇到呢種情況係啱啱入嚟做，大約兩個月前，因為有工作要問同事點做，嗰位女同事移咗張凳埋嚟，兩隻腳嘅膝頭哥貼住我隻腳，其實唔使咁貼喎，我後面又有個櫃所以冇得再移後，跟住嗰位女同事仲成隻手摸落我大脾。
其實當時我冇而家咁大反應，因為我係新人，都未摸清間公司係點，嗰次只係覺得呢位女同事好熱情，佢年紀做得我阿媽，可能真係當我仔咁啦！後來日積月累就發覺唔止佢一個係咁，有次我行緊返埋位，有另一位女同事指住我下體講：「咦！做乜漲咗嘅，你見到邊個硬晒呀？」
佢講完之後就有幾個女同事一齊笑，仲要一齊望過嚟，我唔覺得自己當時有任何生理反應，唔明佢點解要咁講，最大問題係佢搞到我好尷尬，呢下先至最唔鍾意。
呢度啲女同事講嘢同埋教你做嘢嘅時候仲好鍾意摸手摸腳，一係就打你隻手臂，講真都幾難頂，有個比較senior嘅女人直情摸我塊面，唔係掂喎，係用手背掃我塊面，佢問我用開邊款鬚刨剃鬚可以剃到咁光滑，話要買返個畀老公喎！咁你玩又好，真心想介紹又好，問咪問囉，又有老公喇，係咪需要咁樣用手掃我塊面呢？大家仲要唔熟，我做得兩個月，同事感情有冇去到呢個地步同程度呀！
如果同一種情況係男女角色互調，即係一班男同事（仲要上咗年紀）向住一個新入職女同事做，我估已經告咗十世，但係當我同男仔friend講，佢哋就會話：「正喎！痴女樂園！你睇下邊個有錢吖嘛，正所謂姨姨我不想努力了，隨時有人養㗎！得閒打場友誼波都好吖，當驅風囉！可能啲老公唔搞佢哋，平時好苦悶呢！」
男人之間講嘢就係咁，好難expect有個男性朋友會聽你吐苦水，或者幫你分析件事，因為佢哋把口仲賤，明嘅，可能有其他男仔同我講呢啲，我都會有一樣嘅反應。
同女仔friend講會唔會好啲？會嘅，佢會對你表達關心，但係都忍唔住問：「你咁有魅力咩？唔覺喎！我公司有個靚仔成個model咁，都冇女同事咁樣摸佢啦，係咪你自己太敏感咋！」
其實我講完都唔好意思，因為向人表達自己被女人性騷擾，潛台詞好似讚緊自己好靚仔好有market咁，我唔係想表達呢樣嘢，甚至覺得其他男仔只要正正常常五官端正，入到我呢間公司都會有相同對待，只係我咁啱喺度做嘢，我知自己出到去其他公司可能唔會有人望一眼添！所以有時發生唔同嘅情況，可能係環境唔同，所以遭遇就有唔同，唔係我特別出眾。
同friend講就個個一笑置之，咁同屋企人講呢？有次阿媽拎湯入房畀我，問我做緊乜，當時我睇緊JobsDB搵工，咪照直答囉，然後阿媽就問：「你咪返緊新工囉，搵咩工呀？」跟住我講咗公司每日嘅遭遇畀佢聽，阿媽竟然話：「摸兩下有咩蝕底呀？又唔係強姦你，好心你咪咁保守啦！人哋女人都唔覺得蝕底，你男人嚟㗎！大方啲！可能係親切啫！唔通你想啲同事木口木面冷冰冰唔理你咩！」
今日喺office，又有個女同事等電梯時大大聲向我講：「嘩！你籮柚都幾實淨咁喎！係咪平時有做運動呀？最鍾意籮柚實嘅男人。」佢講完，幾個等緊電梯嘅女同事又哈哈笑，係咁傾男人屁股點先為之靚，好難頂呀！
我問過自己，如果全部係後生靚女嘅同事，我心理上會唔會好受啲，甚至調返轉覺得好開心，答案係「可能會啦！」不過而家唔係講緊可能吖嘛！我都質疑過係咪自己諗得太複雜，可能間公司個culture係咁，我就小題大做太敏感。
曾經諗過問其他4位男同事有冇遇過呢種情況，但真係好難開口，我又新，唔通走去問人：「女同事有冇睇你下體同埋摸你塊面呀？」
同埋次次都令到我咁尷尬同埋咁難落台，某程度上又係咪一種職場欺凌呢？唉，我仲考慮緊好唔好轉工，但已經年尾，好想聽下大家意見，同埋有冇咩方法應對。（完）