「而家有冇時間？有個求職者強力推薦畀你，本來可以約佢second in嘅，但如果你得閒咪即刻見埋囉！頭先同佢傾咗好耐呀，呢個人你一定要見下！」HR妹妹係咁sell我見一位求職者，真係好少咁落力，而最奇怪嘅係，HR妹妹兩眼通紅，咩料呀？失戀喊完嚟呀？
因為半個鐘後有zoom meeting要開，我都費事問HR妹妹太多，係咪見呀？嗱嗱臨啦！連隨跟咗佢去會議室，個求職者係一個20幾歲嘅男仔，我叫佢係咁易介紹下自己，約莫講咗幾句之後佢就話：「因為我婆婆過咗身，佢嘅遺願係想我快啲搵到工，希望你會考慮我。」
雖然我只有唔夠30分鐘去做呢個interview，不過喺咁短嘅時間裡面，我已經重複聽咗個求職者講十次八次關於佢婆婆過身嘅事，因為HR妹妹都有份sit in坐隔籬，仲要一路聽一路抹眼淚，我開始唔係幾受得住成個氣氛，更重要嘅係，我覺得interview過程離晒題。
無論我問乜嘢都好，眼前呢位求職者都會將件事扯到去過咗身嘅婆婆身上，而無論個求職者講咩都好，只要牽涉到佢過咗身嘅婆婆，HR妹妹就會好感動，喊喊下又擤鼻涕，搞到會議室係咁出現「匙呢蛇哩」嘅聲，嘈到我覺得有啲煩。
「婆婆嘅遺願係見到我著西裝返中環，老人家有時諗嘢好簡單，覺得個孫咁樣就係叻，雖然我以前都做文職，但係份工唔使著西裝。」
我：「不過呢度唔係中環，呢度係灣仔。」
「都係一樣啦！婆婆佢覺得返工過海好似事業有成咁，最遺憾係佢生前嘅時候，我做唔到畀佢睇，但我知道婆婆而家就算喺個天度，一樣會見到我生性。」
求職者一講完，HR妹妹又抹眼淚同埋擤鼻涕，喂，咁樣落去真係令人吃不消喎！
「之前我冇一份工做得長，但係婆婆臨走之前捉住我隻手講，叫我唔好再成日轉工，佢覺得我生生性性一定會有成就，我答應過點都要做畀佢睇，我有預感只要把握到今次見工機會，呢個就係我嘅新起點，婆婆在天之靈一定會保佑我。」
結果我用咗20分鐘就見完，因為再in落去都冇意思，HR妹妹後來直情「吩咐」我一定要請呢個求職者，等佢圓咗婆婆嘅心願，而我就回應返一句：「呢個唔適合，你啱啱出job ad之嘛，in多幾個先啦！前前後後我都係in咗兩個啫！」
HR妹妹：「點解唔請佢呀？」
我反問：「點解一定要請佢？」
HR妹妹：「你唔覺得佢好慘㗎咩！佢應承咗婆婆，佢一定好想返呢份工㗎！」
其實我知HR妹妹會認定我好冷血，甚至大家睇到呢度都會覺得我冇人性，不過我想講下自己嘅感受，見工就係見工，我唔鍾意咁樣賣慘，如果係適合，無論你發生過咩事我都會請你，如果唔符合要求，咁就算係皇親國戚都唔會請，就係咁簡單。
同埋都想再強調下，我真係唔受賣慘呢一套，無奈嘅係而家呢個社會好受落，呢層我係知。
好耐好耐之前公司都有一個同事係咁，嗰陣我未升做Manager，同嗰位同事係同一team，有次佢突然曠工三日，連埋星期六日，即係total有五日係冇晒消息，我哋department第一時間嘅心態唔係要怪佢，而係擔心佢，好地地一個人點會失蹤㗎？
好在，呢位同事最後都出現返，佢話有個親戚過咗身，所以好唔開心想自己靜下，冇聽電話同埋冇覆我哋係因為心情唔好，唔想同外界接觸，明白！我哋所有同事都好體諒，不過之後維持咗大半年時間，呢位同事都係做嘢好甩碌，而且犯咗唔少大錯，請假嘅頻率仲好密，有時中午12點幾先打返嚟話唔舒服，有時直頭失聯又曠工，第二日返嚟先話瞓到天昏地暗唔知時間。
呢位同事仲有好多鑊留畀我哋孭，基本上就係佢做錯，大家幫手補救同硬食，而且喺office無論大小事都要順佢意，因為只要有咩問題，佢就會搬個親戚過身件事出嚟講，我都唔知關工作咩事？亦唔知成個部門要分擔佢嘅責任直到幾時？
其實每個人生存喺世界上都會經歷生老病死，仲有甜酸苦辣，唔通其他人未面對過親人離開嘅痛楚咩？但係咪一定要下下掛喺嘴邊？某程度上呢種都係情緒勒索，咁係咪要大家挖晒啲傷痕出嚟鬥慘？
講返個求職者，如果至親過身令佢對工作同人生有新目標，咁樣當然係值得安慰啦！但真係需要不斷提起去換取同情分咩？算唔算係消費緊過咗身嘅人？
可能我老派啦，世界已經唔同晒，我知道呢個社會好流行賣慘，有人開舖或者sell嘢會賣慘，其實大把人創業都捱得好辛苦，只係冇出聲；我又見到好多明星開始賣慘，如果真係要咁計，你估嗰啲綠葉資深演員冇捱過咩？人哋有冇賣慘？
呢排咪有個咩何太同何伯好煩膠嘅，佢哋都係賣慘呢招㗎！一開頭何伯就話仔女吞咗佢幾百萬，而家最新就到何太喺度喊苦喊忽，喺我眼中其實都係同出一轍，只係唔同領域嘅人鬥包裝得好，同埋鬥演技，本質上冇分別，只係演繹上有高低。
事實證明生於呢個時代，你唔識賣慘係好蝕底，呢樣係無可否認，因為被情勒嗰班人，係唔知道自己被情勒緊，而正常人如果開聲篤爆仲會畀人鬧。
我覺得無論返工、見工、做明星、開舖，或者要賣嘢，不如堂堂正正用實力較量啦！唔使下下都搬晒老豆老母親戚朋友出嚟，唔使下下爆埋自己嘅私事呀？每個人都有自己嘅難處㗎啦！冇講出嚟嘅人就冇經歷過辛酸同埋慘事？
一個人成功咗先講自己嘅奮鬥經歷，同埋你借助賣慘去達到目的，其實係兩回事嚟㗎！
👇🏻即刻去片 ： 日本同事盲選便利店美食🇯🇵
