好多年前嘅事喇，8年？9年？大約係咁上下。當年我有個下屬叫Alvis，佢因為搵到新工resign，好記得佢係2月辭職，鑑於仲有兩個月就出bonus，我曾經提議佢可唔可以叫新公司等等，因為我知道bonus大概有成個半月至兩個月人工，差少少唔拎埋好可惜。
不過理想同現實係兩回事啦！Alvis間新公司唔等得，佢無可奈何下始終要喺出bonus前離職，而且佢亦好明白事理，畢竟我哋當時張contract真係有講明出bonus前resign就會冇得拎，所以呢位下屬直頭嘈都冇嘈過，權衡輕重同埋前途之下維持原來決定。
其實呢位下屬跟咗我3年，日子話長唔長，話短唔短，不過真係好幫到手，好盡責，而且唔怕蝕底，印象中佢都幫其他同事執過唔少屎。
結果我膽粗粗走去搵老細傾，嘗試照出bonus畀我個下屬。
「Alvis遞完信要坐一個月，即係3月走，我哋4月1都出bonus啦！差少少畀埋佢好唔好？」
老細：「梗係唔得啦！合約講明係咁就咁，佢想要bonus咪4月之後先走囉！」
「我明，但條款係死嘅，人係生嘅。」
老細：「你唔使咁婦人之仁喎，每年4月班友仔拎咗bonus咪又係走，佢哋遞信嗰陣有冇諗過對唔住公司吖！」
「咁又冇話對唔住公司嘅，佢哋收呢份人工係有做嘢，唔好討論呢樣嘢住，Alvis喺度做咗幾年真係好有交帶，畀埋佢啦好冇？」
老細：「佢唔會多謝你㗎！人事部話Alvis都冇意見，你幫佢爭取嚟做咩啫！總之出bonus前走就冇，香港好多公司都係咁㗎啦！」
然後我話唔介意喺自己份bonus裡面拆出嚟，最多令到公司條數冇損失囉！軟硬兼施之下，老細終於答應，仲要唔使喺我度拆，佢淨係話所有人都係出個半月至兩個月bonus，Alvis就出一個月，仁至義盡喎！都好啦！老細咪又係口硬心軟。
隔咗太多年喇，當時Alvis嘅反應已經唔係記得好清楚，印象中佢講咗好多次多謝，跟住佢亦順利轉埋工。勢估唔到嘅係，上個月我收到Alvis電話，佢問我仲喺唔喺度做？
「我呢啲死老嘢去得邊？你哋班後生就真係走晒喇，你試下返嚟公司一轉吖，起碼有3分2人你係未見過，舊人得返幾個仲做緊咋！你呢排點呀？」
Alvis：「咪又係咁，公司都轉咗幾次，頭先打嚟之前都驚你改咗電話，講返正經嘢先，有張單睇下你有冇興趣接？」
士別三日，Alvis已經由散仔做到management level，睇嚟魚唔過塘唔肥係真，得悉佢今時今日撈得唔錯，我係有少少後悔以前唔試下轉工，而家就太遲喇，我喺呢間公司做咗12年，40幾歲出去真係唔容易搵工。
冇諗過嘅係，Alvis竟然掟咗張訂單過嚟，個銀碼都唔細，適逢我哋公司呢幾個月嘅生意真係好差，又好多客唔找數，所以呢張單簡直係及時雨，唔單止係錢嘅問題，仲係士氣嘅問題。
我接完張單再同老細講，原來老細已經唔記得邊個Alvis……
老細：「年年有人走，個個都記得我咪好唔得閒。」
「當年佢仲差一個月先有bonus，我話辭咗職都照出畀佢嗰個呀！都話啦！你對人好，人對你好，你嗰陣照出一個月bonus畀人咋，呢張單你賺返幾多倍，你自己計下！」
老細：「冇印象，如果係報恩一早報啦，等到而家？張單可能冇人接啫！」
咁有時禮尚往來都要睇時機嘅，或者Alvis一直想醒我哋，但去到今日先有權自己話事呢！
後來我問返Alvis，點解咁好彈張單過嚟，因為我知自己間公司其實冇咩賣點，價唔係最靚，跟單又唔係最好，Alvis話係因為當年做得開心，反正要訂貨，錢又係佢老細畀，不如益下舊公司，起碼知道係邊個跟，知道當中係點運作。
雖然Alvis冇正面提到係關份bonus事，而且睇返轉頭，份bonus亦係微不足道，但我相信多多少少係同當年好嚟好去有關，有時唔係話要咁老土做好人有好報，或者貪圖人哋有筍嘢會搵返你，只係職場太細，多個朋友始終好過多個敵人，出嚟做嘢除咗求財，最緊要都係開開心心啫！