直接入正題，啱啱呢個星期in咗個好有趣嘅candidate，我係同個department head一齊in，早段其實正正常常，不過後來我問佢覺得自己有咩優點同缺點嘅時候，呢位candidate無厘頭爆咗句：「缺點呀？Er……被我撞見過嘅藝人都會出事，算唔算？」
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
乜嘢呀？呢個係見工嘅interview，我問優點同缺點，當然係針對返同份工有關連嘅嘢啦！所以我即時就stop同埋糾正佢。
我：「被你撞見過嘅藝人都會出事？好似唔關份工事喎！我係指工作方面……」
Department head：「唔係喎！我有興趣知喎，即係見親就會出事？咁你去睇啲歌星嘅演唱會咪好大鑊？」
Candidate：「唔係，唔係咁嘅意思，我係話只要我喺街撞見嗰位藝人，隔一排對方就會出事㗎喇！」
趣就一定有趣，但我作為一個HR真係有必要同佢釐清呢條問題嘅方向，點知我已經搵唔到位入喇！
Department head：「喂，講嚟聽下，咁你撞過咩藝人呀？出咩事呀？」
Candidate：「我都唔係成日撞到㗎，最近嗰次已經係撞到楊明，我對住佢say hi，佢仲有同返我打招呼，點知過咗兩三日就見到佢醉駕出事。」
Department head：「哦，咁應該唔關你事嘅，我記得好多年前楊明已經衰過類似呢啲醉駕。」
Candidate：「或者係啦，不過我之前嗰啲都好經典，楊明之前你知唔知我撞到邊個吖？全城哄動㗎！」
Department head：「你唔係講安心出行呀？你撞到黃心穎呀？」
Candidate：「啱咗一半，我撞到許志安，真係隔咗好短時間咋，跟住周圍就爆咗佢單的士偷食，我仲同班friend講前幾日先撞到安仔，其實安仔好nice㗎，咪有人將佢同杜德偉搞亂咗，話球場撞到佢唔應人嘅，我又唔覺安仔串喎，嗌完佢會向住我點頭，完全唔覺佢有架子。」
Department head：「巧合啫！你又唔好講到自己好似生人勿近咁！」
Candidate：「我仲喺7仔買嘢撞到Boy’z嗰個Steven，人天生根本都不可以愛死身邊的一個……」
我：「得㗎喇，你唔使唱，我知邊個。」
Candidate：「幾邪呀，跟住就爆佢搞fans，然後演唱會取消。」
Department head：「咁關智斌真係多得你唔少，仲有呢？仲有撞到邊個明星？」
Candidate：「我仲撞過周永恆，呢個好耐喇，10年8年前左右啦，我都唔記得去銅鑼灣做咩，總之就係喺一幢大廈搭電梯嘅時候撞到佢，跟住嗰一年佢畀人搜到有毒品，判感化，但之後都好多是非起唔返啦，早排好似又見佢出事，呀！仲有吳浩康，呢個係去salon撞到，好似又係差唔多時期，搜到可卡因吖嘛！其實佢唱歌好好聽㗎！」
Department head：「但係呢，好似周永恆同嗰個Steven本身都好多問題，你撞唔撞到都係會出事㗎啦！」
Candidate：「我撞過阿Lam兩次，兩次撞完佢都出事。」
Department head：「阿Lam？林子祥喎！出咩事呀？」
Candidate：「呢單嘢真係十幾廿年前喇，嗰陣我仲讀緊書，撞過一次林子祥，隔咗一排佢喺美國畀人話偷太陽眼鏡吖嘛，最邪係我幾年後又撞到阿Lam，跟住佢就喺演唱會跌落台，好大件事㗎喎，好似話一度昏迷。」
Department head：「會唔會係你撞得明星多，有啲冇事或者大紅大紫嘅唔記得啫！」
Candidate：「絕對冇，上星期同朋友食飯，大家先傾起撞見過咩明星，我數晒出嚟，楊明、許志安、Steven、周永恆、吳浩康、林子祥，唔係有大是大非、惹官非，就係有意外，其他好嘅或者紅嘅全部冇撞過，同埋呢啲藝人全部係我撞完之後先有出事新聞，唔係之前發生咗先撞到。」
Department head：「咁都幾恐怖喎，不如你移民，唔好搞香港啲藝人啦！」
我：「不如唔好講移民啦，講返份工先好唔好？15分鐘後有第二個interview，我諗大家講返工作先。」
終於可以完咗呢個話題喇！我個人覺得呢個candidate答非所問，其實扣咗少少分，偏偏個department head就認為好funny，仲想請佢，原因係：「個個candidate都差唔多啦，呢個幾過癮，一齊做嘢冇咁悶，請咗佢積福呀！一陣佢冇工返周圍走，撞多幾個明星仲得掂嘅，我哋唔係明星唔使驚啦，佢又唔係剋公司，剋藝人之嘛！」
及後我哋仲見咗幾個人，但係個department head明顯冇乜興趣，佢已經先入為主想請撞親邊個藝人都會出事嗰位candidate喇，如無意外下個星期就會出offer，由於我只係HR，決定權喺department head手上，佢話點咪點囉！
《辦公室日報》都有Threads喇，嗰邊嘅主題係「鳩噏要在放工後」，快啲follow一齊鳩噏246啦！🤣
https://www.threads.net/@officedailyhk
Btw, 講起藝人，我又諗起呢個連載：
茄喱啡（上）你個candidate係御用妹仔嚟喎
https://hkofficedaily.com/?p=17293
茄喱啡（下）老細想要高海寧電話
https://hkofficedaily.com/?p=17304