雖然已經有咗決定，不過都想問問大家嘅睇法。
話說之前in咗一位求職者，仲confirm埋offer，講好咗呢個星期一返工，但係上星期尾收到佢電話還價。
「因為我之前見咗幾份工，啱啱另一間公司又請咗我，人工多$2,000，想問下你哋可唔可以加多$2,500畀我？如果ok我就下星期一照返工，唔得我就會揀佢哋。」
我：「其實你個offer係遞咗上去，老細批咗，如果而家再加$2,500，我要問一問先，或者你有冇比較埋其他福利呀？例如醫療同埋大假。」
「比較咗㗎喇，大家都差唔多，公司規模又係差唔多，所以如果你唔係出多過佢，我就揀嗰邊。」
咁我作為HR又的確話唔到事，唯有同佢個Position嘅Line Manager講。
佢個Line Manager聽完好嬲，覺得咁樣係出爾反爾，仲要咁遲先至通知我哋，所以決定1蚊都唔加。
其實呢個position嘅budget係有嘅，就算加多$2,500都未有耐到上限，而個求職者亦的確係我in嘅人裡面比較標青，所以Line Manager先至冇搵其他求職者做後備，而家要重新出job ad請人。
我覺得個求職者幾坦白，加上我哋公司唔係冇budget，加多$2,500絕對offer到，但係Line Manager覺得個求職者一係就撇脫啲turn down，唔應該走嚟話有一份多$2,000，所以要我哋再出多$500畀$2,500，認為應承咗再返轉頭議價太肉酸。
想問問大家，如果你係個求職者，呢種情況下會唔會臨返工先打嚟還價呢？又假設你係個Line Manager，明知公司出得起，又會唔會想簡單啲解決問題，唔使再出post再in一大輪，始終呢個position係replacement，有個同事6月頭離職喇，而家真係時間緊迫。