細路仔唔識講嘢就叫童言無忌，咁大人呢？又如果係高層職員呢？
我係HR，今日同個Senior Manager一齊用zoom去interview求職者，因為對方有段接近一年嘅空窗期，Senior Manager就問人：「點解之前咁耐唔做嘢嘅？係搵唔到定係點？」
求職者如實回答有屋企人患癌，需要佢照顧同埋陪伴，然後Senior Manager又話：「唔好意思，咁你屋企人而家好返？」
求職者話呢位屋企人已經走咗，因為當時已經係末期，中間有段時間身體狀況反反覆覆，早兩個月離開咗。
Senior Manager呢頭叫對方節衰順變，嗰頭又無端端問咗人一句咁嘅嘢：「其實我都想了解下，明明係末期，仲要用咁多錢去醫，你哋有冇考慮過不如用啲錢同佢去旅行，或者做其他嘢？幫佢留個美好回憶？」
我真係聽到呆咗，可惜係用zoom做interview，我坐喺會議室，呢位Senior Manager就喺自己房，否則一定用手肘撞佢叫佢收聲，因為你聽得出Senior Manager係真心問，好似當同人哋傾計咁，但就冇用個腦囉，有冇諗下人哋喪親嘅感受呀？
個求職者竟然冇發脾氣，反而好平靜咁回應：「其實個屋企人係我媽媽，佢當時身體唔係一下子變得好差，都係正常咁生活同作息，醫生唔會叫你放棄，作為家人點會諗到咁悲觀呢？哦！末期！咁唔醫喇，拎晒啲錢去旅行咁樣啦！唔會㗎嘛！就算得1%機會醫得好都要搏，而去到最後身體狀況轉壞，體力同精神上都冇可能去遊山玩水，病人自己都唔舒服啦！」
Senior Manager聽完就答咗句：「咁又係。」
Interview結束之後我衝咗去Senior Manager間房，劈頭第一句就同佢講：「你都幾仆街㗎喎！」
佢仲要答我：「我唔係質疑佢有一年空窗期呀！真心想知有末期癌症嘅心態，明知機會渺茫，點解唔用啲錢去玩呢？好過睇醫生射晒啲錢落海吖嘛！」
講嘢唔該分輕重啦！智力同職位果然未必會成正比。