做咁耐HR，第一次遇到求職者上嚟見工請食嘢。
個求職者喺reception填完form之後，我就行出去帶佢入meeting room正式interview，當時已經見佢拎住兩盒嘢，然後入房一坐低就同我講：「呢度一盒Cupcake，一盒冬甩，請你哋食㗎！上嚟之前唔肯定呢度有幾多同事，如果唔夠就真係唔好意思。」
我：「請我哋食？」
冇諗過求職者會請全公司食嘢，驚訝之餘，亦覺得over咗，何況我睇到包裝盒，啲Cupcake係有牌子，唔係嗰啲幾蚊嚿嘅西餅，早排有個資深員工離職，請散水餅都冇咁闊綽，何況呢位求職者只係in一份junior嘅職位。
我婉拒好意，期間佢仲婆婆媽媽係咁叫我收，又叫我分畀同事，咪癲啦！賄賂咩！由於CV係Manager揀，我點都要畀Manager見一見。
雖然話禮多人不怪啫，都要睇場合㗎！上嚟interivew搞到請食嘢真係好怪囉！
以為係咁先啦，誰不知Manager竟然話請佢，而且收埋盒Cupcake同冬甩，咩料呀！
論interview嘅表現，其實佢唔算突出，Manager同我講：「差唔多啦，唔做落唔知邊個好，但佢買埋嘢食上嚟咁識做，就畀個機會佢！」
咁樣算唔算奇招突圍？但見工送禮呢個動作真係好唔健康，完全唔值得鼓勵，職場唔應該係咁，見工都要買Cupcake買冬甩，見多幾份咪窮過返工？我相信呢位求職者係有啲錢，不過咁樣對其他candidate好唔公平，正常啲啦！呢度香港嚟㗎，係咪發展到見工都要送煙送酒？