呢間公司仲未有人報《東張》都真係異數，較早前我去見工，填完form就由HR帶我行入會議室，咁佢個meeting room喺office最入嘅，所以我沿路會見到間公司係點，其實第一個感覺係～～「嘩！同事啲位都幾闊落喎！」行多兩步睇睇下就覺得唔對路，每人個位都附加一張梳化咁奇特？
個設計係點呢，一般office就係一張電腦枱加一張電腦椅，有啲公司有partition（屏風隔板），有啲就冇，正常係咁啦！呢間公司就唔係，佢係每個人張電腦椅後面仲有張雙座位梳化，我諗你都想像到啦，如果每個位都有張梳化，佔嘅空間好大㗎嘛，所以闊落得嚟又有種講唔出嘅怪相。
都未嚟得切消化呢種咁前衛嘅設計，再行入啲我就望到其中一個位嘅同事瞓緊喺張梳化度，唔似休息，睇落似沉睡嗰隻，而張雙人梳化明顯唔夠長，所以呢位男同事攤平瞓之後係見到隻腳凸咗出嚟，雖則條走廊都闊，唔會撞到，不過就怪囉！
未知咩事，照正常咁同HR做晒個Interview先，其實過程冇咩特別，甚至可以話係幾順利，去到最後階段HR姐姐同我講：「好喇，有消息我哋會通知你，應該兩個星期之內有結果，你有冇咩想問？」我猶疑咗一秒，始終抑制唔到自己嘅好奇心，所以就問HR姐姐：「頭先見每個位都有梳化，仲有同事瞓緊，公司咁好嘅？」
我算係問得好有技巧啦！明明係怪相，但都美化為～～公司咁好人人有梳化，仲容許同事辦工時間瞓覺。
HR姐姐：「呢樣係幾好㗎，因為老細錫同事，所以特別為員工設計，同事平時OT可以直接喺公司休息。」
吓！點解唔返屋企休息，要喺公司休息？HR姐姐一味讚老細錫同事，其實冇解答到我嘅問題。
我：「老細咁好？好少可見到office hour瞓喺度都唔介意。」
HR姐姐：「嗰位同事噚晚做到凌晨，一來一回又返屋企又返公司仲攰啦，我哋老細都會睇情況，咁小事唔會介意，呢度好free！」
凌晨1點又係凌晨，凌晨4點又係凌晨，何況香港有幾大呀？就當個同事住大西北屯天元，公司搭的士返屋企有幾耐？最後要留喺office過夜喎！我相信佢口中嘅OT都唔簡單，而且每個同事都有自己嘅梳化，即係個個都有機會OT完喺office瞓？
我：「睇落個個位都好闊落好大，香港好少公司捨得畀咁多空間員工。」我覺得自己好虛偽，咁嘅說話都講得出。
HR姐姐：「係呀，將來你喺度返工都可以有咁大個位，真係好少公司有咁人性化嘅設計。」
人性化？定係冇人性呀？點解老細要同事OT到凌晨，然後畀張梳化佢哋瞓就講到皇恩浩蕩？
Interview完咗之後，HR姐姐帶我行返出去，嗰位瞓到凸咗隻腳出嚟嘅男同事都未起身，我不禁喺度諗，呢度擺張梳化喺員工個位當做床，所以每個位都比起其他公司用多咗空間，咁點解唔索性請多啲人，大家夾手夾腳做快啲減少OT，減少喺公司過夜嘅機會呢？
站於老細角度，諗諗下又「合理」嘅，訂造梳化只係一次性嘅支出，但請多幾個員工就要每個月出多幾份糧，點計都係整張梳化抵啲啦！
見完呢份工之後我同咗幾個朋友分享，佢哋猛咁問OT計唔計人工？不過我冇興趣問呀，亦都唔想知，一入嚟見到個office咁嘅環境，同事又就咁瞓喺度，基本上已經想像到有幾地獄，計OT都係咁話啦！唔通我瞓覺嗰一刻先打卡當放工呀？我淨係知呢個position係replacement，即係有人之前走咗先至再請，並唔係增加人手，所以請咗我就代表真係有機會喺公司過夜。
點都好，以上都係我一廂情願，呢份工見完係冇feedback，唔知係咪我太多嘴係咁問OT情況呢？仲好啦，反正佢請我都唔會做，市道係差，但我仍然想搵到一份正常嘅工，唔使好好，正常就夠㗎喇。
