好多年前同個friend打算開間獵頭公司，其實都唔係打算，某程度上都已經開咗，因為拎咗商業登記，租埋虛擬辦公室，所有嘢都如箭在弦，但我哋發覺欠缺咗最重要嘅一樣嘢－－－客戶！知道聶瞳你之前係做headhunt，但慎防唔係呢行嘅朋友唔識，所以我簡單講下成個開業流程。
開獵頭公司同你開請姐姐嘅外傭公司係一樣，都要去申請一個類似中介人牌照，唔知2024年有冇唔同，但係我當年同朋友搞嘅時候，呢個牌照某程度上係畀錢就得㗎喇，當然前提係你已經成立咗一間公司先啦！如果有一啲好細或者不知名嘅獵頭公司搵你，大家係可以上網check下佢哋有冇呢個牌照。
當年我同朋友呢間就係好細同埋不知名嘅獵頭公司喇，初時冇客好合理吖！都冇人識你！客底可以話係零，求職者都唔放心send份resume畀你啦！因為嗰陣我朋友仲有份正職，反而我就係全身投入去做，所以冇生意真係搞唔掂，然後朋友就提議：「不如你去in出面啲獵頭公司吖！有份老底之餘，你仲可以偷晒啲客過嚟！」
我：「偷？」
「唔用個偷字囉！用挖！獵頭公司都係挖人起家，咁你都係去挖佢啲客底啫！到時你做咗headhunter，邊間公司要請人都知，咁我哋咪Approach啲客囉！」
無論點樣美化字眼都好，即係偷人啲客啦！我承認係唔道德嘅，但幾年前我都係廿零歲仔，做生意點都要搏下㗎啦！何況朋友都講得啱，起碼我有份老底，偷客仲有糧出，又可以去上「實戰堂」，何樂而不為呢？
結果我見咗幾間獵頭公司，真係有人請……坦白講都唔係好叻，始終headhunter說穿了都係sales啫！人哋請個sales返嚟跑數，到頭來都係睇業績，唔通要你牛津劍橋畢業先請咩！
總而言之，我就係咁樣入咗獵頭公司做臥底喇！
不過都唔係完全冇難度㗎！首先，我唔可以一開始就偷客，如果自己唔畀心機做，跑唔到數好快就會畀人炒，有冇單返幾個月就見真章，唔通獵頭公司會留用一個一直開唔到單嘅headhunter咩？再強調一次，佢哋唔係要請個HR返嚟，佢哋係請個sales呀！
其次係，我要一路做生意，一路拎客嘅資料，都要學識點留放㗎！唔使鬧我咁樣係有違道德甚至有犯法成份喇，因為由始至終我係一個客都撬唔到，唔夠三個月就放棄喇！最大原因係就算有晒客戶資料，知道晒邊間公司需要headhunt請人，佢哋都唔會用我同朋友間細公司，簡單啲講，連張入場劵我都拎唔到。
與此同時，我喺獵頭公司又真係有數返，除咗頭兩個月未開始發放佣金之外，做到第三個月我底薪連佣金已經袋咗4萬幾，之後第四個月再多啲，第五個月又再多啲，雖然中間都有啲低潮，始終唔係個個月咁好生意，不過整體都係搵得多過之前，更莫講話肯定搵得多過自己開間獵頭公司啦！
出面檔嘢一直冇錢賺，半年多少少我就同個朋友執Q咗佢喇，全心全意受薪做headhunter，講起都覺得好笑，本來返工係為咗做臥底，點知自己做做下過埋底，我個friend雖然講笑咁話我冇義氣，但其實佢都明白嘅，例如一啲大集團或者銀行要搵獵頭公司請人，唔係單單睇你搵到嘅求職者掂唔掂，佢哋仲會考慮間獵頭公司嘅規模，仲有間獵頭公司開咗幾耐等等，無名無姓唔會睬我哋。
做臥底不成變咗過底，呢份工我一做就做到而家，由新人做到小頭目，公司再develop條team畀我自己帶，有時做人就係咁，苦心經營嘅嘢未必有好結果，無心插柳又無啦啦開發咗另一條路出嚟。
但就算而家我有咁多年headhunter經驗，我都唔會再自己搞獵頭公司喇，大樹好遮蔭，搵到錢咪得囉，唔使下下食到最盡嘅，你要賺晒成嚿錢，當中都要做好多下欄嘢，就連開張contract都要自己打，無謂啦！
不過我真係要多謝一個人，就係我本身做臥底呢間獵頭公司個上司，佢畀咗好多機會我，教咗我好多嘢，發展扶搖直上都係多得佢提攜。
早排我嘅title又升一級，解釋少少先，淺白咁去講，好多人未必知道喺獵頭公司升職嘅好處，可能會覺得sales都係食佣㗎啦！其實係有分別嘅，就係你嘅佣金拆帳會多咗好多，咁當然你職位愈高，孭嘅target亦都高咗啦！好公平嘅！
遇到呢個上司係我幸運，但同時亦令我覺得好羞愧，因為今次升職嘅時候，佢私下同我講咗句：「而家你睇幾條team㗎喇！又結咗婚生咗小朋友，唔好再諗住出去開公司冒險喇！」
唔好「再」諗住出去開公司？我都冇提過，點解佢會咁講？點解會用個「又」字呢？
我直截了當咁問上司點解咁講？佢亦毫不諱言當年已經知我有自己嘅獵頭公司，因為某幾個我嘗試去撬嘅客，原來係同我而家呢間公司簽咗exclusive合約，即係用得獵頭公司請人，就只會搵我哋，換言之，嗰陣我走去Approach呢班客，其實一早就揚咗……
我都唔敢問得太詳細，輕則當年只係有客向我而家呢間公司報料，話冇可能請人嘅事會外洩，冇可能會有間不知名細公司Approach佢哋；重則，可以啲客爆完間細公司叫咩名，我上司只要查一查就搵到我個商業登記同埋中介人牌照。
或者上司今時今日露少少口風係警告我，但係咁多年嚟，佢的確當我係徒弟咁教，唔止工作，仲有好多嘢佢都會同我傾，會畀意見我，新年會互相去對方屋企拜年，所以我哋嘅屋企人亦係互相認識，我同上司一早已經係亦師亦友。
真係唔知上司係當年一開始已經知，定係後來先至發現，諗返自己嗰陣偷客嘅行為就會無地自容，不過做人始終要向前看，邊個後生冇做過on9嘢吖！正如上司話齋，又結咗婚又生咗小朋友，努力當下啦！佢冇怪我做「臥底」，我都要放過自己，寧願將心思同精力做好而家份工。