想講下我公司最滑稽嘅一幕，兩個男同事，一個叫Dani，一個叫阿文，兩條友平時攬頭攬頸，不過有一日就玩得過火咗，當日Dani喺自己個位企起身，向住其他人好認真講緊公事嘅時候，阿文忽然豎起兩隻手指，仲要望住我哋，好似預告緊會開玩笑咁，跟住就一嘢吉落去Dani個C眼度！
因為Dani嗰陣準備坐低，屁股已經向下移動㗎喇，加上阿文又發力將兩隻手指向上隊，我都唔知被吉C眼嘅Dani係真痛定係嚇親，總之就大叫一聲，成個人彈返起，再向後望一望原來係阿文搞鬼，連隨就盛怒爆咗句粗口，可能係事出突然啦，呢下叫聲同埋句粗口真係響徹整個office！
唔知同一件事如果發生喺大家身上會唔會嬲，換轉係我就肯定扯火，就算呢下唔痛，當住咁多人面前被吉C眼，搞到咁狼狽梗係會大發雷霆啦！我見Dani都控制唔到自己情緒，係咁「小」阿文，又因為頭先的確太大聲喇，驚動埋老細從自己間房行出嚟睇下發生咩事。
老細行埋嚟了解嘅時候，Dani啖氣都仲未落，阿文就係咁話：「玩下咋，冇事呀？」
大約知道咗發生咩事之後，老細仲嬲過Dani，因為佢覺得呢度係公司，唔係遊樂場，即刻叫晒佢兩個入房。
過咗一陣，Dani出返嚟先，大家都關心佢有冇事，當時佢度火仲未下，明白嘅，因為頭先嗰下真係出醜於人前。
阿文大約過多20分鐘先行出老細房，一出嚟粒聲唔出，直接拎起個背囊就走，臨尾又返轉頭，喺部電腦logout返個web版嘅WhatsApp，見到呢個舉動咁唔尋常，終於有個同事開聲問：「搞咩？」
兩個字嘅問題，換嚟阿文兩個字嘅回應：「炒咗！」聽到呢句之後，成班同事你眼望我眼，又唔敢講咩。
阿文離開office之前走去拍一拍Dani，唔算誠懇，但又唔算晦氣，就咁講句：「Sorry!」而Dani冇理佢，眼尾都唔望阿文。
因為有人被炒，跟住落嚟就勞煩到HR做嘢，只見HR姐姐出出入入老細房，大家梗係趁機會八卦下咩情況啦！
HR姐姐話老細好嬲，原因唔係心痛Dani個C眼，而係唔理啲同事點玩都好，咁樣吉C眼其實同性騷擾冇分別，就算男仔同男仔都係咁話，阿文玩到咁冇分寸，有咩傳咗出去就等於搞到公司冇面，好影響公司聲譽，老細仲同HR姐姐咁講：「我唔想有一日見到啲咩連登高登有人爆料，話公司出現性騷擾，男同事畀人吉C眼！一陣啲人又話要開名！」
正常嘅，作為老細當然緊張自己公司嘅形象，何況兩個男同事都幾廿歲人，呢啲行為真係小學生先會出現，咁當然Dani係受害者，佢都無辜啦！
禍係阿文闖嘅，我哋成班同事只係塘邊鶴，自然冇畀任何意見，有啲人私下覺得阿文抵死，有啲人就覺得佢兩個只係低低能能玩下，一嘢就炒似乎有點兒那個，但因為我同阿文完全唔熟，所以就冇乜感覺。
不過件事未完，Dani食完個lunch返嚟唔知係冷靜咗吖，抑或係阿文曾經打畀佢講咗啲乜，總之Dani晏晝就入房搵老細求情，詳細係點講就唔知，但聽返HR姐姐陳述，內容大約係話阿文一時貪玩，既然自己唔再介意，希望老細可以畀個機會阿文之類。
And then……可能見「受害者」願意放人一馬，老細竟然收返炒阿文嘅決定！
因為呢啲事炒人係冇人工賠，加上炒得咁突然，阿文嘅離職手續都未完成，所以大家就當冇事發生，HR姐姐亦打電話叫阿文第二日如常返工，同時間代老細警告阿文唔好再玩得咁癲。
隔日阿文真係再返嚟，應該乖咗一兩日冇搞事好安靜，然後又再同Dani玩到攬頭攬頸……
雖然睇得出Dani同阿文幾friend，我諗係就係男人口中所謂嘅好兄弟，但唔知點解覺得成件事好兒戲，吉人C眼、發火、老細炒人、求情、第二日請返，話晒都係公司嚟㗎！大家已經係成年人，咪再好似小學生咁幼稚啦！