舊同事介紹我去佢朋友間公司見工，form都唔使填，真心正！好快就有個女仔出嚟同我講：「你係咪見Marketing嗰位呀？」
我：「係呀，Jessica介紹我嚟！」
佢帶咗我入房，我話自己帶晒學歷同工作證明，問佢需唔需要影印，個女仔話：「唔使㗎喇，一陣我阿姐會睇。」
哦，原來唔係佢負責in，不過仲好，因為後來先入房個阿姐更加親切，我約略self introduction，再講下之前份工嘅job duties之後，基本上大家已經開始傾計，因為個阿姐讚我皮膚好，我又禮尚往來讚返佢，然後就開始講啲美容扮靚嘢，由做Facial講到打HIFU，再由照頸紋燈講到去韓國微整形，最後連脫毛都傾埋。
阿姐：「你估下我幾多歲？」
嘩！想陰9 me？最少講細5, 6, 7年啦！目測呢個阿姐45歲左右，45－7＝38，都係唔穩陣，豪夠10年畀你。
我：「你好後生喎！35？」
阿姐：「35？哈哈！」
我：「啱唔啱呀？」通常呢啲情況一定係咁玩，對方應該會話35歲太過獎，實情係大好多或者大幾年，然後我就要扮驚訝講句唔係啩，真係睇唔出喎……大家女人，係受呢套㗎啦！
阿姐：「哈哈！35！35！」
我：「好在我都估得幾準！」你係真唔係呀？不過見個阿姐冇正面否認，又笑晒咁，無謂再深究啦！最緊要你開心啫！
氹到你心花怒放，又係朋友介紹，以為份工冇痴牙啦！點知成個星期都未有回音，忍唔住打畀我舊同事問，本身人哋介紹，我係唔想咁chur，點估到舊同事話畀我聽：「好似話唔考慮……我見你又冇打畀我，以為你都feel到，原來你仲等緊？」
我：「吓！點解呀？我同個阿姐好好傾喎！可唔可以問下你朋友呀？點解佢阿姐唔考慮我先？我都想知衰咩？」
舊同事：「咩呀？你見嗰個咪係我朋友囉！」
我：「有個妹妹仔帶我入房見阿姐，乜個妹妹仔唔係你個friend咩？」
舊同事：「我冇上過佢公司，唔知邊個妹妹仔，總之我個friend就係in你嗰個。」
我：「原來個阿姐先係你個friend？諗諗下又似喎，個妹妹仔應該under你個friend，淨係帶我入房，唔怪得連我啲工作證明都唔敢拎嚟睇啦！」
舊同事：「就係我個friend話得事先叫你去之嘛！佢同我講，你話佢似35歲！」
我：「就係因為呢個原因？喂！咁好難做喎！又係你個friend叫我估佢幾多歲，即係點呀？試我會唔會講真話呀？睇落似45咪話似35囉，咁客氣都錯？」
舊同事：「我個friend 29……」
…… ……而家諗返，佢當日連續「哈哈」咗幾次，又重複咗「35」幾次，應該係有另一番意味，29歲就做到阿姐，有料！但係咪因為做咗阿姐，所以29似45呢？
唉！又要繼續搵工。