靚呢樣嘢，有時真係水能載舟亦能覆舟。我有個女仔friend叫Lynn，大學識到而家，十幾年喇。
Lynn好靚女，未畢業已經拍過某位男歌手嘅卡拉OK MV，後來佢都有追逐自己嘅夢想，就係做下model，做下演員，電視同電影都演出過。
後生覺得佢靚女有好多著數，成班同學去食飯，唔止一次睇住啲老闆或者侍應獻殷勤，大家叫埋同一樣嘢，Lynn嗰碟永遠都大啲，仲有好多兵仔又接又送。
不過Lynn並冇大紅大紫，頭先話拍MV其實得一次咁大把，演戲方面永遠都係佈景版，例如飾演主角喺office裡面其中一位同事，十次有九次都冇對白。
Lynn嗰隻靚無疑喺朋友圈當中係最標青，但其實喺娛樂圈又好普通，一拍埋啲女主角同埋更多超班靚女身邊，佢又會顯得好平庸，可能我形容得唔係咁好，希望大家明白我想表達啲乜。
佢雖然好想全心全意投入演藝事業，不過始終冇突圍而出，所以Lynn嘅生活大部分時間都係拮据，Lynn實際上亦放棄過N次，只係每當佢想搵工嘅時候就會遇到以下幾個問題：
1）唔想搵拋頭露面嘅工，因為你未必講得出佢個名，但多少會有種好熟口面嘅感覺，佢自言曾經有路人喺旁邊講：「咦！呢條女咪嗰個茄哩啡？」
2）始終都叫讀過大學，只願意搵office傳統文職。
3）仍然懷住一顆想紅嘅心，所以即使放棄過N次，但一有人搵佢開工就會仆住去。
4）雖然係大學畢業，不過實際工作經驗可以話係零，起碼冇正式文職經驗先。
你不難發現當中有幾點係好犯駁，想做文職又冇經驗，二字頭嘅時候照計唔難，但係而家呢個年紀又冇相關經驗，搵office工真係唔容易，曾經有friend問佢做唔做receptionist，原來呢個崗位喺佢心目中就係屬於拋頭露面。
咁靚女真係冇人請？有！只係頭先都提到，Lynn仍然有一顆想紅嘅心，我曾經叫Lynn去我公司做住先，幫佢搵到份CS，淨係負責聽hotline，但佢做咗兩個月又有人搵佢拍嘢，跟手即刻辭職，咁好難幫喎！
年齡漸長嘅問題當然唔止阿Lynn，我哋成班同學都唔後生喇，不過各自喺事業方面站穩陣腳，我算好渣，有啲舊同學已經做到高層，甚至係創業見到一定成績，而阿Lynn就繼續呢種追夢生涯。
我好明白阿Lynn諗咩，畢竟由細到大都畀人讚靚女，自己會有一份自信同形象，無奈娛樂圈或者演藝界係好現實，你靚，大把人靚過你，仲要好多妹妹仔每年無限量出道，要甜美有甜美、要型格有型格、要好身材有好身材，要家底勁有家底勁，最重要係細你十幾廿年，所以阿Lynn想一炮而紅嘅難度比起以前更高。
突然間講起阿Lynn嘅困局，係因為佢早排拍完戲做路人甲之後又失業，我幫晒口叫公司再請佢返嚟，你做一段時候都好吖，第日咪拎住張reference letter搵其他工囉！點知條路已經鋪晒，阿Lynn返咗10日唔夠，又話有套戲搵佢飾演某巨星嘅其中一個秘書，雖然冇對白，而且得一個場口，但佢好想拍，所以再度喺我公司辭職，我老細話唔好再叫阿Lynn嚟做，因為次次都做唔長。
我哋呢班同學已經40喇，有時見到阿Lynn反反覆覆失去方向，我都會諗生得靚原來可以係一把雙面刃。