公司請緊Sales，其中一位求職者份resume都幾靚，之前係賣健康產品，佢仲寫自己連續幾個月成為Top Sales，所以就約上嚟見工。
我：「電話裡面聽你概括講咗係健康產品，supplement又有，器材又有，可唔可以講下係B2B定係B2C？」
「咩係B2B B2C？」
我：「簡單啲講你係sell畀公司定係sell畀個人為主？」
「哦！Sell畀個人，對象都係啲老人家，有補品呀、量血壓啲機呀、按摩器呀……」
咦！呢類公司……
我：「係咪嗰啲每日好多公公婆婆排隊，送少少嘢，然後叫佢哋買好多嘢嗰種？」
首先，我對呢種公司印象好差，其次，如果佢真係做呢種Sales，我以為講起會想迴避，甚至係覺得羞恥，點知佢冇。
「係呀！好多行銷方案都係我幫公司諗㗎！先送啲小禮物，老人家就會好開心，每日叫佢哋嚟聽講座，再sell佢哋買其他產品，當時我每月都幫公司賣好多血壓計同維他命丸，幾萬蚊嘅按摩器都成日賣到出去，試過有個阿伯好鍾意我，一個月使咗廿幾萬買產品。」
我：「你唔覺咁樣係呃緊人？」
「點會呀？佢哋好開心㗎！我會畀本手冊佢哋，每日嚟到都吸個印仔，好似成績表咁，最緊要幫公司跑到數吖嘛！講真吖，班公公婆婆都七老八十，留住啲錢做咩吖，益我好過啦！佢哋又難得搵到精神寄託。」
我：「既然你條數跑得咁靚，點解好地地又唔做呢？」
「冇呀！公司耐唔耐就會轉地區，本身喺大窩口，而家轉去屯門，太遠喇，我唔想返屯門。」
幾年前，我自己嘅阿媽就係去呢啲咁樣嘅地方，拎住幾件爛鬼贈品返到屋企好開心，好多都係冇牌子嘅洗手液、大陸餅乾、不明來歷嘅藥，又係有本手冊之類嘅物體。初時我都冇為意，後來發覺阿媽每朝都去聽健康講座，去親就買幾千蚊嘅嘢，短短兩個月用咗十幾萬，佢嗰啲維他命丸嘅牌子我見都未見過，上網都搵唔到，咩成份又唔知，後來阿媽仲話間嘢叫佢買一部30萬嘅按摩椅。
作為仔女，當然想孝順啦！但孝順唔代表要睇住自己父母畀人當水魚咁呃，當時我丟咗本所謂手冊，見到我阿媽好失落，因為冇咗個地方去，我真係有少少心噏。
我成日都諗，大家都係人，點解有人肯做一啲呃老人家錢嘅工呢？呢種人會唔會覺得內疚呢？但原來世界上真係有呢種人㗎！最緊要自己搵到食，話知個老人家用晒份棺材本買啲唔等使又來歷不明嘅嘢，就好似我眼前呢位應徵Sales嘅人，佢仲好自豪添！
跑到數嘅Sales我想請，但唔係呢種。