請咗個男仔做part time，土生土長嘅日本人，時給2,000円，每個星期視乎工作需要返2至3日，每次大約3至4個鐘，上個月出畀佢份糧total係64,000円，另外會畀交通費同埋包一餐飯。
日本「時給」嘅標準大約係幾多呢？Lawson請便利店員時給約1,100至1,300円，我樓下嗰間請夜班有1,300円，亦見過有滋賀県嘅便利店時給人工係950円，不過講前線工作有啲唔對等，又睇下office工作大約係幾多。
玩具廠請品質檢定員part time時給 1,400円 ~ 1,700円，語言學習中心請online導師時給1,800円 以上，一般office就平均1,500円，當然會有啲係幾千円甚至過萬円，例如有間雜誌社就有份時給2,000~ 6,000円嘅工作，但係相對上要求就高好多，除咗要有文字（日語）功力，亦需要求職者有幾年以上相關日本雜誌社經驗。
喺公司請人嘅世界裡面，你間公司名氣愈大愈響，請人嘅金額係可以手緊啲，因為求職者識得你，一來放心，二來佢都想嚟做，三來有你間公司名擺落CV都威啲。相反地，公司愈細愈冇名氣，你出嘅offer就要吸引啲，否則點解要apply你呢間？
我喺日本嘅公司正處於起步階段，所以就係屬於冇名氣，我呢度仲有兩個日本full time同事，當日要請part time嘅時候，佢兩個都有畀意見，異口同聲話時給1,500円係標準，不過我平衡現實同理想之後，都係決定畀時給2,000円，只係需要對方正正常常，純正日本人，因為好多時要對外同返日本人做嘢，唔需要經驗，學生都得，應該差唔多啦！
講返個男part time先，佢叫小室，冇諗過佢做嘢好ok，有交帶又唔怕辛苦，仲要好主動，當日見工已經覺得呢個人唔錯。
小室：「以前返大企業好大壓力，係心理壓力，有一日我覺得頂唔順，所以就辭咗職，呢段時間一直係做part time，我另外仲有份part time，時間唔係好穩定，你哋介唔介意？」
我：「唔介意，你另外一份part time係做咩㗎？」
小室：「包裝三文治。」
原來小室另一份part time工作係負責包裝三文治， 即係你去日本便利店見到林林總總嗰啲三文治，工場做完之後就會搵人包裝好再送出去派畀Lawson、7-11、FamilyMart，時給比起我呢度更少，不過壓力指數基本上係零。
因為合作咗成個月之後覺得小室真係唔錯，加上公司又要請個正社員，所以我就大膽向小室提出不如轉正，反正我預計支出嘅人工絕對比佢兩份part time加埋仲要多，而且包裝三文治同埋我呢度份part time都有啲打游擊feel，每星期工作時間都唔同，我想睇下小室有冇興趣。
小室：「自從之前份工承受咁多壓力之後，我其實唔想再做任何正職，時給2,000円就夠，鍾意而家咁樣輕輕鬆鬆，難得我女朋友唔介意，佢話只要我開心就好。」
咁就梗係唔勉強佢啦，連佢身邊最親密嘅女朋友都唔介意，我更加應該畀小室選擇自己鍾意嘅工作模式。
小室：「如果有得揀我連包裝三文治份工都唔想做㗎，不過始終要賺啲使費同女朋友去街，食飯都要錢吖嘛！」
我：「你咁講法……你會繼續喺我公司做㗎呵？」香港細公司喺度請人真係好難㗎，小室你咪走呀！
小室：「梗係會啦，我鍾意呢度嘅工作環境冇壓力，同埋我未接觸過，好有趣。」
小室喺我公司嘅職種遲啲再同大家介紹，不過佢所指嘅冇壓力，係指我公司冇階級同埋傳統觀念，都係嗰句，一間咁細嘅公司，同事鞠躬我都唔好意思，你對外可以跟日本習慣用敬語或者咩30度鞠躬（上星期篇文有講），對我或者喺公司裡面就不必喇，一切從簡。
入鄉隨俗係一回事，有自己風格都係一回事，香港有唔少外國企業都係用自己嘅風格去工作，我喺度諗，香港公司入到嚟，對外或者無可避免要跟「日本風」，但對內可以easy啲，希望大家做嘢開心啲，反正我喺東京間公司都好似聯合國咁，有日本人，有台灣人，有香港人，有澳洲人，仲有個……摩爾多瓦人🤣有機會再講多啲，費事偏離今次主題。
小室自言係一個執行者，多過係一個創作者，以往工作嘅不愉快經驗令佢唔想孭咁多嘢上身，鍾意聽指令然後執行好任務就算，其實呢種性格即使喺香港職場都好常見，我打工嘅時候都曾經拒絕升職：「唔好搞咁多嘢啦，加人工咪得囉，我唔想孭飛呀！」
但隨住經歷同年紀嘅轉變，我嘅心態亦都轉變咗，或者小室將來去到某個位都會一樣，最緊要佢可以順住自己嘅心意，去做自己enjoy同埋喜歡嘅事，呢種人生係最簡單同幸福。
好喇，小室拒絕轉做正社員，咁我又要出job ad搵返個日本人喇，請人真係好煩，喺東京請人仲煩。