公司春茗抽中大獎，韓國某牌子65 吋OLED 4K 智能電視，價值兩萬七，負責做司儀嗰位同事喺台上嗌咪：「Derrick Yeung，邊個嚟？有冇呢個人？」
因為我試用期都未過，對我冇印象好正常，但我個Manager就起身大叫：「呢度！呢度！」然後催促我上台領獎。
上到去個司儀話：「恭喜晒，訪問你幾句先，中大獎開唔開心？」
我：「開心。」
司儀：「呢位同事做咗幾耐呀？自我介紹下吖，等大家認識你。」
我：「哦，我1月先入職，多多指教。」
司儀：「1月？即係未過試用期喎！」
我個Manager喺台下又大叫：「聽日畀佢提早過試用期！」其實Manager係好人，又識搞氣氛，全場聽完都笑，我企喺台上就尷尬啲囉！
個司儀好認真咁請示舞台前面張枱嘅老細：「張生，未過試用期可唔可以中大獎㗎？」佢係用支咪問，即係全場都聽到。
我以為司儀唔識做啦，估唔到老細又真係諗，仲行埋台邊同司儀密斟，因為好近我，所以聽到佢哋大約講乜：
老細：「個抽獎冇分新人舊人？」
司儀：「冇呀，往年都冇咁分，未試過新人中獎。」
老細：「新人冇所謂呀，佢未過試用期吖嘛！」
司儀：「咁而家點？再抽過？」
老細：「冇點㗎，你唔抽都抽咗……」
我一個人佇立喺台上，面對台下8圍枱嘅同事目光，其實我都唔想要你部電視，係你抽我出嚟咋！唔好搞到我成碌葛咁企喺度好冇？想同你講最多唔要個獎，又怕你以為我冇禮貌。
佢哋斟完一輪，司儀行返埋嚟我身邊拎住支咪講：「再一次恭喜呢位新同事，Derrick係咪？畀心機做喎！唔好未過試用期就走呀！追返你個大獎㗎！哈哈哈哈！」台下班同事有啲又跟住笑，我唔覺得好笑囉！
春茗之後返工，Manager晨早就畀信我，話我可以提早過試用期，我仲戇居居問佢：「原來你講真㗎？真係畀我提早過？」
Manager：「我都唔想㗎，我意思係冇諗過要特別提早，因為老細驚你拎完部電視之後遞信，佢嗰晚已經同我講要畀你提早過試用期，咁你辭職起碼要一個月通知喎，仲好啦！咁樣唔好咩？」
唔係唔好，但成件事肉酸囉！