成日聽到啲運動員轉球隊，或者係明星轉公司，都會牽涉到一個字眼叫做「轉會費」，我冇諗過自己只係一個秘書仔都有轉會費，更加冇諗過賞識我嘅人唔係喺求職網站或者headhunt雲集嘅Linkedln出現，而係喺一個早餐會出現。
大家有冇聽過早餐會呢樣嘢？簡單嚟講就係一班老闆或者Sales之類角色嘅人，去一個晨咁早嘅聚會裡面互相認識同派卡片，等彼此講述下自己嘅業務，睇下有冇機會做生意，就算唔係即時開到單，都可以留個聯絡之後合作。
有次我同老細去早餐會，席間認識咗個男人叫Barry，佢嘅生意範疇係幫人搞海外投資，我老細同佢交換卡片之後例牌吹下水，當日仲有個韓國人同埋日本人嚟推廣自己嘅公司，但佢兩個嘅英文都好麻麻，其實呢啲情況最好就帶個翻譯，否則雞同鴨講，不過韓國人同日本人可能啱啱嚟香港發展，未有咁充足嘅資源同人手都唔定。
嗰兩位日韓人士想同我老細，仲有Barry交流，可惜溝通得唔暢順，結果我就做咗所有人嘅翻譯。
我以前working holiday係去日本，N年前亦有個韓國男朋友，所以當初學日文係為興趣為工作，而學韓文就係為咗溝仔，其實我仲識西班牙文，因為細個貪得意去咗工聯會學，講真學語言純粹係個人鍾意，等如有啲人鍾意唱歌跳舞一樣。
Barry見我三文兩語都講到，即時已經對我另眼相看，然後我哋傾下傾下傾到日本開銀行同海外匯款都好嚴格等等嘅問題，由於我喺東京同大阪生活過一段日子，所以就分享咗少少個人心得同經驗，然後Barry竟然當住我老細面咁問：「Michelle你有冇興趣幫我做freelance？」
我老細反應好大，冇等我畀任何反應已經衝出嚟擋：「Michelle好忙㗎，冇時間幫你做freelance！你唔好搵佢！」
相信連嗰兩個唔識廣東話嘅日韓人士都會feel到我老細嘅敵意，所以Barry冇再問落去，但後來唔知係有心定無意，我去完洗手間出嚟撞到Barry喺條走廊，佢一見我就行埋嚟問：「Hello Michelle，頭先淨係畀咗張卡片你老細，我而家畀多張你吖，其實我公司經常有機會出差去唔同國家，你識咁多語言都幾適合㗎！有冇興趣交換個電話……」都未講完，我老細又好似裝咗追蹤器咁聞風而至。
老細一行埋嚟就衝住Barry講：「你唔好搵佢做嘢喇，你喺出面請個人幫你啦！Michelle唔得閒㗎！我已經大把嘢畀佢做！」
其實站在我老細嘅立場，佢咁做真係冇錯，如果角色互換，我可能都會幫自己個下屬或者員工擋架，問題係離開咗早餐會之後，老細好似將對Barry啲不滿發洩喺我身上，最好笑係指責我亂咁同人傾計，大佬呀！我係你條女咩！何況你帶我去早餐會嘅初衷唔係周圍同人傾計開拓商機咩？我粒聲唔出你又會話我冇盡一個秘書嘅責任啫！
本來對於Barry嗰句「經常有機會出差去唔同國家」好有興趣，但我最終都得唔到Barry張卡片，只係估唔到Barry隔咗一個星期左右竟然主動打畀我老細，最驚嚇係老細嗌我入房傾嗰陣嘅面色……
老細：「你好想去上次叫Barry條友間公司做咩？」
「我冇咁講喎！」
老細：「條友打嚟同我講想請你喎！」
「吓！」我心諗，Barry哥你有我老細張卡片，不如搵個headhunt用第三者身份hunt我啦！做咩自己打去同我老細傾呀！搞到我要畀人鬧……
老細：「嗱！我唔係唔畀你走，你自己揸主意啦，佢話想同你傾下。」
嘩老細，你有絕症呀？上次Barry同我傾多兩句你都好似「呷醋」咁，你陰我咩！
「但係無啦啦同佢傾咩呀？」
老細：「條友話畀返賠償我，當係轉會費喎，我就唔鍾意阻人發達嘅，你自己諗。」
「轉會費？幾錢呀？」
老細：「35萬喎，妖！差$1,000都要講價。」
咩話？我值35萬？咁好似唔係你驚阻人發達，而家係你自己想發達喎！
「點解35萬嘅？點樣差$1,000？」
原來Barry話要買斷我份合約，我老細就話冇買斷合約呢樣嘢，然後Barry問我幾錢人工，得知係$27,000一個月之後就提出$27,000 x 12個月呢條數，當係幫我賠畀公司又好，當轉會費買我過檔又好，但咪住先，$27,000 x 12個月唔係$324,000 咩？
老細：「賠咩一年啫！你有雙糧㗎！你出13個月糧，起碼都$27,000 x 13個月啦！咁咪$351,000囉，條友叫我收順啲齊頭35萬，連嗰$1,000都慳！」
搞錯呀！你有咩資格放我走要收人轉會費先？就算係咁，你出13個月糧畀我係一回事，點解要個金主畀13個月糧嘅銀碼贖走我？其實我要辭職嘅話，Barry等我一個月就夠啦，到時佢一蚊轉會費都唔使出添！你平$1,000畀人仲要講到皇恩大赦？
老細：「你咪聽下佢講乜囉，如果你好想轉，我真係唔阻你發達，嗱！呢個佢電話，你自己打去同佢傾。」
「哦，咁我打去聽下囉……」得啦，都話唔使再強調係你唔阻人發達，明㗎喇！
其實我本身對Barry間公司同埋佢嘅工作範疇已經好有興趣，雖然佢走去搵老細傾係好不智，但我亦從中睇得出Barry好有誠意，結果打電話過去傾，job duties果然係自己心目中嘅dream job，因為有得周遊列國，而我自己係一個好鍾意旅行見識嘅人，當時心諗就算之後工作再繁忙，我都會搵到時間出去周圍探索。
最終我順利轉工，第一站就出差去東京，stay咗3個星期，幫Barry喺嗰邊set up office，搵咗相熟嘅行政書士同稅理士，再之後去咗倫敦同首爾，嚟緊仲有機會去西班牙一個叫拉斯彭馬斯嘅地方。
後來我同Barry講，當初佢如果搵headhunt甚至偷偷打嚟公司搵我，肯定可以慳返35萬轉會費，但Barry話明人不做暗事，唔想撬人撬得咁鬼竄，以免第時有早餐會嗰類活動都唔方便帶我出席，加上搵headhunt好驚傳達嘅訊息有偏差，怕影響到我想轉去佢公司嘅意欲，故此就直接搵我老細好formal咁傾。
Barry：「坦白講，我諗住幫你賠3個月至半年人工㗎咋，但你老細話你好做得嘢，除非賠一年，後來又話你有雙糧，要賠13個月先啱數，不過點都好啦，我相信你會幫我賺返呢筆錢嘅，起碼日本公司嗰邊我行少咗冤枉路。」
我唔知應唔應該用「愛才」去形容Barry，好感激佢願意付出同埋認為我值35萬轉會費，而舊老細除咗脾氣臭啲之外，其實都畀咗好多機會我，既然有金主幫我「贖身」，走嘅時候大家開開心心，咁都唔錯吖！
Barry畀我嘅新人工其實同舊公司唔係差好遠，但我enjoy呢份工，職種亦由秘書轉為私人助理，個人嚟講好滿意，而且Barry並冇同我簽定任何有年期嘅合約，假設我做兩個月就走，佢係好冇保障，雖然我唔會無啦啦resign，不過仍然感激佢嘅信任。
有時會幻想下，如果各行各業嘅人轉工都要轉會費呢樣嘢其實幾有趣，而家我知自己值35萬，雖然唔算高，不過總算有價有市吖，個人認為有啲惡做嘅行業例如清潔同殮房服務員等等，應該值得更高嘅身價。