今日同經理一齊in個妹妹仔，對方喺加拿大生活咗好多年，啱啱讀完書返嚟，外表同埋講嘢都徹頭徹尾係一個竹昇妹。
我用HR身份講完開場白之後，經理已經即刻轉channel：”Please introduce you！”
竹昇妹簡單答完，經理繼續問：What make you ”unit”?
佢應該想問What makes you unique，聽得明嘅，所以竹昇妹都有照答。
經理仲未完，又繼續問：How you defend 實sit?
文法又錯，讀又錯，完啦好冇呀？
今次竹昇妹遲疑咗一陣，唔知佢係思考緊經理講乜，定係聽得明但諗緊點樣回答，結果竹昇妹答到，咁即係get到條問題係How do you define success啦！叻女，呢條反而考起我，以為要defend啲咩？
勢估唔到經理再嚟：Why should our company hear you?
今次竹昇妹對住經理講：「不如你講返中文吖，我識聽㗎！」
我差啲忍唔住笑咗出嚟。
經理即刻躁咗：「我知你識聽中文，我係想考下你英文呀！」
大佬呀！個竹昇妹求職者啲英文使鬼你考咩！你考自己啲英文，又或者考佢啲中文好過啦！Interview唔使咁死板跟住呢啲傳統問題程序喎！
不過佢哋最後都係轉返用中文傾其他嘢，我覺得經理會請竹昇妹嘅機會唔大喇，調返轉講，竹昇妹都未必想入嚟做。
竹昇妹in完離開之後，我問經理最尾條問題其實想問咩？經理話：「我問佢點解公司要請佢囉，咁多人見工，你都要話我知自己嘅過人之處，啲鬼妹仔咁串嘅，仲叫我講返中文。」
我諗咗幾分鐘，如果冇估錯，經理嗰條Why should our company hear you? 正解應該係Why should we hire you?
Hear同Hire係兩個字，發音差好遠……不如你講返中文吖！