想問下大家，如果你收到風有個同事即將畀人裁，你會唔會好心提醒對方？定係唔好咁多事，當乜嘢都唔知呢？
上個月，我落公司樓下「煙break」，聽到上司同另一位管理層傾計，內容係我條team要交一個人出嚟，佢哋更多次提及阿Deep呢個名，又唔避忌會畀我聽到㗎喎！其實阿Deep係我同部門同事，我同佢個位之間隔咗條走廊，條友都幾好玩嘅，成張枱都係私人物品，模型佔3分1，另外3分2係酒，我有時望埋去以為係居酒屋，因為阿Deep專儲日本酒。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
嗰次煙break係個管理層食完走先，留低我同上司喺度，後來上司又一路食煙一路同我吹水，我已經扮頭先咩都聽唔到㗎喇，點知佢仲要主動同我講：「有幾個department都要裁人，我哋嗰邊交阿Deep一個名，諗緊幾時同佢講。」
我都唔知點解上司要同我講，可能佢煩惱緊幾時同阿Deep開口啦，所以我亦故作鎮定，費事畀太大反應，加上我係一個小職員啫，你哋呢啲高層決定裁一個員工，唔通我仲加把嘴獻計咩！所以我只係用表情同動作展現出「哦，知道。」然後就繼續食煙。
上司一路呼出煙圈一路講：「係都要揀嚟郁，我梗係郁一個最冇貢獻㗎啦，遲到又最多。」
我依然冇畀任何回應，然後上司個手提電話就響起，佢匆匆忙忙整熄支煙就走返上office。
後來我都返埋上樓，又見到阿Deep周圍同其他同事炫耀佢啲酒：「嗱，呢支響21年就犀利喇，原裝箱，樽身有富士風雲圖，我去樂天睇過呀，而家已經可以賣到90萬Yen，聽日仲訂咗支山崎送過嚟，日本早排自己都炒緊山崎細支裝。」
有同事就問佢擺咁多酒喺公司做乜，又唔肯開嚟請大家飲，阿Deep就答：「呢啲邊係用嚟飲㗎！擺喺枱頭都唔知幾好feel，連office都昇華，要飲就飲普通冇年份嗰啲，我啲響同獺祭仲有得升呀！老虎蟹都擺多十年八年先啦！」
我好想同佢講裁員單嘢，又擔心自己太多事，直至第二日見到佢唔知邊度order嘅酒到咗，嗰支獺祭巨形到呢……仲有啲山崎，所以阿Deep個位真係好誇張，唔知仲以為係小酒吧。
阿Deep見我望住佢啲酒，跟住就洋洋自得咁向我介紹：「喂，呢支！真係正嘢！樂天都斷晒貨，放返出去夠我供兩三個月樓！」
係喎！阿Deep提醒咗我，佢仲供緊樓，加上佢擺喺office啲酒愈嚟愈多，畀人裁咗咁點算呢？
諗真啲，上司嗰次又冇唔畀我同阿Deep講，所以我本住好心提醒阿Deep，希望佢有個心理準備，突然畀人裁員打擊好大㗎！
我：「Deep，私底下同你講啲嘢，我收到風部門要交一個人出嚟，好似係交你個名，你自己睇路，呢排唔好再遲到咁多，仲有你啲酒呢，咪擺咁多返office啦，可能有人覺得好礙眼都唔出奇，一陣有咩事你要搬走晒都麻煩啦，你啲酒又咁名貴。」
阿Deep聽完唔單止冇驚訝，仲露出一個詭異嘅笑容向我講：「交名？據我所知唔止交一個名，好似你都有份……」
我聽到之後實在唔敢相信，原來阿Deep都收到風？原來我都有份？
咁我開始明白喇，當日上司同個管理層肆無忌憚咁喺我面前講，可能就係要婉轉啲畀埋心理準備我，難怪亦都冇吩咐我唔好同阿Deep講啦！
我：「真定假呀？」
阿Deep：「係呀，我知道嘅消息係，唔止炒我，好似話炒埋你，所以邊有得防吖，真係炒先算啦！我聽日都仲有酒送過嚟office！」
因為咁，我唔開心咗幾日，平時絕對唔會失眠嘅我都瞓唔著，灰到好想去求職網搵工，但係一打開求職網之後，成個人又集中唔到，我上年先結婚咋，仲計劃嚟緊生小朋友，而家點算呀？
然後過咗幾日，阿Deep畀上司叫入房，出到嚟嗰陣拎住信封，仲走嚟同我講咗句：「真係郁我，哈，冇計啦！」
我忍受唔到嗰種壓力喇，即刻起身主動衝入房搵上司傾，我劈頭就問係咪會炒埋我？如果係會唔會賠足？有冇彎轉？
上司：「邊個話炒你？」
我：「阿Deep囉，佢話收到風我都有份被裁，唔怕喎，有晒心理準備，我寧願直接問你，因為咁樣等好辛苦呀，希望提早打算下。」
上司：「冇咁嘅事，冇考慮過炒你，我郁一個都唔想，係老細落咗聖旨。」
我：「真係唔會炒我？」
上司：「我就冇打算炒你，定係你自己想走？」
我：「當然唔係啦，搞清楚我就安心喇！」
出返房之後，我即刻問阿Deep上次收到風炒埋我嗰件事。
我：「可唔可以話我知你邊度聽到消息？上次你咪話收到風，唔止炒你，仲會炒埋我嘅……」
阿Deep：「吓！我上次以為你鳩up，我又鳩up咋！點知你真係收到堅料，我一陣要call個friend幫我一齊搬啲酒。」
我：「唔好理啲酒先，即係你上次話公司會炒埋我，係鳩up老作，冇咁嘅事？」
阿Deep：「係呀！」
你個仆街Deep，真係抵你畀人炒，當初好心提你，仲要玩返我，你落地獄啦！(完）
【日本職場】從華強北到東京打工遭拖糧再被老闆粗口問候｜冇得轉工唔忍就要返中國：「3年內只有一個月準時出糧，全年3日大假」
https://youtu.be/fr3OxV-1RCs