想分享一件奇人奇事，順便聽下其他人點睇呢位Candidate，我完全唔明佢諗緊乜。
5月尾嘅時候收到份CV覺得幾適合，所以打畀呢位求職者約見工，但去到interview當日，對方打畀我話撞車要改期。
「唔好意思，我姓曾，約咗陣間interview嗰位，今日應該嚟唔到喇，因為坐的士撞咗車。」
我：「撞車咁嚴重？你冇事吖嘛？」
「冇事，而家兩個司機嘈緊，報晒警㗎喇，我要留低喺現場幫手做證人。」
我自己冇遇過呢種情況，最緊要人冇事啦！如是者，再安排第二日先至in，點知呢位曾生第二次竟然no show，新嘅日期同埋時間都係佢提出，後來又消失得無影無蹤，打電話亦冇人聽。
因為我哋同時間都有用獵頭公司搵人，所以過咗一星期，即係6月頭左右，獵頭公司就彈咗幾份CV嚟，其中一份嘅background熟口熟面。如果你都搵過獵頭公司做招聘，應該知道啲部分agency會將CV嘅人名隱藏，因為要慎防客人自己走去contact個求職者，但我一眼就認到其中一份CV係來自嗰位曾生，所以我直接問獵頭：「呢個number 2024060522A嘅求職者，係咪姓曾㗎？」
獵頭話係，仲問返我點解會知，咁我就將之前嘅事講出嚟。
獵頭：「會唔會溝通上有誤會咋？我見過真人，幾好㗎喎！雖然佢冇提過撞車同no show嘅事，但我講解你公司職位嘅時候，曾生係好有興趣，噚日先見完佢之嘛！」
雖然自己收CV再請係唔使畀佣金，經獵頭就要畀多一筆，不過反正係公司出錢，Ok！算！因為曾生個profile真係好啱，今次就經第三者約你。結果我引頸以待，諗住第三次見到呀曾生喇啩，點知又係去到interview嗰日，獵頭打畀我講：「Sorry呀，曾生話前一日食咗海鮮，今朝起身又暈又嘔，懷疑食物中毒定唔知過敏，要再約另一日嚟見工。」
頂你個肺咩料呀？其實我叫獵頭contact曾生，佢照計都知係去邊間公司見工，我已經不計前嫌，你又係當日先諗個藉口唔嚟？係咪有咩前因典故特登玩嘢㗎！
唉！其實一早就唔應該再考慮呢位曾生，諗住件事告一段落啦，但我上星期再出job ad……CLS！曾生又自己send CV嚟呀！
今次我再親自打畀曾生，佢竟然聽喎！
我：「曾生係咪？收到你份CV！」
「係，我係曾生，係咪約見工？」
我：「咪住先，曾生你知唔知自己之前已經send過CV嚟？我約過你㗎！」
「哦……我唔記得添，可能send咗太多求職信出去。」
我：「你上次搭的士撞車冇事吖嘛？」
「冇事冇事！呀！係喎！上次有交通意外嚟唔到，唔好意思，我今次會準時到。」
我：「但係呢，之前搵獵頭約你，你又食物中毒嚟唔到喎！」
「有咁嘅事？哈哈……」跟住呀曾生cut我線，冇錯，係佢cut我線。
究竟發生咩事呀？曾生你諗咩㗎？好在我已經請到人，否則唔知要再見到曾生份CV幾多次！