「痴線！有咩理由搭HK Express呀？爭幾多啫？國泰都係貴千零蚊啫，起碼有電視睇，可以揀套戲打發時間。」同事Cathy買緊機票，人哋都冇咨詢意見，出名多嘴嘅Lilian就好激動咁講咗以上嘅說話，Cathy冇佢咁好氣，求其hea覆一句：「我搭飛機慣咗瞓覺。」
Lilian語不驚人誓不休：「你知唔知咩人先會搭HK Express？全部都係啲Cheap精，呢班人就係為咗平，我搭過一次都怕怕，最驚蝕底嘅人聚埋一齊，land嗰下個個慌死執輸，起身鬥快塞Q住晒，仲有呀，遲一步上機都畀佢哋霸晒頭頂啲行李位，班友特別cheap㗎！」
有個資深男同事忍唔住還擊：「我搭HK Express㗎喎！咁我都係cheap精呀？唔知你上次遇到啲咩人啦，我搭就好正常嘅！仲有，去旅行有時要睇埋時間睇埋機場，例如去日本，HK Express好多羽田機，我自己覺得方便，起飛時間隨時好過國泰，揀邊間airline每個人都有自由，唔使下下講到咁絕，人人都要跟你嗰套咩！」
Lilian嘅性格係唔會認輸：「HK Express真係唔知有咩好，個閘口永遠要駁車去到遠一遠，揀其他airline就唔同，過完關慢慢行duty free都仲得，唔使趕頭趕命，我真係唔明你哋點諗！」
唔明人哋點諗好正常，因為每人都係唔同嘅個體，正如嗰位資深男同事話齋，有人考慮機場，有人考慮起飛時間，有人唔care冇電視，有人就覺得登機閘口近唔近好重要，呢啲全部係自己嘅喜好同選擇，就算想慳錢又有錯咩？揀張平機票，慳返嘅用嚟食同shopping，咁又有咩問題呢？點解要將自己嘅價值觀夾硬套落別人身上？
「HK Express言論」固然觸怒唔少同事啦，因為office大把人會搭HK Express，不過Lilian呢種主觀批判已經唔係第一次，平時仲有好多過火同挑釁性嘅說話，所以公司3分2人都唔妥佢。
Lilian嚟咗呢間公司都係一年左右，初初嗰陣已經開口夾著脷，仲激過HK Express，事緣同一層有另一間公司，裡面有個鬼佬，我哋幾個女同事搭電梯見到都話個鬼佬靚仔，不過呢啲唔係重點，靚唔靚仔好主觀，重點係Lilian聽到之後發表嘅「權威演講」。
Lilian：「你哋唔係啱鬼佬呀？清道伕嚟㗎喎！」
因為當時Lilian做咗冇耐，大家仲未知佢咁乞人憎同埋口賤，有人唔明就問佢點解係清道伕？
Lilian：「專食垃圾囉！」
係咪仲未明呢，繼續聽埋落去。
Lilian：「我有啲女仔friend豬西咁嘅樣，30歲人都未拍過拖未破處，最後咪就係識鬼佬囉！啲鬼不嬲都濫㗎啦，你唔見好多都娶賓妹咩？鬼佬係食得唔好嘥，easy come easy go，佢哋睇亞洲女性個個都一樣樣，好又一餐唔好又一餐，特別係香港嗰班，可能人在異鄉求其搵啲慰藉，豬西都照食，香港冇人要啲女照掃，咁仲唔係清道伕？」
當時好多同事已經心知不妙，果然不出所料……
隔籬team有個女同事爆seed：「你講夠未呀？我老公都係外國人，咁點吖？」
全場氣氛死寂，Lilian亦即刻收嗲，但個女同事怒火未消：「尊重下人，尊重下你自己啦！話人鬼佬食垃圾，叫工人姐姐做賓妹……」
其實個女同事未講完，不過Lilian當時即刻離開座位去洗手間，擺明係避風頭。
事隔成年，隔籬team個女同事直至而家都未釋懷，憎到Lilian不得了，佢兩個喺office就算撞口撞面都唔會打招呼。
我哋當然知道有同事個老公係外國人啦，但當時想叫Lilian收聲都叫唔切。經此一役，Lilian個格都係冇收斂，耐唔耐就有呢啲火爆得嚟好主觀嘅言論，口不擇言嘅時候句句充滿挑釁性。
間唔中咪會睇到新聞話有人喺街起爭執，然後其中一方call馬或者埋伏，幾個刀手衝出嚟斬完人逃之夭夭嘅，我成日凝住Lilian有一日會係被斬嗰個，唔係黑心，真係有呢個跡象，爭在係街外人定係同事斬佢㗎啫！