做做下嘢聽到office另一邊好嘈，原來有個男同事踢影印機，呢位同事叫Ivan，我同佢平時都有打下招呼或者傾兩句，正常辦公室相處，稱唔上好熟！不過Ivan呢日好似食咗火藥咁，踢完影印機又喺個位掟計數機掟mouse，砰砰嘭嘭，我部門都有人問咩事，但冇人知。
唔八卦繼續做嘢，因為我都有張麻煩order要打去同個客傾，周身唔得閒，喺call客嘅期間，我持續聽到pantry有巨響，大力閂櫃門又有，嘭嘭聲疑似踢水機側邊啲屈臣氏蒸餾水膠桶又有，我諗office裡面所有死物都畀佢用嚟發洩過，其實不斷聽到呢啲聲有啲困擾。
人不犯我，我不犯人，本來我係咁諗，點知呢個男同事突然走埋嚟，掟疊file畀我隔籬位個女仔，好大聲講咗句：「我唔跟，你自己跟返！」
佢兩個工作上有咩問題唔關我事，但佢掟file嘅時候誤中副車，整跌咗我枱面隻杯，搞到啲咖啡倒瀉晒，連我條褲都中招。
我本能反應向住佢講：「喂，睇住吖！」
呢個叫Ivan嘅男同事完全冇覺得唔好意思，更加對住我發火：「睇咩呀！」
得你有火呀？我將佢疊file拎返起，兜嘢就車落去，車中佢手臂再散落喺地下，然後向住佢講：「而家老奉受你氣呀！」
Ivan忽然由霸氣mode變成眼濕濕慘情mode，咩都冇講就轉身離開。
呢個時候，嗰位男同事嘅阿姐行埋嚟話我：「你使唔使咁呀？Ivan老豆入咗ICU呀！」未幾，Ivan同部門幾個同事亦相繼行埋嚟，佢哋一齊指責我點解唔體諒下，因為人哋屋企有事所以先會心情唔好。
我：「我係佢肚裡面條蟲呀？點知佢老豆入咗ICU心情唔好呀？」
事情再演變落去就係有幾個同事行咗去安慰Ivan，其他人睇我嘅眼神就係覺得我好冷血，好冇同情心，隔籬位個女仔：「咁大件事？唔怪得佢心情咁差啦！」
我唔知office裡面有幾多人認同我嗰句「而家老奉受你氣呀！」可能認同都唔敢表態，但我見到好多人行去Ivan度慰問，仲要離遠望住我口噏噏唔知講緊乜。
呢個並非冷唔冷血嘅問題，而係我都唔知佢老豆入咗ICU！
一單還一單，你屋企人入ICU，我100％真心希望佢吉人天相，早日康復可以健健康康出院，大家無仇無怨，仲要係同事，唔通我會想你老豆有事咩？但你對住全公司嘅人發脾氣，我哋冇義務承受㗎！
唔敢代表其他人講嘢，或者你都會覺得同事老豆入ICU，我仲要成疊file車落人哋度係好冇品，大前提係我唔知吖嘛！如果我一早知，Ivan掟file落嚟整跌我個杯，整到我成枱成褲咖啡，我會轉一個比較溫和嘅語氣叫佢「睇住」，未必會車返疊file出去，但咁都唔代表我錯。
大家都係成年人，講真邊個冇自己嘅煩惱，係！你老豆入ICU嘅嚴重性凌駕我有張麻煩order，咁你咪請假去處理私務囉！心情唔好咪唔好影響自己工作囉！同事老奉受氣㗎咩？難聽啲講句，家人係你嘅家人，點可以要求每個人都有切膚之痛呢？倒返轉嚟講，如果我身邊嘅人有事，我都唔會砰砰嘭嘭掟嘢令同事覺得唔自在。
最癲係Ivan個阿姐叫我走去say句sorry，話要體諒下Ivan心情唔好……
我直接同呢個阿姐講，不如你同Ivan say咗sorry先啦！你下屬屋企人入咗ICU，你仲容許佢返工？唔使扣錢都應該畀Ivan留喺屋企抖下或者去醫院啦！
然後個阿姐話Ivan死都要返，放工先去醫院喎！哦！咁所以就全部同事，包括我，都要為Ivan心情唔好而埋單？要一齊受氣？
呢單嘢最難啟齒嘅地方係，我講完出嚟個個都覺得我好冷血，根本就唔係呢個問題，佢掟嘢嘅時候我有冇講過半句？因為Ivan發脾氣波及到我，咁我先會還擊啫！想睇下投稿之後係咪好多人都覺得我唔啱。（完）