大約兩三個月前，我接到一位headhunt嘅電話，佢係直接打去公司總機，再由receptionist駁入嚟。呢位headhunt自稱喺LinkedIn見到我，而佢手上又有一份工好適合，所以嘗試聯繫，睇下我有冇興趣跳槽？
你知而家幾多電騙啦！初初我連聽嘅興趣都冇，重複話唔需要，但對方堅持講份新工嘅內容同福利，job duties的確同我做緊呢個position好似，大假就多咗5日，人工仲多咗20%，非常吸引，不過我嘅答案仍然係：「唔使喇唔該！」
隔咗一日老闆嗌我入房，遞咗個有公司logo嘅信封畀我，真係嚇咗一跳。
老闆笑笑口：「放心，唔係炒你，升職呀！仲唔快啲接住封信！」
我：「吓！多謝老闆！」有啲突如其來。
老闆：「唔使多謝，有人撬你過檔，人工多20%你都唔走，我好appreciate你對公司嘅忠誠，而家我加返畀你！嚟緊畀心機做呀！」
唔係喎，愈聽愈唔對路……
我：「你點知嘅？嗰個人（headhunt）仲有撬其他同事？」
老闆：「head乜鬼嘢hunt吖！試下你啫！嗰個人真係做獵頭㗎！不過係我個friend介紹，佢話你不為所動，Good！叻女！」
坦白講我即時嘅反應係驚訝，仲未識得嬲，因為用咗少少時間消化，好難相信一個老闆會用咁嘅手段去測試員工忠誠度，但佢講得出我同嗰位headhunt嘅對話詳情，所以成件事真係佢一手一腳安排，有冇咁嘅需要呀？
經歷完呢單嘢我已經決定要辭職，隔咗一個月就遞信。
我對headhunt向來冇好感，好多年前試過經獵頭公司介紹見工，個感覺好似畀人用完即棄，完全冇跟進冇交代，正正因為呢個原因，搵工我寧願經求職網，唔希望將份resume交畀獵頭公司，所以我拒絕headhunt同忠誠度係無關。
戴返個頭盔，唔係個個headhunt都信唔過，只係我唔好彩遇到啲好差，純粹個人立場，唔想一竹竿打一船人，今次呢件事最嘔心嗰個其實係我老闆，好在已經變成舊老闆。