打風究竟係放假，定係留喺屋企工作呢？呢個問題可能會畀人話我「港豬」同「奴隸獸」，但係當你遇到一個不負責任嘅同事，咁就會明白對其他人有咩影響，今日就有個同事中午12點都未起身，我同其他人要做埋佢嗰份。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
我承認有啲工作喺打風嘅日子係咩都做唔到，形同放假一樣，例如戶外工作人士，或者係一啲做part time或者freelance嘅人，某程度上亦都係手停口停，而其實你做full time的話，份糧就照出，呢一日係計錢㗎！
又或者好似我個妹教幼稚園，打風一定停課，8號一樣唔使返學校，佢嘅工種就容許留喺屋企休息，始終冇得上堂冇得對住小朋友吖嘛，咁佢決定用啲時間嚟做教案抑或休息就係個人選擇啦，因為係冇嗰種急切性同即時性。
不過對於文職人士嚟講，打風我就真係唔enjoy，今日叫好啲，一早講明個波會去到4點之後先落，但過往天文台好唔肯定，又或者預告中午前會落波嗰陣，嘩！返工就辛鳩苦喇！搭鐵搭巴士一片混亂，同埋風球除下唔等於冇雨，坦白講我寧願照舊返9點冇咁受罪。
仲有，當天文台都唔確定幾時除下，乜都話「考慮」「可能」「唔排除」嘅時候，你一樣係要咁早起身，仲要keep住留意風暴消息，而你就算肯早出門都未必work㗎，出面都冇車！
好喇，呢次「泰利」襲港，天文台好好咁講定4點後先會改發3號，我就有個同事兜頭大覺瞓，WhatsApp電話全無反應，問題係啲客冇停過咁追嘢，公司其他嘢又係照舊要一路update同回覆，咁點呀？咪我同其他人做埋佢嗰份囉！
「嘩！打風特別好瞓，咁又12點幾，刷個牙先，你哋上面咁多msg嘅？一陣沖杯啡慢慢聽。」呢位同事12點幾先覆返個voice msg返嚟，把聲仲係懶洋洋，呢個朝早我哋已經改咗兩轉嘢畀個客，send咗N個email出去喇！
我自己都係打工，唔係老細，我都想舒服㗎！頭先我同另一個同事因為唔知頭唔知路，仲畀佢個客詐型，你又唔可以同個街外人講「呢單嘢唔係我跟開」㗎嘛，調返轉我哋平時做客，就算係去餐廳食嘢，落完單好耐都未上菜，咪一樣搵到邊個侍應就問邊個，唔通我要知邊個廚師負責煮先可以追咩？個客睇你係同一間公司，佢冇義務知道後面個架構同埋點分工㗎！
呢個同事沖完啡返嚟仲要留個咁嘅voice msg：「港豬嚟㗎喎你哋，個客急咪由得佢等囉，打風呀今日！」
咁你明我點解要搵個地方發洩，又點解會一開始就提到「港豬」同「奴隸獸」呢啲字眼啦！
打風唔係解唔使做，只係可以唔使返公司，留喺屋企做，同埋做唔做係個人決定，責任感呢樣嘢人人有唔同尺度，問題係佢影響到其他人。
職場永遠係懲罰肯做嘅人，佢可以選擇唔做，但點解仲可以寸我哋呢班肯做嘅人？
我哋公司其實算唔錯㗎喇，今日先有另一個女同事喺公司大group呱呱嘈，佢話自己一早攞咗今日假，點知8號風球蝕咗，係咁問可唔可以取消放假，cancel佢張假紙……
HR喺個group度話請示一下老細，啱啱覆咗ok，呢一日唔當佢請假，當然呢個女同事唔屬於我條team，唔知佢取消假期之餘有冇做嘢，但係公司咁都肯銷假，算唔話得啦！總之打風都係煩啦！（完）
講起打風，住得遠唔知算好事定壞事，突然諗起舊文一則，唔知你仲記唔記得。
同事住得遠享特權 唔使OT唔使覆Msg
https://hkofficedaily.com/?p=20095