你哋有冇遇過一啲長期揸流攤，做嘢超hea，又勁冇責任心嘅同事呀？咁如果呢個人係你上司呢？其實我由day 1……呀唔係，應該係見工嘅時候已經知道呢條友好唔掂，因為佢約咗我interview，但自己就遲到，當時我喺office足足等咗45分鐘先有得in。
嚴禁轉載聲明：文章版權為《辦公室日報》所擁有，由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的內容放在其他網站圖利。
見工呆等45分鐘嗰次，HR其實已經兩度入房同我講唔好意思，最後佢似乎決定放棄：「Sorry呀，因為負責in你個部門經理出咗去做嘢，可能趕唔切返嚟，好對唔住，睇嚟都要轉日子，你有冇邊日方便？」
話口未完，嗰位部門經理就開門入嚟，佢係一個年約40嘅女人，一開口就話：「唔好意思，塞車呀今朝，嘩，屯門勁塞，8點幾出門口返工，而家先返到。」
HR話你出去做嘢，你就話塞車而家先返工，邊句真呀？不過好明顯係HR幫佢兜，我都住屯門，嗰朝遲過佢出門口，點解我會到先？
本身對呢份工冇咩好感，但係interview嘅過程太流暢喇……sorry我美化咗，應該係話interview嘅過程太求其，我等咗佢45分鐘，而佢只係用咗5分鐘就決定請我。
「Esther，你之前做過呢行……都ok……應該一教就明，有冇湊商場客經驗？」佢一路睇我份resume一路講。
我：「有呀，我之前跟緊3個商場客，就係resume裡面提到嗰3個，呢方面都累積咗幾年經驗，由頭到尾都係一手一腳自己搞，我哋冇另外搵agency。」
「咁得啦！Esther你下星期一返工得唔得？人工就照你填嘅expected salary啦！」吓！in完㗎喇？咁就請咗喇？
我就係咁嘅情況下入咗嚟呢間公司，然後第一日返工，呢位阿姐又遲到，全office嘅人都返9點，當然亦有部分同事係9點半或者遲少少，不過我阿姐就零零汀汀返11點，遲兩個鐘呀！係咪好大支野？
佢返到嚟完全冇覺得唔好意思，仲會借頭借路講埋啲無謂嘢，試圖轉移大家嘅注意力，例如會話：「樓下係咪有咩樓盤展銷會？好多地產經紀喺度拉客，阻住我返公司！」
一定係地產經紀由9點鐘拉住你，一直拉到11點啦！
有次阿姐遲到又話：「屋企個地板滲水，實係樓下個冷氣向住天花板吹，你哋有冇試過呀？」頂！冇人想知呀，遲到成日扮晒嘢！
除咗遲到，阿姐仲要唔做嘢，佢將所有嘢都分派畀我哋班下屬做，而佢自己就會臨尾睇兩眼，好似執個尾彩咁，基本上公司冇呢位阿姐存在係完全冇影響，又或者正確啲講，如果冇呢位阿姐，可能大家嘅工作會更加暢順。
冇嘢做自然冇鑊孭，亦都冇任何責任上身，全公司得佢一個食lunch會食兩粒鐘，又真係好意思㗎喎！已經朝朝最遲返，仲要食晏超晒時……
仲未講放工，我阿姐永遠係全office第一個走，有時係未夠6點，大約5點57, 58分已經急不及待閃，佩服佩服！
同事私下當然知道阿姐勁hea啦！呢度又係嗰種你唔辭職就永遠唔會炒人嘅公司，其實我覺得呢種公司幾奇妙，孕育咗我阿姐呢啲人之外，亦會培養咗一啲肯行多一步，做埋人哋嗰份嘅同事，冇錯呀！我係寸緊我自己！冇辦法，啲工作阿姐唔願跟，壓到落嚟我哋都係要有人跟，喺職場有責任感的確會幾蝕底。
後來我開始改變自己嘅心態同諗法，如果公司同老細都唔介意，我呢個小職員又有乜好介意呢，阿姐份糧又唔係我畀，而且所有嘢都有兩面，例如早排打風，朝早11點幾變返3號風球，其他幾個department嘅阿頭即刻叫下屬趕返公司，反而我阿姐話：「你哋唔好返公司呀，留喺屋企啦，出面3號啫，不過仲好大雨，唔使旨意我出去同人迫車，work from home得啦！」
Work咩from home吖！當日冇人再聯絡到阿姐，佢連WhatsApp msg都唔覆唔睇，名正言順係「消失風雨中」。
作為一個打工仔，原來喺呢啲時候有個咁嘅上司又幾輕鬆㗎喎！起碼佢唔會chur，又冇要求，畢竟佢份人都係得過且過，你做少少嘢畀佢已經係好勤力嘅表現。
我阿姐更加唔會監視同埋管束你點做嘢，因為佢懶到出汁，總之你唔好煩到佢，到時到候有嘢交就得喇，你唔搞佢，佢唔搞你，各自各精彩，返工等放工，放工就斷晒聯繫。
當然，呢個阿姐唔算係有料上司，跟住佢應該學唔到嘢，但每個人對工作都有唔同嘅價值觀同態度，或者人生某啲階段你會想做嘢舒服啲，我就係正正處於呢個狀態，所以後來先識得欣賞佢。如果公司忽然換人，搵個好積極好嚴厲嘅主管返嚟，咁我可能會好唔慣，試想像下，我而家就算遲到一個鐘，即係10點鐘先返工，我阿姐都肯定唔知，因為佢都未返到，咁你話爽唔爽喇？(完）