公司每個同事都知道Lucas每朝10點幾11點先返工，lunch食兩個半鐘，有時仲會失驚無神曠工，個個走嚟叫我唔好嬲，但實際上冇人撐我，因為大家都知道呢個人係老細嘅侄仔，所以唔敢得罪。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
我見到營業部嘅同事成日搵Lucas吹水，有幾次仲一齊出去食晏，我甚至見到有隔籬啲department嘅女同事請Lucas食糖，雖然一粒糖唔係咩貴重嘢，但已經反映咗有唔少人基於Lucas嘅身份而主動討好佢。
另外有個又係阿姐級嘅女人仲行埋嚟我部門，用一種媽媽嘅口吻去關心Lucas：「阿仔，做得慣唔慣呀？嘩你好瘦喎！真係要食多啲嘢，有時我會煲湯返公司請同事飲㗎，下次預埋你吖，畀心機做呀知唔知？慢慢學啦！」
雖然大家都係女人，又雖然我冇賓周，不過我都想同聲稱會煲湯畀Lucas飲嗰位阿姐講句：「我DLLM呀！」
唔係咁老土要大家聯手幫我剷除條廢青，更加知道各部門針唔桔到肉唔知痛，但係你哋點會做得出向呢個人示好㗎？有眼見㗎喎！深入嗰啲工作內容唔講喇，淨係講返衣著，點解老細個侄仔就有特權著人字拖返工呀？大家喺度做嘢唔會覺得雙重標準同埋唔公平㗎咩？
我條team嗰幾個同事就正常啲，始終影響到工作，令到佢哋workload大增，但礙於係老細親戚嘅身份所以敢怒不敢言，咁起碼唔會搏friend同獻殷勤先吖！
考慮到老細拍心口保證下個月就將Lucas調去Admin，我不斷叫自己沉住氣，唔止唔理呢個人，更加連眼尾都唔想望佢一眼，我驚會心情唔好又同佢嘈呀！
其實講起都覺得好可笑，下屬有咁大問題都唔可以出聲，要吞聲忍氣扮睇唔到，試問我呢個department嘅底線同尊嚴喺邊度？
「唔好意思，可唔可以麻煩你叫Lucas讓返間meeting room出嚟？我嗌咗佢㗎喇，不過佢唔聽，仲揮手示意我出返去，有個客喺度等緊呀，一陣要同Sales開會，我真係叫佢唔郁……」Receptionist走埋嚟搵我幫手「驅趕」Lucas離開會議室，你feel唔feel到「老細侄仔」呢個title，令其他人有幾多顧忌呀？當然，皇親國戚都唔係最重要，最重要係條友踩晒界，簡直係橫行霸道。
我：「得，佢係我部門嘅人，我又做開衰人，唔爭在，不過佢一向唔聽我講，我盡人事。」
Receptionist：「你一陣入到去唔好咁躁喎！」
我：「躁咩啫？我冇晒火啦！而家隻眼開隻眼閉等佢調組㗎咋！」
Receptionist：「唔係呀……Lucas喺meeting room食煙……」
我：「食煙？喺會議室食煙？」我大聲到幾乎全office嘅人望晒過嚟，今次我唔係故意引大家注意，而係我真心震驚，已經冇人管住呢條廢青，佢鍾意全日落街食煙又得，曠工直接走又得，咁都仲要去會議室食煙？玩嘢呀？
Receptionist：「就係因為佢食煙，個Sales先要喺接待處同個客傾計拖延住，等我叫走咗Lucas再噴啲空氣清新劑先敢叫客入房。」
我已經嬲到唔想再聽，直接就衝過去會議室想殺咗條廢青，一打開門見到Lucas原來一路食煙一路講電話，我都未開聲，佢竟然仲反客為主喝我：「出返去啦！已經好煩㗎喇！我同條女傾緊……」
我：「傾你條命呀垃圾，躝！即刻同我躝出去！Office食得煙㗎？你呢啲咁嘅垃圾都有女？你條女盲㗎？」
我諗呢個Lucas自出娘胎都未畀人兜口兜面鬧過做垃圾，再加上我呢段時間對佢採取放棄同寬鬆嘅態度，所以Lucas畀我怒喝之後係呆咗，定下神來佢先識得向我還拖。
Lucas：「我同條女講緊電話，你落我面呀？」
我：「你有面係因為你屋企有錢，你個垃圾試下出去搵嘢做吖，我寫包單唔係靠關係肯定冇人請你！你繼續食吖，我即刻影你相再報控煙辦！」
呢個Lucas終於都肯同條女收線，只見佢對住電話講：「轉頭打返畀你！」跟住就開始兇我。
Lucas：「你知唔知我係邊個？你咁樣同我講嘢？」
我：「我知你係邊個，老細個侄仔吖嘛！頭先咪話咗你囉，唔係靠關係你食屎啦！呢間公司連茶水阿姐都有價值過你，知唔知醜呀？」
Lucas：「得！你寸吖嘛！我叫人炒咗你都仲得！」
我：「而家係我炒你，你之後可唔可以返嚟呢間公司做我就唔知，但我個部門就一定唔會要你，躝啦！」
因為我哋真係嘈到拆天，原來後面已經有成班同事圍觀，連個客都行埋嚟睇湊熱鬧，Lucas可能覺得好瘀，成塊面紅晒，就咁丟咗個煙頭喺地下就離開，我喝住佢執返個煙頭，不過佢冇理我，直接就走出公司大門。
其他同事見到此情此境只係擘大個口得個窿，唯有上次話煲湯嗰個阿姐級主管行埋嚟我身邊講咗句：「你真係炒咗佢呀？」
喂，係呀！我真係炒咗佢，我炒咗老細個侄仔！咁點呀？預咗我之後會畀老細炒，然後佢再請返個侄仔啦，又如何？我就唔信我出去搵唔到工！
其實當日我已經等緊老細打長途或者WhatsApp我，嗰條廢柴實會告狀㗎啦！點知連續兩日都冇任何消息，應該係咁啱撞正之後兩日係星期六日啦！去到星期一，我9:30見到老細返嚟，都唔想再無了期咁等宣判喇，直接去搵老細講清楚。
我：「我炒咗你侄仔，你應該知道㗎啦！本身想辭職，諗諗下不如你炒埋我，咁你賠錢好過我要做多一個月。」
老細：「知，我咩都知，點捨得炒你呀？多謝你都嚟唔切啦！啱呀！炒得好！」
我：「竟然？你唔好講反話喎！我而家炒咗你侄仔，差少少都等唔到佢調去Admin，你有咩唔滿意可以直接講，口講唔炒我，但係當我眼中釘就唔好喇，大家都係成年人，搞清楚好啲！」
老細：「間公司係我嘅，我靠呢間公司起家同賺錢嘅，咁你認為我想保住個侄仔，定係想留低一個幫到我嘅人吖？」
我：「咁你如果覺得個侄仔係搞亂檔，一早就唔好叫佢入嚟做啦！」
老細：「一睇都知唔係我主動叫佢入嚟做啦，我屋企人叫我畀機會佢學嘢咋！連我老豆老母都叫過我好多次，我推咗幾鑊你唔知啫，所以避到冇得避，噚晚Lucas食飯同晒全屋人抱怨你針對佢，唔想再喺我度返工，話唔想見到你，咁就啱晒喇，我唔使做醜人，仲氹咗佢幾句叫佢再返嚟做，我梗係知自己個侄仔咩料啦！睇住佢大，睇住佢壞，放心，佢唔會再踏入呢間公司半步。」
我：「如果我冇理解錯，即係你做好人，我做衰人？」
老細：「你冇理解錯呀！我唔可以出聲話侄仔唔掂，亦再推唔到屋企人想侄仔去我公司學嘢嘅要求，有啲嘢由我把口講出嚟會死人㗎！不過我又唔係一心等你同佢反面嘅，最初諗住你哋夾到就最好啦，咁而家你都炒咗佢喇，咪一天都光晒囉！我履行咗我嘅責任喇，我下屬炒個侄仔咋，唔關我事呀，發生呢件事嘅時候我仲要出咗trip，想做和事佬都做唔到，一陣請晒你條team飲茶，買咗份手信畀你呀！」
老細，你唔好再狗啲！難為我星期六日連出街都冇心情，留喺屋企執CV同埋上求職網搵工呀！
我用咗一個朝頭早嘅時間平伏心情，認清自己係老細嘅一隻棋，轉個頭又有人走嚟刺激我，呢個人就係Admin個阿head……
「多謝你呀！我都知嗰個Lucas好難搞，以為Admin要加佢入嚟，好在你炒咗佢咋，而家我可以正正式式喺出面請人喇！」
冇嘢想講喇，睇到office班友（除咗我部門啲人）之前咁驚老細侄仔，最終又走嚟多謝我炒咗老細侄仔，你哋全部落地獄啦！（完）……不過法官大人，我反對！茶水姐姐又好，清潔姐姐又好，其實都可以好猛料㗎！佢隨時係老細個阿媽，又會幫你鬧衰同事出返啖氣，下面兩個舊故事已經有跡可尋。
清潔阿姐做唔停 「嗰個係老闆阿媽嚟㗎！」
https://hkofficedaily.com/?p=21457
清潔阿姐窒到同事跳掣：你係公司最唔靚嗰個
https://hkofficedaily.com/?p=22963