「今日朝早嗰個求職者ok呀，你幫我打去問佢最快可以幾時返工吖，人工照畀佢填嗰個expected salary，咁其他細節就麻煩你搞喇！Thank you!」正當我同HR交代緊請人決定嘅時候，老細突然喺身後殺出，仲喝住我哋：「等陣先！」
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
老細：「你個部門有vacancy呀呵？啱喇，我有個人介紹入嚟做，你頭先講嗰個求職者hold住先！」
我：「吓！介紹個咩人呀？我今朝見啱咗喎！」
老細：「見啱咗都冇用呀，呢個係我侄仔，我老豆老母落晒order，一定要畀個位佢入嚟做㗎！你當我獨裁一次啦！交代唔到呀！」
坦白講，我老細平時又真係好易話為，好少會咁獨裁，今次嗌晒救命一定要請個侄仔，相信屋企真係畀咗好大壓力佢。
我：「咁樣對朝早個求職者唔公平喎！會唔會有折衷方法呀？擺喺第二組得唔得？」
老細：「我諗過晒㗎喇，會計嗰邊有位，但佢唔係讀會計真係搞唔掂，營業部嗰度係ok呀，但係我侄仔唔肯做Sales，其他department滿晒喇，針都插唔入，我又冇理由叫侄仔另外坐開啫，而家係得你嗰組㗎咋，好在我行快兩步截住你，都未打畀個求職者，即係整定啦！幫幫手，我侄仔小朋友嚟啫，又係大學生，你叫佢做下文件嘢冇問題嘅！」
都講到咁，仲有得揀咩！究竟呢個世界有幾多人係因為內定同黑箱作業而喪失應得嘅機會呢？
最乞人憎係我明明等人用，老細個侄仔偏偏要兩個星期後先返工，據聞係知道份工有著落之後即刻買機票去旅行，話要玩完再休息幾日先投入工作喎！咁你不如下年先返啦，畀我正正經經請咗個人先吖嘛！呀侄仔下年仲有心情先返工囉！
等呀等，終於兩個星期過去，侄仔有心情返工喇！
老細：「喂，各位同事，呢個靚仔叫Lucas，佢第一日返工，一陣我請大家飲茶當welcome，咁你哋好好合作喇！」
呢條Lucas成個款頭都係死臭飛咁，公司一至四要著恤衫西褲，老細冇同個侄仔講㗎咩？同埋你作為新人都唔該識做啦！有冇可能著T恤牛仔褲呀？唔係仲要開口提呀？提埋你要呼吸好唔好？
打完個招呼，我叫個同事教佢入機，點知未到lunch time個同事就向我投訴。
「阿姐，個Lucas好唔掂喎！係咪老細啲親戚定係朋友啲仔女？要親自陪佢行埋嚟介紹咁大陣仗？」
我：「係喎，都唔記得同你哋講聲，老細個侄仔嚟㗎！佢點樣唔掂呀？」
「侄仔咁大鑊呀？咁冇嘢喇！」
我：「講啦！你估我好想請佢咩！」
「嗱，你叫我講㗎咋，咪串柒柒咁囉！頭先一路教佢嘢，佢就一路玩電話，叫佢自己試一次又錯哂！」
唔止無心工作，呢個Lucas第一日飲茶已經展現咗自私嘅一面。
Lucas：「喂，我唔食蝦，唔好叫有蝦嘅嘢，咁我飛晒啲蝦餃燒賣先！」
老細：「哦，係呀，佢有皮膚敏感，一食魚蝦蟹就起㗎喇！」
呢個世界得你一個人咩！你唔食蝦啫，其他同事都唔可以order蝦餃燒賣呀？
我：「佢唔食咪唔好夾囉，啲點心又唔係撈埋一齊，一籠籠㗎嘛！」其他同事就話唔敢出聲啫，我做阿姐都要受你條死臭飛擺佈呀？
食嘢可以忍，因為除咗welcome lunch之外，其他日子我同班下屬都有固定飯腳，Lucas都日日話約咗friend所以唔同我哋食，但係公事方面就真係好難忍，就以食lunch為例，呢條友返工第二日開始已經出去食兩個半鐘。
我都冇乜點派嘢畀佢做，淨係入機入資料，咁都可以每日平均入得三至四份，你係用老細侄仔身份入嚟做啫，都唔該係咁易做下樣吖！卒之唔夠兩個星期我就忍無可忍，第一次兜口兜面爆呢條廢青，不過唔係因為工作，係因為衣著。
我：「Lucas呀！今日星期一喎！你著沙灘鞋人字拖返工呀？」
Lucas：「有咩問題呀？我又唔使出去見客，有影響咩？」呢條友完全唔覺得有問題，而且態度仲好囂張同埋目中無人。
我：「你唔使出去見客啫，咁有客上嚟㗎嘛，一陣就有個銀行客，你係咪保證有客嘅時候屎忽痴住張凳唔郁，唔會行嚟行去畀啲客見到呀？」
Lucas：「咁我咪請假囉，而家走得未？走咗就唔會畀客見到啦！」
我故意講得大聲啲，就係想其他department嘅人都擰晒過嚟，睇下你究竟有幾過份！
我：「咩原因走呀？曠工呀？定係辭職呀？」
Lucas：「辭咩職啫？我而家頭暈，做唔到嘢，要返屋企休息下，唔係病都唔畀呀？」
冇等到我回應，Lucas已經起身離開公司，其他人紛紛行埋嚟安撫我：
「算啦！佢係老細啲親戚，無謂嘈啦！」
「唔使咁嬲喎，咪將佢投閒置散囉！」
「丟佢喺度齋坐囉，份糧又唔係你出，睇開啲！唔使動真火！」
你哋梗係唔嬲啦！呢條廢青唔係你哋條team，我仲要放棄一個認為唔錯嘅求職者，然後將個職位畀咗呢個不知所謂嘅人。
老細遲早都會知我同佢侄仔開拖，與其坐喺度等，我不如先下手為強，入房搵老細建議炒咗個Lucas，冇眼屎乾淨盲！
我：「喂，好認真，你係咪一定要擺個侄仔喺我度先？我頂唔順，我要炒咗佢，你唔鍾意都係咁話！」
老細：「真係唔炒得呀！其實Lucas同我講過你唔鍾意佢㗎喇，話你成日對住佢黑口黑面，小朋友嚟啫，唔使同佢計較喎！一係咁，我知道Admin嗰邊有個妹妹仔resign咗，一個月後就離職㗎喇，你忍多一個月，之後我調佢去Admin，咁樣得唔得？」
我：「你而家調佢過去啦，使鬼等一個月咩！你照畀一個月人工個妹妹仔咪得囉！反正你出畀侄仔份糧都係白出㗎啦！佢完全幫唔到手，又冇禮貌，又懶散，你見唔見佢今日著咩返工？沙灘鞋人字拖呀！」
老細：「我同Admin傾過啦，妹妹仔啲嘢要交接呀，唔係話走就走，錢解決到嘅問題我就解決咗啦，而家調佢去Admin都冇位坐，其實呢件事喺我屋企搞到好大㗎喇，Lucas係咁話個阿姐唔妥佢，你忍多一個月啦！同埋我下星期出trip吖嘛，多一事不如少一事，一人讓一步好唔好？我出完trip返嚟，Lucas都差唔多可以調去Admin嗰邊㗎喇！」
我：「Ok！一個月，一日都唔可以多，你唔調走佢就我自己走！」（未完待續）
《辦公室日報》都有Threads喇，嗰邊嘅主題係「鳩噏要在放工後」，輕鬆啲乜都講一餐，仲可能會有日本同事上鏡🫢快啲follow一齊鳩噏246啦！
https://www.threads.net/@officedailyhk
延伸閱讀：同事被炒後聲稱失憶再返工
https://hkofficedaily.com/?p=15598