有個舊同事叫Kimberly，佢都走咗兩年鬆啲㗎喇，突然打畀我哋話要結婚，本身以為佢係想派帖㗎啫，因為婚期係兩個月後，點知Kimberly最終目的竟然係搵返我哋成個部門嘅女仔做姊妹，原因係：「時間太趕喇，我真係冇人幫呀！」
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
我哋當然有質疑好地地一個女仔結婚，點會搵唔到姊妹呀？不過Kimberly嘅解釋又似乎講得通。
Kimberly：「因為我有咗BB，本身想唔擺酒，但我老公屋企人唔肯，話未見肚點都要做得好好睇睇，我哋臨急臨忙搞酒席，好辛苦先搵到個場地夾埋吉日咋，同埋近呢一年好多朋友移晒民，直頭人都唔喺香港，遠水不能救近火，我真係搵唔到朋友做姊妹喇，一場舊同事，幫幫忙吖，你哋幾個仲要係識嘅，到時一齊做都唔會咁悶吖嘛！」
即係咁，我哋同Kimberly唔稱得上係好熟，但又稱唔上完全唔熟，始終當年日日返工見面，偶爾佢喺工作上會發下脾氣，不過一般都係對客先會咁，再加上Kimberly苦苦哀求，大家都係女人，結婚搵唔到姊妹又真係好慘嘅，所以本身雖然唔想做，但傾完之後衰心軟，結果我哋4個女仔就應承咗Kimberly。
我亦都唔賣咩關子喇，直接可以話你知，呢個係我哋4個女仔最錯嘅決定，真係諗唔到人生中有另一件事比起呢次捱義氣做姊妹更後悔。
做過兄弟姊妹嘅人應該都知道，擺酒之前例牌要約出嚟食飯傾下rundown，同埋試下伴娘同姊妹裙，呢度都有啲谷氣嘢，但我唔刻意詳述喇，始終相比之下係好小事，加上當時我哋4個女仔都覺得，Kimberly嗰種急躁、大安旨意、做決定一言堂，起因係婚禮真係太趕，算啦，體諒嘅！
其實我哋4個女仔當中，有一個叫Grace嘅未到婚禮當日已經後悔，好想搵個藉口唔做姊妹，但其餘3個人包括我在內，就力勸Grace留低一齊做，對唔住呀Grace，我借呢段投稿向你公開道歉，其實你係啱，係我哋太過婦人之仁。
無傷大雅啲細節我就唔特別提喇，直接跳去婚禮食晏嗰部分先。
除咗Grace留喺酒店幫Kimberly唔出去食飯之外，我哋其餘3位姊妹，仲有Kimberly老公同班兄弟，加上新郎新娘嘅爸爸媽媽，一行十幾人就去附近商場一間酒樓飲茶食lunch，食完返到酒店再準備時，Kimberly問佢老公拎張單睇完就話太貴……
Kimberly：「有冇搞錯呀？食得咁貴，你哋夾返錢呀！」
我哋幾個姊妹，包括冇份出去飲茶嘅Grace都嚇親，首先澄清一件事先，間酒樓好普通，亦唔覺特別嗌得多嘢食，肯定冇叫咩灌湯餃先，基本嘅蝦餃燒賣都係一枱一籠（我哋喺酒樓係分咗兩枱），我真係唔覺得會好貴，咁就算貴，你都冇理由叫姊妹夾返錢，我哋係嚟幫你做嘢，仲有，我哋4個姊妹全部有畀人情，係一早去到已經畀咗Kimberly，四位數，唔係幾百蚊，唔係攝報紙。
你叫我哋幾個姊妹夾返晏晝餐茶錢？
Grace反而係第一個去拎銀包夾錢，佢係因為谷住道氣而畀。
Kimberly：「Grace你唔使夾，你都冇出去飲茶！」
Grace：「我唔會畀佢哋3個自己夾㗎喎，要夾就一齊夾，你都講到咁喇，費事欠你！」
期間Kimberly老公係有開過聲話唔使夾，又話我哋姊妹冇理由要夾，但係我哋幾個女仔已經嬲嬲地喇，你咁嘅說話都講得出口咁肉酸，夾畀你囉！Kimberly真係夠膽唔出聲照收！而其實Kimberly老公係冇問佢班兄弟夾返錢。
其實飲完茶再喺度夾茶錢之後，時間都嚟到接近3點，佢哋6點就有個註冊儀式先，我哋已經有啲想走㗎喇，不過諗住最惡頂嘅嘢都應該過咗，淨返半日唔爭在啦，點知沒有最過份，只有更過份，就係喺6點註冊儀式舉行期間，Kimberly喺佢一個長輩口中得知，有啲親戚放飛機臨時唔嚟，咩原因佢冇同返我哋講，只係知道有一家親戚total 7個人唔會到。
然後點呢，Kimberly走去同個場嘅負責人講要cut一枱，佢同人點傾就唔知喇，因為大家自從飲茶夾錢事件之後都好嬲，唔想再參與任何嘢。
最過份係Kimberly cut咗一枱之後，我哋班姊妹冇位坐！
其實冇得坐要打游擊齋企之餘，你cut咗張枱，亦即係少咗一圍枱嘅餸，我哋係直頭連一條菜都冇得食呀！
Kimberly終於留意到我哋幾個口黑面黑，於是叫咗我哋呢班姊妹入新娘房，你以為佢say sorry呀？實在太天真喇，佢係要訓話呀：「喂！畀啲笑容吖，我結婚呀！頭先連我阿媽都問你哋做咩好愁好唔開心咁！」
今次我快過Grace爆發，直接就同Kimberly講：「姊妹冇得食，位都冇得坐，齋企都搵唔到位，咁你想點吖？你知唔知咩叫尊重呀？」
Kimberly：「如果覺得冇啖好食，我拆返你哋今朝畀嘅人情，即刻畀返你哋囉！總之我唔理，一陣送客唔該笑得開心啲！」
呢啲咩人嚟㗎！最初求我哋班舊同事幫手，你而家仲用喝罵同命令嘅語氣咁樣講嘢？
最終全部姊妹唔忍，去洗手間換衫拉大隊集體走人，當時啲賓客仲食緊嘢。
我真係好後悔，好後悔應承一個咁嘅人做姊妹，亦好後悔冇一早走，我哋4個女仔完全出於好心，聽到你又話大肚又話趕急情況冇人幫咋！而家諗返佢搵唔到人做姊妹可能唔關朋友移民事，甚至佢親戚一家七口臨時甩底都係有原因。
總之成世人未試過咁委屈！(完）
如果你睇完以上嘅投稿覺得好嬲，建議睇埋下面呢段，心情會好返好多。
同事突然搞埋一齊失驚無神結婚生仔
https://hkofficedaily.com/?p=18089