「嘩！搞咩呀？Jessica冇事吖嘛？」去完廁所行返入office，我見到同事Jessica踎喺兩個部門中間條路嚎啕大哭，有人企喺側邊手足無措，部分同事雖然留喺個位冇郁，不過都伸長晒條頸觀察發生咩事，其實Jessica嘅反常表現喺當時已經持續咗3至4日。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
仲記得第一日見到Jessica情緒激動嘅時候，佢係喺自己個位掃咗個文件架落地下，因為佢坐路口位，啲紙散到一地都係，雖然有同事問佢做乜，但就冇太在意事態會愈嚟愈嚴重，純粹覺得普通公事上嘅忟憎，呢樣人人都會，只係佢掃文件架就激動咗啲啫！
然後第二日就多咗人注意喇，因為Jessica喺影印機前面咆哮，係好大聲嗰隻，當時office好多人問咩事，我第一個反應諗佢係咪見到小強，仲同另外一位女同事走埋去問佢做乜，不過Jessica冇答我哋，淨係雙手抱頭，好似做錯咗啲咩大鑊嘢咁，問多兩句都唔答，咁都冇辦法。
第三日Jessica就無啦啦喺lunch time之後伏喺張枱喊，雖然計矚目程度就唔夠頭一兩次咁多人注意，但因為Jessica又係問極都唔應，只係伏低不斷飲泣，個身震晒咁，呢次就令到我哋個Manager覺得好凝重，等到Jessica冇事之後就嗌佢入房傾計。
嗰次Manager同Jessica傾咩係冇人知，只係聽到Jessica喺房好大聲講嘢，好似嘈交咁，但又聽唔到Manager把聲，淨係聽到Jessica嗌到拆晒聲，結果驚動到HR同埋另一位女同事敲門入房睇下發生咩事。
因為佢兩個由6點傾到過咗7點都未出返嚟，我哋夠鐘收工，想關心又好，想八卦又好，第日返公司再問啦，跟住嗰日就輪到我去完廁所見到Jessica踎喺路中間爆喊喇，連續幾日情緒咁不穩，令人好擔心喎！
由於早幾日老細唔喺公司，應該唔知道有個小職員行為咁失常，但今次唔同，Jessica踎喺度爆喊嗰陣，老細都有見到，仲特登叫其他女同事扶起Jessica，老細話咁樣唔好睇，有咩事起返身先講，又嗌人陪Jessica去洗個面。
後來老細煞有介事咁叫咗HR入房，再過一陣仲嗌埋Manager入去，我哋已經feel到有唔好嘅事發生㗎喇！
Manager喺老細房出返嚟，連隨又叫Jessica入meeting room，氣氛好緊張，今次佢兩個只係傾咗15分鐘，跟住Jessica就執嘢喇走喇。
睇住Jessica執私人物品，作為同事當然關心佢啦！
Jessica：「公司話要解僱我，一陣走喇，遲啲先約你哋出嚟食飯啦！」
相對於一連幾日嘅情緒失控，收到大信封嘅Jessica表現反而好平靜。
我：「但係你冇事吖嘛？係咪屋企有事啫？見你狀態好差喎！」
唔止我，其他同事都好關心Jessica，不過Jessica只係搖搖頭，又唔激動，又唔投訴，亦冇正面回應大家嘅問題，可能有口難言啦，我哋都唔想迫佢，唯有之後再約食飯傾。
本身好嬲老細即日解僱員工咁無情，但Jessica被炒之後一日，Manager主動同我哋講解返件事，原來Jessica話自己工作壓力好大，以致近日身體同埋情緒方面都陷入咗谷底，成個人好抑鬱，所以不由自主咁喺office大叫大喊。
Manager有提議Jessica放假抖抖，但Jessica唔止拒絕，聽到被叫放假之後仲大吵大鬧，即係第三日臨放工嗰次，然後HR咪入埋房睇咩事嘅，當時Jessica好大聲話自己唔會放假，除非公司炒佢，否則會一直返工，亦唔保證可以控制到情緒。
所以第四日Jessica踎喺路中間爆喊之前，其實老細已經從HR口中收到風，知道Jessica連續幾日行為失常，再親眼目睹佢點樣失控，老細就同HR同埋Manager商量，既然Jessica唔肯放假，又影響到其他同事，不如痛定思痛解僱咗佢先，錢賠足，之後先搵人跟進下，將來有需要先叫Jessica返嚟做。
Manager話自己同Jessica交代老細意思嘅時候，都有擔心再觸動對方情緒，點知Jessica欣然接受呢個賠錢叫佢即走嘅安排，可能係擺脫到工作壓力啦，成個人輕鬆晒啩！
為咗留返啲空間畀Jessica靜養，我哋幾個同事相隔兩星期先約佢補食farewell飯，估唔到Jessica已經返緊新工，睇嚟一切都變返好喇喎！
食飯當晚，同事紛紛表達對Jessica嘅關心，問佢之前發生咩事？點解唔抖一陣先再搵嘢做？而Jessica並無異樣，仲要好開心咁同我哋講：「都冇事，其實我迫公司炒我㗎咋！」
我：「下，點解要迫公司炒你？Manager平時對你幾好㗎喎！」
Jessica：「我知，不過早排有人hunt我去見另一份工，人工多咗接近20%，福利又好啲，大假都多咗3日，唯一唔好就係佢哋唔肯等我一個月，話個position好等人用，又唔肯幫我賠錢早走，咁我咪迫公司炒我囉！」
包括我在內，當晚食飯嘅幾位同事聽完之後都無語。
我：「即係你冇任何唔開心？其實你想早走啫，照講咪得囉，你又講到新公司咁好，幫你賠一個月人工都唔肯？」
Jessica：「呢個問題我都問過，新公司話係policy問題，唔會咁樣幫一個求職者賠錢，我計過晒數喇，如果我主動resign，Manager一定留，就算畀我走，都一定要做埋最後嗰個月，我仲有個project跟緊㗎嘛，你唔記得咩！但係要我賠錢早走，我又唔捨得，總之我冇唔開心，嚇親大家唔好意思，不過你哋知好喇，唔好同其他人講呀！」
另一個同事聽完Jessica咁講就詐型：「你講嗰個project就係pass咗畀我喎……」
Jessica：「Sorry囉，非常時期用非常手段，我其實搏早走搏炒㗎咋，冇諗過老細仲會賠一個月畀我，加埋我份新工即刻可以返，呢個月等於出雙糧，得啦，呢餐我請！」
其實我覺得好誇張，想早走咪傾囉，再唔係就大大方方賠一個月，何必要扮到情緒失控去迫公司炒你呢？大家當你係同事，亦當你係朋友，呢段時間都好擔心，而家呢個真相同埋結局真係好難接受。
食完餐飯之後，我問其餘幾位同事：「咁點呀？Manager知我哋今晚約咗Jessica，千叮萬囑叫我哋要安慰佢，聽日返工實會問詳情，呢單嘢講唔講好？」
班同事就話都有少少嬲，亦覺得Jessica太浮誇，而且如果真係扮情緒失控，仲恐怖過真係情緒失控，但由於唔想節外生枝，所以都係唔會同Manager講出真相，反正人都走咗，無謂搞咁多事喎！
兩個字，失望！想唔使一個月通知早走啫，唔使咁樣喎！（完）
【日本職場】從華強北到東京打工 遭拖糧再被老闆粗口問候｜冇得轉工 唔忍就要返中國：「3年內只有一個月準時出糧，全年3日大假」