「就係你條八婆呀？因住生仔冇屎忽呀！教人離婚咁陰毒，你變態㗎？你係咪冇男人呀？想個個陪你孤獨終老呀？」3年前我收到呢個電話，最初唔知咩事，但好快就有一把熟悉嘅女人聲喺後面大叫：「你唔好發癲啦！收線呀！」
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
把女人聲係我同事Vicky無誤，然後我好快就意識到咩事，成單嘢要追溯到再耐啲，大約4年前，Vicky成日喺office哭訴畀老公家暴，佢聲稱拳打腳踢同掌摑乜都齊，表面傷痕我哋睇唔到，因為Vicky話老公會兜鎚揼佢背脊，咁唔通叫佢「嗱」高件衫畀我哋check咩！
不過有一朝，Vicky話自己畀老公摑咗一巴，咁就真係明顯見到佢塊面紅咗，隱約有手掌印，而且係一邊面，好覺眼嘅。
先唔好講同唔同事，作為一個正常人，梗係叫人報警或者搵社工啦！
提議過Vicky搬開下，咁打法點知有冇生命危險，但係佢始終冇聽，然後每兩三個禮拜就話畀老公打，如果真係打得咁頻密，作為女人仲點解要留戀呢？你又冇仔女，咁梗係離婚啦！Vicky都係30歲鬆啲，幾時打到老呀？到時命都冇啦！
唔止我，其他同事都會定期關心下Vicky仲有冇畀老公家暴，呢種情況斷斷續續出現咗一年，不過都唔使計次數啦！打過一次都係打，何況淨係計我聽到，Vicky起碼畀老公打過十幾次，唔係椿背脊就係掌摑，有時就話畀老公一腳踢落小腿，都幾誇張。
有次Vicky直頭請咗5日假，理由又係畀老公打，當時我哋幾個同事都有商量好唔好幫佢報警，結果得出嘅結論係等Vicky返嚟，一齊捉佢去差館，點知Vicky死都唔肯，又唔報警又唔搵社工又唔離婚，咁即係點呀？
跟住冇幾耐我就收到電話，即係話我因住生仔冇屎忽，小心孤獨終老嗰次，呢個只係第一次，之後仲有數之不盡嘅騷擾來電，最氣頂係Vicky話佢同老公已經好返，冇再受到家暴，喂！咁你叫你老公唔好再打嚟騷擾我吖，有時仲會連環爆粗口，認得你把聲啦，唔係諗住打133就冇事呀？
我同Vicky投訴過好多次，佢竟然仲話：「都冇來電，未必係我老公嘅，會唔會你得罪咗其他人呀？」
我：「但係我上次明明聽到你喺後面叫佢收線喎！」
Vicky：「嗰次係佢打嚟，不過當時我同佢鬧緊交，嘈到火紅火綠，之後你收到嗰啲冇來電號碼未必係佢啦！」
我：「唔好玩啦！我認得你老公把聲，一係你叫佢去鴨寮街買個變聲器。」
其實仲有另一個同事都收到騷擾電話，只係唔知點解我就頻密好多，如無意外，Vicky應該成日同佢老公「提起我」。
我同另一位被騷擾嘅同事曾經一齊去差館，指名道姓話知道係Vicky個老公打嚟，但係當時咩都做唔到，只可以備案，我真係覺得好無奈。
後來Vicky亦冇再講佢畀老公家暴，無論係同事又好，朋友又好，我哋都叫盡咗責任，其他嘢真係要你自己去踏出呢步，幫你報警冇問題，但將來我冇可能幫你出庭同埋落口供，你要企出嚟先得，否則我都唔知點幫。
問題係，我幫你，你唔領情，都唔好畀個老公咁樣騷擾我吖！
最好笑係Vicky大半年前已經冇做，離開咗我哋公司，但佢老公仲係間唔中打嚟㗎！所以Vicky話佢當時畀老公打，我絕對相信，呢個男人嘅精神同情緒都好有問題，隔住個電話都聽到佢失控，你話真人點會冇郁手郁腳吖！
老人家成日話「寧教人打仔，莫教人分妻。」咁但係你知個老婆長期受到家暴，唔通仲叫佢忍咩，但而家我都有啲認同呢句說話，你畀勇氣人哋，畀意見人哋，而對方唔接受，選擇啞忍，咁我哋可以做到嘅嘢其實好有限，Vicky呢單嘢搞到我將來遇到相同嘅事都唔敢再獻計，可能講嘢都要講得好保守。
受到騷擾咁耐，點解而家先投稿宣洩？咁係因為我早排又收到佢老公來電，都話打133冇用，認到把聲，而且佢鬧嘅內容亦係指責我勸離婚。
我忍唔住打畀Vicky，一來關心下佢有冇事，睇個勢老公應該仲有打佢啦！二來都好想同佢講：「3年喇！你老公仲兇緊我！你都走咗大半年，叫佢唔好再打嚟啦！」
而Vicky都係重複住呢句～～～未必係佢嘅…… （完）
老細搵個女做臥底 同事一早知穿崩位｜兩父女勁似樣 Chok料咁著跡 好難唔知你有古怪
https://youtu.be/7MzCnEQ0hlc