試問邊個想屋企人失業吖，不過家姐辭咗份工之後，我真係走咗去買香檳慶祝，雖然一向唔妥佢，但我唔係黑心想家姐死，而係呢條女唔識剪片走去見一份要剪片嘅工，日日走嚟請槍要我幫手，你咁樣呃得幾耐呀？又唔肯學，穿煲係遲早嘅事啦！
係咪好奇怪點解間公司要求人剪片，但係家姐唔識都會請佢呀？呢個問題我已經一早問過，佢個job title係類似editor，當中有好多requirement，其中一項係要識剪片，咁我家姐就以為人哋只係list晒啲job duties出嚟，真實中唔使點剪，所以就膽粗粗send CV過去。
Send CV唔緊要，咁點解會請佢呢？因為當時係幾個月前，好多公司仲Work from Home，連interview都用視像，然後就要求拎一兩條片做reference，冇任何即場嘅test，亦冇問得好深入，然後我家姐就send咗我兩條片過去，話係佢自己嘅作品。
跟住麻煩事就嚟喇，間公司請咗佢之後仲係行緊Work from Home，不過已經有好多剪片嘅工作，家姐係咁叫我幫佢整，一次半次就話啫，佢兩日剪一條喎，我自己都有工要返㗎，辭職幫你好唔好？
嗰陣我同佢講：「自己學啦，趁可以Work from Home未穿煲，最多教你喇。」
家姐：「剪片我識啦，平時有用玩美Video。」
我：「咩係玩美Video？」
家姐：「App嚟㗎！總之我識啦，不過佢有啲要求係玩美Video做唔到之嘛！」
我：「唔係喎，你應該要學Final Cut Pro同Premiere呢類吖嘛！係咪諗住永遠叫我幫手剪呀？我冇咁多時間呀！」
結果畀我家姐話冇義氣，然後佢搵咗隻兵剪，但你三日唔埋兩日剪條片，公司又多多要求，剪完改十幾次，乜兵都走佬啦，聽我家姐講，隻兵後來都冇再理佢，因為剪得咁頻密真係搞唔掂，人哋都有正職㗎，然後我家姐又走去嗰啲freelance網，搵街外人幫手剪。
我：「搵人剪幾錢呀？」
家姐：「我搵到個剪10分鐘都係收$1,000，有咩辦法啫，你又唔幫我。」
我：「唔幫你就梗㗎啦！你份糧好似得兩萬幾，一個星期剪兩至三條片，一個月最少都冇咗$8,000，不如你搵過另一份工啦！」
真心唔知佢諗乜，家姐份人不嬲係咁，有次我帶女朋友返屋企食飯，飯枱上面竟然有「砵仔糕」，喂！咁私人嘅嘢唔該你收好啦，冇波又要扮有波，呢種裝「胸」作勢嘅性格貫徹始終，連搵份工都要裝胸作勢，識就識，唔識就唔識，扮乜鬼啫！醜婦終須見家翁呀！
早排佢公司Work from Home完畢，全部人要返office，終於都現形喇，聽佢講，公司有人發覺佢唔識剪片，因為有啲嘢要佢即刻剪但剪唔到，係都要返屋企先做喎，講Final Cut Pro同Premiere又唔明人哋講乜，遲早出事啦！
公司仲要畀咗部單反相機佢，我家姐識鬼用咩，用唔掂就搵手機影嚟交差，仲話張敬軒早排都係用手機拍咗套電影，你咪玩啦！最後咪又死死地氣同公司講用唔慣部單反嘅牌子，一個大話冚一個大話。
可能公司裡面嘅質疑聲音愈嚟愈多，始終而家要返office即場做嘢，實在冇得呃，家姐最終都跪低，早兩日還返部單反畀公司再順便辭職，晨早要咁做啦，你想呃公司呃到幾時？一個人返工要咁多唔關事嘅人幫你做嘢，過到初一都過唔到十五。
我絕對唔係黑心，從另一個角度睇，好多人識剪片都未必搵到工，你唔識就唔好霸住個位，有能者居之，其他識剪片嘅人先應該賺呢份糧，讓路啦！總有人比你更勝任同埋更需要呢份工作，不如搵份你做得嚟，又唔使日日講大話嘅工咪仲好。
不過我都服咗嗰間公司，明明要人識剪片，結果請咗個連Final Cut Pro同Premiere係乜都未知嘅人返去，剪片用玩美Video，執相用美圖秀秀，請人有冇請得咁求其呀？所以呢間公司唔執笠都真係偷笑。