我有妥瑞症，仍然記得自己第一份工係點樣見成，仲有點解會辭職，當時舅父同我媽咪講：「你都要畀個仔出嚟做嘢㗎！去我公司咪得囉！請邊個我話事，邊個夠膽出聲呀？」舅父想我去佢公司做，出發點係好，但我其實好大壓力。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
我無法想像要朝九晚六喺office接觸咁多人，由細到大都控制唔到自己嘅身體抽搐情況，特別係頭部同肩部，當然仲會發出一啲聲音，別人眼中就係怪聲，稍為慶幸嘅係，有啲妥瑞症患者會不停講粗口，而出現喺我身上就比較少。
儘管如此，頭部同膊頭經常大幅度抽搐同失控，已經令我日常生活出現好多不便，活到廿幾歲，我只係入過戲院一次，當時有位朋友鼓勵我同埋陪我，但係開場冇幾耐，我又開始控制唔到自己，不停發出一啲聲音，而且係持續。
我前排坐咗3個女仔，其實佢哋嘅修養真係好好，雖然有擰過嚟望，但並冇表現得不耐煩，反而係戲院比較遠處有觀眾大聲講咗句：「嘈L夠未呀？」
我冇嬲，雖然別人未必識得體諒妥瑞症患者，但我體諒到每個入場嘅人都係畀咁多錢，點解佢哋要受到我嘅聲音騷擾呢？對佢哋嚟講都係好唔公平，所以我睇咗20分鐘左右就選擇離場，仲叫個朋友自己繼續睇，我唔希望掃佢興，所以就交代一句：「你晏啲講返個結局我聽吖，唔使擔心，我ok！好過嘥晒兩張飛。」
無可否認以前我有更多唔愉快經歷，例如當街畀人嗌傻仔，細細個又試過畀唔識嘅人打，同學白眼、老師嫌棄、左鄰右里當我怪物，乜嘢都嘗試過，我會盡量叫自己唔好記住啲不快事，否則日子就會好難過。
嗰陣時喺舅父間公司，我好似人球咁樣畀各部門推嚟推去，冇人願意接收，最終舅父發好大脾氣，其實咁又何必呢？就算佢可以用老闆身份安排職位畀我，其他人同我做嘢都覺得唔舒服，仲記得當時有個女同事同我講：「Sorry呀，你真係好大動作，我覺得一齊食飯有啲失禮，你唔好介意我份人咁直。」
嗰次我已經尾隨佢哋等緊電梯準備落樓食lunch，可能前一日同大家食飯真係太失禮，既然人哋講到出口，我亦好識做，落到樓就自己買外賣返office食。
然後第二日，我就向舅父辭職喇。
有冇嬲嗰個女同事？我唔係聖人，當然有少少，但我更加嬲自己，講真呢種工作環境，的確唔適合我呢啲妥瑞症患者，我知舅父盡咗力幫我融入社會，試過就得，心領神會。
後來我好積極去學coding，希望可以投身IT方面嘅工作，因為我知道呢行有機會匿喺屋企都接到job，雖然收入未必穩定，自己嘅技術亦未去到賺到好多錢嘅層次，但能夠搵到啖飯食，又唔需要出去面對咁多人，對我嚟講已經好滿足。
我嘅job的確唔多，慶幸有個熟客經常搵我，佢知我有妥瑞症，因為有段時間佢不斷叫我出嚟傾個project，推得多都唔好意思，唯有坦白講我係一個妥瑞症患者，唔係唔想見，我係驚嚇親佢，當然我更加驚會冇咗呢個客嘅freelance啦！
結果呢個客不單止冇嫌棄我，大家再合作多半年之後，佢更加正式成為我老闆，我意思係一份full time job嘅老闆，我曾經直接咁同佢講：「你唔使特登請我㗎，而家咁嘅合作模式都幾好吖！」
說穿了，我都係恐懼同埋自卑。
嗰陣時佢係咁樣回應：「唔係特登請你㗎，出月薪比你梗係抵過逐次計啦！同埋你可以work from home，公司而家得一個IT，總之你哋夾到就得喇。」
Work from home係我接受呢個offer嘅最大誘因，最估唔到係呢位老闆畀嘅人工好好，工作量同佢之前搵我接freelance job時多咗少少，但收入就幾乎係double咁滯！
而最感動嘅係，雖然我work from home，但偶爾都會同呢間公司嘅IT同Sales陪客戶開視像meeting，因為有啲部分係由我負責，要我親自講解，最近一次當我陳述個design嘅時候，「老朋友」妥瑞症忽然探我，頭、眼、膊頭，完全唔受控制不斷抽搐，我講唔到落去……
呢個時候，我公司嗰位IT同事接住幫忙講落去，然後Sales嗰位同事就從另一個非coding同埋網頁design層面去講個project，因為我係開咗cam（開始時要喺鏡頭前show一啲嘢），佢哋個個都睇住我抽搐，無法繼續陳述，但每個人都幫我。
最難得係個客，完全冇表現得驚嚇或驚訝，細心聽完，詳細畀意見，後來仲讚我做得好，再吩咐某啲位要點樣執。
其實對於有妥瑞症嘅人嚟講，有時過份嘅關心同憐憫可能會更難受，當我哋好似普通人一樣，就係最最最舒服嘅方式。
雕花嘅文字我唔識打，只係想平平淡淡講句，好多謝我而家嘅老闆，仲有同事，亦希望其他有妥瑞症嘅人會獲得善待。（完）
幫舊同事做姊妹有後續比悲傷更悲傷的事｜新娘：婚禮好後悔搵你哋，不負責任，離間我同老公
https://youtu.be/g1E8u-LH7Dc