好懷念公司冇女仔嘅日子。
公司廿個人，全部麻甩佬，平日講賤嘢、講粗口，講乜都得，間中我會覺得呢度唔係office，似成班friend聚埋吹水，大家夠膽死邊做嘢邊飲啤酒㗎！過去幾年嘅Annual Dinner都喺老細朋友嘅樓上酒吧搞，雖然唔係大魚大肉，甚至可以話係食頹嘢，但真係好開心。
每年Annual Dinner都有個精彩環節，就係有獎問答遊戲，冠軍現金獎hkd 10,000，亞軍5,000，季軍3,000，公司會預備定一堆日本「愛情動作片」嘅劇照，同事睇完張相就鬥快用自己部手提電話上動作片網站，再將番號填喺張紙度交出嚟，最快最準就會晉級，廿個同事連續玩幾round就變8強、4強、季軍戰，冠軍戰，勁刺激！
上年鬥到難分難解，冠軍戰仲出現「突然死亡」環節，兩個同事要鬥快寫出10個動作片女演員，條件係佢哋嘅名必須包括一至十，例如一条、二葉、三宮……如此類推，現場氣氛高漲。
後來公司個男會計轉工，順理成章要請人，但男仔CV偏少，仲要in咗幾個都麻麻，呢個position又十萬火急，結果老細請咗個女仔返嚟，從此office就不一樣喇，粗口仲會聽到嘅，不過少咗好多，賤嘢直頭冇講，個個男同事變晒正人君子，剛剛呢次Annual Dinner仲去咗酒店食，傳統嘅「愛情動作片」遊戲直頭取消，變咗普通抽獎。
而家個office真係家不成家，好懷念冇女同事嘅日子呀！