遇到個咁樣嘅上司都算無憾。倒帶返去2024年5月，當時我辭職，原因係疫情嗰兩年老細要求全部同事減人工，唔減就要bye bye，香港應該唔止我呢間公司係咁。嗰個時期市道咁差，我真係冇把握搵到工，結果大部分同事迫於無奈接受降薪，問題係之後正常返，人工都係冇變返正常。
老細後來宣布加人工喇，咁加幾多呢？$270！你冇聽錯，好零汀係港幣$270！講真你冇變返疫情前個舊價都算，$270簡直係侮辱，唔加都冇咁嬲，當然人人嘅加幅唔同，據理解最多嗰個係$700，亦有人係加$130……好想知老細條數係點計出嚟。
唔止我哋呢啲Small Potato覺得嬲同埋侮辱，其實我上司都好唔忿氣，佢仲激動過我，有幾日上司甚至完全唔做嘢，個電腦mon長期開住求職網，好似wallpaper咁！
我同其他同事有樣學樣，都係嗰陣開始積極搵工，小妹比較衝動，我係辭咗職先算，但可能豁咗出去，所以好好彩有3份被約去interview，只係in完之後遲遲未confirm offer，咁因為我搵緊嘅工都係同一個行業，上司直情主動走嚟問我：「你見啲咩公司呀？講唔講得？」
因為我哋一向打成一片，上司下屬關係好好，佢唔會害我，所以我亦唔介意分享自己去咗邊度見工。
上司：「呢間呀……in你嗰個係咪叫Louisa？」
我：「係呀，你點知㗎？」
上司：「呢行有幾大吖！呢個女人閪閪地㗎喎！我都同佢做過嘢，好Q麻煩㗎佢，極度情緒化，做嘢好怕遇到呢啲人。」
我：「喂！真喎！雖然唔知佢work起上嚟麻唔麻煩，但係interview嗰日堅西口西面，又踩我呢樣嗰樣，嚟見工好似欠咗佢咁！」
成日話行頭窄，估唔到真係窄到講得出人名。
上司：「第二間公司我就唔熟，呢間冇交過手，畀唔到意見你，不過第三間唔錯㗎喎，你見邊個？Thomas？定係Mike Wong？」
我：「唔知邊個Thomas，見我嗰個叫Mike！」
上司：「呀Mike份人幾nice㗎！Thomas仲好，但佢而家可能再高級啲喇，其實三間都冇問題嘅，點都好過呢度啦！」
我：「嘩！你講到好似我有得揀咁，見晒都未有回音，人哋未必要我啦！」
上司：「未有回音？你就快last day喇喎！呀Mike呢間囉！我淨係叫得郁佢，幫你打去。」
以為上司係「得閒飲茶」嗰隻，點知佢講完就即刻拎起電話WhatsApp，我聽住佢錄Voice Msg！
上司：「Hello Mike，喂！好耐冇搵你，想問下早排係咪有個女仔叫Michelle嚟見工？你請咗人未呀？方唔方便打畀你傾？」
咁唐突？以為上司講下咋！咁樣會唔會有反效果㗎？不過隔咗一陣，嗰個阿Mike直接打畀我上司，然後我就喺隔籬聽……
阿Mike講咩我聽唔到，淨係聽到我上司斷斷續續咁講：「Michelle幾好㗎，跟咗我3年，做嘢好有交帶。」
「哦！仲未決定？以為你唔考慮佢添！」
「屌！你都知我做呢度咩料㗎啦！邊留得住人㗎？你有冇位請我吖？我都搵緊喎！」
「信我啦！請Michelle你實唔會後悔，唔使考慮呀！」
佢兩個應該傾咗15至20分鐘左右，一收線過咗冇耐就輪到我手提電話響，係Mike打嚟，佢冇提起我上司，不過就畀咗日期叫我返工！
我而家已經轉咗工半年喇，份糧追返市價，真係要多謝我前上司，佢搵工比我困難，因為Manager嘅位冇我呢啲Small Potato咁多空缺，加上佢屋企有大有細，辭職搵工冇我咁瀟灑，雖然冇得再一齊共事，但希望前上司順順利利，有機會職場再見。
雖然話搵到個好上司，緊要過搵到間好公司，但係當中仲包括好多客觀因素，就好似我舊公司咁，作為員工真係好難做落去，但嗰位好上司我會永遠心存感激。
仲有一樣嘢好難得，前上司打個電話，然後我就有offer，不過佢從來冇掛喺嘴邊，反而係我成日多謝佢。呢個社會好多人做完一件好事就不斷重提，目的就係remind你受過恩惠，而前上司真係冇，呢種方式令到被幫助嘅人都覺得好舒服。