前兩日做做下嘢，忽然有人送花上嚟畀我個女同事Natalie，鍾唔鍾意都好，咁大扎花喺office出現真係非常矚目，仲feel到一定好貴。
我哋成班同事一湧而上走去Natalie個位，隨花附上一張卡，佢亦毫不避忌喺大家面前打開嚟睇，裡面用藍色原子筆寫住 ’ Dear Natalie, No poems and no fancy words. I just wanted to say I LOVE YOU!! ’ 大路嘢，雖然冇下款，不過女仔收到實冧冧豬啦！
其實我哋都見過Natalie男朋友平時接佢放工，靚靚仔仔，斯斯文文，外型已經夠討好，以我認知佢兩個都拍咗拖超過半年，估唔到發展得咁穩定仲肯揼本送咁大扎花，呢條仔算係咁啦！
睇熱鬧嘅同事散開之後，Natalie打畀男朋友講多謝：「做咩嘥埋呢啲錢呀？食咗佢仲好啦，唔係反話，不過送花真係唔實際。」
雖然聽唔到佢男友講咩，但我見到Natalie面色一沉，口窒窒講咗句：「唔係你送？」我坐喺隔籬即刻開咗嚿微熱山丘鳳梨酥一路食一路睇戲，好在頭先沖咗杯熱茶，最緊張關頭唔使行去pantry斟水。
緊接落嚟Natalie同佢男朋友嘅對話都係冇乜內容，因為主要係聽住Natalie發脾氣，佢先埋怨點解扎花唔係男友送（頭先仲叫人唔好嘥錢……），然後就話送花上嚟office好尷尬，唔知點解講講下就好忟憎，我淨係知Natalie男友喺電話另一邊不斷氹佢，加上Natalie喺聲浪上唔太收斂，大家聽住佢無厘頭向男友發咗15分鐘脾氣，最後以呢句作結：「我唔理你呀，今個星期你晚晚都要陪我食飯，一陣嚟接我放工唔好遲到！」
我聽到呆咗，等到Natalie收線就講：「唔好咁嬲啦，都唔關你男朋友事。」
Natalie好平靜咁答我：「都冇嬲，扮㗎咋，因為打過去先知啲花唔係男友送，當時喺電話度佢好尷尬，我又好尷尬，就係唔想個氣氛咁奇怪，所以我先扮到好嬲好困擾，我想佢知道我好緊張佢，更加想佢知道我唔稀罕收到其他人嘅花。」
Natalie再補充：「因為頭先一打去已經知道搞錯，為咗化解呢個尷尬嘅局面，同埋唔想佢亂諗嘢，我仲特登叫佢今晚要嚟接我放工。」
過多一個鐘之後，我哋終於知道扎花係邊個送，原來係公司一個Managing Partner，嗰個男人之前已經約過Natalie幾次，佢平時只會間唔中返嚟公司，但返親嚟都會拎啲朱古力同Cake請Natalie食，一個財大氣粗嘅中坑。
咁扎花又何去何從呢？Natalie丟咗去女廁門口個垃圾筒，我唔知佢呢一著又係有心定無意，由於廁所唔喺office裡面，要行出去外面條長走廊，男女廁仲分別喺走廊兩邊，我覺得Natalie唔想keep扎花，因為擺喺公司太礙眼，同時唔想Managing Partner見到佢掉喺pantry垃圾筒，不過Natalie心思太細密，真係估唔到佢諗咩，特別係擺烏龍以為扎花係男友送嘅時候，竟然用發脾氣呢招化解尷尬局面。
我相信大部分女仔都覺得送花係好嘥錢，所以開心與否，其實重點係邊個送。
投稿讀者：Iman