「火呀！我要火呀！有煙冇火而家點算呀？」嗰次同阿姐出差，佢話自己過關時丟咗個火機，打算落機後隨便搵間便利店買返，點知匆匆忙忙掛住拎行李，趕住上一部公司安排好嘅車，到咗酒店樓下佢已經忍唔住要食支煙先，當時係凌晨，返上酒店房擺低嘢先都得啩！
嚴禁轉載聲明：文章版權為《辦公室日報》所擁有，由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的內容放在其他網站圖利。
嗰架車嘅司機已經走咗，酒店附近眼見嘅範圍都冇便利店，我提議阿姐上房擺好行李先，跟住再落街同佢慢慢搵有火機賣嘅地方。
阿姐：「唔得呀，我搭飛機已經幾個鐘冇食，就死喇，個司機又鬼咁早到，一早叫老細唔使搵人接啦，我哋自己搭的士咪得囉！搞到我冇得喺機場便利店買火機，又揀埋啲冇吸煙房嘅酒店，我就嚟癲喇！」
我：「而家好多酒店都全面禁煙，特別係靚嗰啲，不如……」
阿姐：「火呀！我要火呀！」未等我講完，阿姐又咆哮，有煙冇火，方圓百里又冇火機買，對於煙民嚟講應該係生命中最大嘅折磨。
當時我係第一次同阿姐出差，所以面對佢發晒茅搵火機嘅不安情緒，我一時間唔知點做，最後佢屈服上房擺低行李先，我再陪佢落返去慢慢搵便利店，行咗10分鐘左右終於買到。
由於我同佢兩個人一間房，見到阿姐偷偷地喺酒店浴室食煙，我實在忍唔住問：「你唔驚酒店發現要罰錢？」其實唔食煙嘅人一聞就會聞到。
阿姐：「放心啦，浴室有抽氣，咁多次都冇事。」
果然經驗豐富，但可能凌晨搵火機嘅經歷影響咗佢，阿姐返到香港冇幾耐就轉食電子煙，仲過份到會喺見客時偷偷食。
嗰次我同阿姐坐咗喺阿客公司個會議室，人哋話有個urgent call要處理咗先，講晒唔好意思咁請我哋等一等，阿姐完全唔介意，原來佢心裡面已經有盤算，就係食煙……
佢喺個袋拎咗支電子煙出嚟，撳掣，吸！我當堂嚇咗一跳，呢度係個客嘅公司喎！
我：「會唔會唔係幾好呀？一陣人哋見到，又有味，又有煙霧感應。」
阿姐：「呢啲煙唔足以搞到煙霧感應響㗎，我呢隻冇乜味，好快散，同埋佢用磨砂玻璃，有人行過有影㗎嘛！」
我真係覺得阿姐好癲，而且煙癮好大，比起出差嗰次更過份，始終呢度係人哋公司個meeting room，客嚟㗎！雖然電子煙冇真煙咁大浸味，但其實都聞到，最後真係畀阿姐食完一支電子煙，個客入嚟又冇乜異樣，所以阿姐更加沾沾自喜，仲同我講：「都話啦！唔會聞到㗎！我有時喺自己個位都會chur兩啖，懶得去後樓梯吖嘛！」
話就話冇真煙咁臭，不過點會完全冇味吖，我覺得個客可能都聞到，只係人哋冇諗過竟然有人咁大膽，上去見客會喺個meeting room食煙啫，我阿姐真係前無古人，但係上得山多終遇虎，某次都係出事。
嗰次我同阿姐去泰國出差，住resort，因為我哋公司嘅業務同旅遊有關，阿姐每日都會喺resort個露台望住沙灘食煙，大部分時間食電子煙，間唔中又食返真煙，總之一返到resort就煙仔放題，以為咁樣完咗個trip啦，點知最後一日check out嗰陣，resort嘅櫃台職員指佢食煙，根據規定要罰錢，銀碼大約係七千幾港紙（因為佢計美金）。
阿姐就同個職員嘈，死口唔認有喺間房嘅範圍內食煙，佢好有信心間房唔會有煙味，因為對住露台噴晒出去，呢個時候職員show咗幾條片畀佢睇，原來resort有staff喺沙灘嗰邊影入嚟，每日都影到片係阿姐喺房間露台食煙。
阿姐覺得呢間泰國resort職員好卑鄙，咁樣偷影佢喺露台食煙，我都覺得有少少唔舒服嘅，因為有人好似偷窺偷拍自己咁，我哋仲要兩個女人仔，但係講到尾，人哋都係影露台，唔係影室內，你又犯晒規食煙，人哋入住已經講咗禁煙，房內又有牌係提你唔食得煙，仲有咩好拗吖？
出差係公數，呢筆罰款唔可以擺入去resort張單，阿姐要自己畀罰款就梗係嘈爆啦，先唔肯賠，再嚟講價，不過resort職員企得好硬，而且態度都幾寸（咁你自己衰食煙在先又唔怪得人），結果嘈咗好耐，搞到resort方面話要搵police，總之路就得兩條，一係畀罰款，一係返警局。
我：「畀啦！冇得走㗎喇！」
阿姐：「佢而家拍我都係侵犯私隱喎，報警我唔驚呀！」
我：「距離上機仲有好少時間，張機票係唔退得，唔改得，唔上機就要再買過機票，呢單嘢畀老細知道冇著數。」
結果我阿姐死死地氣賠錢，碌自己卡，我相信呢個係佢食煙以嚟最大嘅教訓，不過經歷完呢次有冇令佢戒煙？答案係冇嘅，而家電子煙喺香港係禁售，佢都係透過啲IG shop去買，服咗佢！
早兩日我哋出去做嘢call Uber，阿姐一上車望到個司機位附近有煙盒，隨便就問對方：「哥哥仔，你都食煙㗎？介唔介意我食吖？我電子煙啫！一齊食都得喎！」
司機可能見我阿姐靚靚女女，所以聽完之後都呆一呆，再好有禮貌咁答：「我揸緊車唔食喇，你食吖，不過要開窗。」
阿姐：「冇問題！」佢隨即撳掣開車窗再撳著自己嘅電子煙。
其實我唔食煙，跟住佢做嘢真係食咗好多二手煙，好在唔係日日要同佢出去見客，出差亦係幾個月一次，否則我驚自己生cancer仲快過佢。（完）
戶口多咗十幾萬 想回水仲要畀人鬧
https://www.youtube.com/watch?v=DUs8WXcPyHY