我做拍片，之前返過蘋果，近年主力做freelance周圍接job，雖然唔算好穩定，但工作尚算自由，起碼唔會餓親，年頭有間雜誌搵我拍嘢，雙方合作咗四五次之後，佢哋對出嚟嘅效果都好滿意，特別係有幾條片都好爆，睇住佢哋FB同IG嘅follower數暴增咗好多。
幾個月前，呢間嘢同我講唔使再拍住喇，亦好坦白咁話搵到另一位拍片收得平過我一半，雖然我當時心諗，自己都係收緊4位數，再平過我一半即係頂爛市，不過唔緊要啦，市場係應該要有選擇嘅，客人轉下唔同嘅合作夥伴亦唔係壞事，佢哋都要比較過先知道乜嘢最啱自己。
但係兩個月前呢間雜誌又搵返我，個負責人話：「都係要搵你幫手，之前條友唔掂呀！拍出嚟啲嘢老細唔鍾意，上次仲要搵咗個星做訪問，拍到衰晒，之後想搵返你。」
我唔知佢話人唔掂係基於咩準則啦，不過你又畀job我，咁我咪接囉！
好喇，再接呢間雜誌嘅job，佢哋係出咗書之後找數，你當係月結啦，但我呢次收到嘅錢，竟然係之前嘅半價，所以我就打去問係咪有咩誤會，對方答我：「之前條友都係收呢個價，standard price應該係呢個數，之後就照呢個價啦！」跟住仲要cut咗我線。
其實我哋係冇簽contract嘅，例如最初幫佢哋做嗰陣，大家係用電話傾好價錢同埋工作細節，跟住就一路合作，期間冇再特別提銀碼，或者用任何白紙黑字說明，直至佢上次話搵咗個平我一半嘅人，雙方嘅合作關係先至暫停，估唔到今次返去幫手，佢竟然喺未得我同意之下，擅自將我嘅收費拉低到同嗰位頂爛市嘅人同grade，或者我都要負部分責任，數還數，路還路，講到錢真係要不厭其煩講清楚先，最起碼應該有啲WhatsApp紀錄留底。
打去再嘈多一次都冇結果，ok，咁之後我唔做喇，然後隔咗一個星期，嗰間雜誌再一次打嚟搵我。
「喂，我老細係都要指定啲嘢交畀你拍喎，佢問你幾時肯返嚟幫手，之前條友真係好唔掂哩，不如大家傾下啦！」
我：「我唔會再幫你哋拍嘢，你同人哋傾好咩價錢，咁係你哋之間嘅事，至於市價係幾多，都唔係你哋閂埋門講完就算，好坦白講我真係好嬲，仲要大家合作過，我付出咁多心機時間同你整片，你未問過就私自減一半，你覺得我仲會幫你哋做？」
「咁好簡單啫，加碼囉！我可以加返價畀你喎，就跟之前個價啦好冇？幫幫手啦！我老細真係好鍾意你拍呀！」
我覺得好好笑，你老細鍾意我拍，話可以加價畀我，但就係跟返之前個價，咁樣叫加碼？我本來就係呢個價啦！畀你監生減一半，而家變返正常，呢啲叫加？
我：「冇時間，係咁！」今次輪到我cut線。
呢間雜誌嘅算盤我睇得出，想將利潤賺到最多，恰啲freelance，試完個平嘅，效果唔好又叫你返去，跟住就焗你收半價，發現都係搞唔掂，就話畀返原價當加咗，老實講冇job接都唔幫你做啦！
以前我做freelance好隨意，個客話幾多，deal好就做，而家我會揸到正black and white寫清楚，自己上網搵份contract嘅樣本，麻煩你係咁易都簽個名或者吸個公司印，再唔得就email，總之有晒record，唔止保障我，同時都保障緊大家。
頭先有另一個客搵我做嘢，又係口頭講，但我堅持要佢簽contract或者覆返個email先confirm接唔接，佢問點解而家要做多一重功夫喎！點解？因為我見過鬼怕黑囉！(完)