啱啱好10年前，2014年嘅6月，當時我遞信辭職，唔夠兩個星期，公司宣布裁員遣散，即係話個個同事都有賠償落袋，得我一個冇，我好嬲咁去質問HR點解唔一早講？係咪有心隱瞞？一場同事提下我都得啩！雖然我知自己遞信在先真係冇得怨，但換轉係你都會忟憎啦！
個HR一樣有份被裁，佢話自己事前完全唔知。其實間公司本身就唔穩陣，偶爾會遲出糧，正正係咁先會激發我resign，點知我個timing完全錯晒，早唔裁遲唔裁，我遞完信先宣布呢個消息，如果我辭職走咗先至遣散，眼不見為乾淨都冇咁唔開心，嗰陣好多同事都笑我黑仔。
明白嘅，每個人都有黑仔嘅時候，所以我最初冇乜上心，後來先發現其他人嘅黑仔只係偶爾，純粹人有三衰六旺，而我嘅黑仔就係一世，係咪十衰一旺呢？可能連一旺都冇。覺得我太悲觀太負面？聽埋你就知㗎喇！
後來唔記得邊份工，我請假去body check，通常身體檢查呢啲都係提早一段時間book，但去到請假當日打8號風球，我個body check要改期，因為診所唔開，但因為一早請咗假，公司照扣一日。
繼續講多單工作嘢，有個客我跟咗超過兩年都冇落單，然後公司嚟咗個新人，上司叫我pass呢個冇potential嘅客畀新同事跟，唔使一個月，個新同事竟然喺呢個客身上開到單，仲要係超級大單。第一個感覺唔係賴自己黑仔，我只係覺得自己好廢，好明顯係新同事比我更加有能力啦！點知又唔係咁簡單。
原來關鍵係個客間公司換咗人，對方新人事新作風換supplier，冇嘅，呢啲嘢時也命也，可能我繼續跟都係開唔到單呢！又唔可以完全抹煞新同事嘅付出，我唔想變成嗰種冇料到仲以為自己懷才不遇嘅人。
出trip去大陸，當年先喺廣州睇完廠再搭火車去一個叫郴州嘅地方，到達後係凌晨時份，本身公司幫我book晒酒店，但唔知點解去到嘅時候，酒店櫃枱職員話冇我個名嘅booking，總之check嚟check去都係冇訂房紀錄，而佢哋當時已經冇房喇！
漏夜都要打長途返香港搵公司同事，同事forward埋email畀我，證實係有訂房，原來係訂酒店個平台有問題，anyway，我要半夜拖住行李喺一個叫郴州嘅地方行，的士都冇架，條街又黑，卒之畀我搵到間類似賓館嘅物體，唔係講笑，格局勁似《國產凌凌漆》裡面嘅麗晶大賓館，個廁所仲要係漏水……
有時睇新聞會見到飛機遇氣流折返，聽就聽得多，你哋有冇人試過？我人生就遇過兩次。好！講開搭交通工具，無論我搭飛機又好、火車又好、甚至係小巴同巴士都好，坐我隔籬嗰個一係肥佬，一係臭狐，一係成身煙味，十次有九次都係咁，唔係偶然，可能我磁場專吸呢啲人。
有一次坐港鐵遇到個智力有問題嘅人士，佢直情瀨咗X（開大），因為係返工繁忙時間，唔好話換位，車廂迫到我起身行開都唔得，我冇怪責嗰位智力有問題嘅人士，我只係覺得自己好黑仔啫，與人無關。當時呢程地鐵仲要係咁廣播「由於前面月台列車尚未開出，本班列車將會稍為延遲」，真㗎！個天從來唔會比我輕輕鬆鬆做人。
住緊間屋遇到樓上丟煙頭，直接跌入我露台，著埋火，好在我未瞓，唔係應該變咗燒豬；帶遮出太陽，冇帶遮落狗屎，梗局嚟㗎喇！
其實仲有好多微小處可以知道我勁黑，細微到不值一提，但又每日重複發生。舉個例，同朋友去餐廳食飯排隊等位，有客出有客入好正常，去到我個名開始就會好耐冇人走，等得特別耐。好喇！有位喇，永遠係啲好細好窄甚至要搭枱嘅位，故事未完，呢個時候我後面又會有其他人嚟排隊，佢哋通常好快遇到有人走，所以就好快入得，而且仲冷手執個熱煎堆坐埋啲闊落卡位。
唔係侍應同我過唔去呀，侍應無辜㗎！真係咁啱輪到我就要等，真係咁啱我之後嘅客人一定有卡位……我唔係一定要坐卡位嗰種西客，但係次次都一樣嘅劇情同佈局，唔使咁黑呀？
講下我最近兩次搭uber嘅經歷，前兩個星期出尖沙咀，我架車喺近海港城嘅馬路中間死火；再上一次同我老婆搭，個uber司機架車係放滿雜物，搞到我要同老婆一前一後坐。有冇投訴？有，不過投訴又點，而家係衰嘢追住我嚟，我知道下次call車一樣會有其他問題。
我已經進化到覺得遇到呢啲嘢係合理，進化到嬲都廢事。
後生嘅時候我成日會怨自己黑仔，嬲到指住個天鬧都試過（我懷疑自己嗰段時間精神有問題），而家人大咗，我真係黑到化晒！有時同老婆、朋友，或者同事分享自己嘅黑仔嘢，佢哋會安慰我：「唔好諗嘢咁負面啦！負面就只會遇到衰嘢，你要正面啲，positive先會有好事發生㗎！」
佢哋好似覺得我未positive過咁樣，呢啲理論我試過啦！無論點樣正念都好，圍繞我而發生嘅只會係衰嘢，一次兩次三次四次係巧合，十幾廿次再日日發生就唔到我唔認黑仔。
就今朝之嘛，同我老細行去的士站，離遠見到好多架的士，應該夠應付排緊隊嘅人，因為我哋係行大直路，邊行邊睇住，當時我不由自主講咗句：「唔會咁啱行到埋去就冇晒車呀？」
老細：「咁多車，點會冇呀？」結果仲有20步左右行到個站，人龍冇晒，而的士仲有一架，我老細又補多句：「嗱！係咪呢！呢架仲要係電動車，坐得仲舒服。」
話口未完，仲有幾步就行到，突然有條麻甩佬喺唔知邊度殺出嚟，一嘢就衝咗上車……
我：「都話啦！你知唔知呢條麻甩佬根本唔存在於呢個世界，佢係閃出嚟攔我㗎咋，一陣佢就會喺架的士裡面消失。」有時唔想自己咁勞氣，我會講啲天方夜譚嘅自嘲說話。
老細冇出聲，但我從佢眼神中睇得出，佢冇辦法唔相信我係一個黑仔，我又同佢講：「你信唔信再下一架的士要等好耐？」
老細：「唔使咁悲觀嘅，你睇出面幾多的士，轉頭就有車駛入嚟啦！」
結果我哋等咗20分鐘都冇車，最終都係要call，呢啲劇本我都好厭倦喇，唔係一次半次，太多次喇！
唔止老細，身邊嘅人由勸我唔好咁悲觀，再見證住我有幾黑仔，黑到佢哋都開始相信，有冇試過去餐廳食嘢得你一個漏單？試過？我平均一個星期一次。
講多樣嘢比你聽吖，上個月我得悉自己有cancer，我唔煙唔酒，醫生話有機會係家族嘅基因……
印象中iPhone出電話會有啲好奇怪嘅顏色形容詞，咩太空灰、星光色、午夜暗，我都有個顏色形容詞畀自己，叫極致黑。