「又請人？你呢個position好似一年一度換人咁嘅？今次想請temp定係長工？」獵頭聽到我話公司要請人之後，忍唔住講咗上述說話，佢根本唔了解實際情況，其實呢個position點止一年一度，直頭係一年換兩次呀！不過我有幾次冇搵獵頭，佢唔知換得咁密咋！
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
你可以話係迷信，不過風水呢家嘢的確好玄妙，我哋公司有個位只要坐親都會大肚，而且仲要次次生仔，仲神奇過人哋去拜嗰啲多仔佛。
一切由我哋公司搬去鰂魚涌講起，第一個坐新office呢個位嘅女同事叫Helen，佢坐到第4個月就宣布有喜，咁一個女人結咗婚，有BB都好正常，所以個個都不以為然，我仲第一次搵獵頭去請temp（臨時工），頂一頂Helen嘅position，等佢安心放產假。
好記得獵頭幫我搵嗰位臨時工叫Abby，因為幾靚女，公司同事對佢印象都好深刻。
後來Helen放完產假返嚟，過多一陣決定辭職，理由係唔放心老爺奶奶湊BB，加上唔想錯過小朋友嘅成長，明白嘅，人各有志，如果經濟情況許可，唔好畀自己咁操勞都係一件好事。
當時我第一個諗起之前嗰位臨時工Abby，做生不如做熟，試下打返去問Abby考唔考慮轉做全職啦！
因為都隔咗一排，咁靚女又幫得手，預咗佢有新工，預咗佢會請我食檸檬㗎喇，但Abby婉拒我嘅原因竟然係：「我好有興趣呀，不過有咗BB，老公唔畀我做嘢，佢想我做全職主婦。」
其實Helen同Abby先後有BB，我哋都覺得冇咩問題嘅，直至再請一個新人返嚟，佢三個月後又宣布有喜，而且同Abby一樣，個老公係緊張大師，想佢即刻quit咗份工好好調理身體，咁似乎就太巧合喇！
但巧合嘅事仲未完，再請過人，呢次係一位41歲嘅女士，佢叫Ivy，當然而家高齡產子係好平常，不過冇諗過Ivy做咗幾個月又話有BB，以下說話係佢自己講：
「我同老公結咗婚8年，啲人話生仔最好喺35歲前吖嘛，我哋係咁努力做人，一直都冇，過咗40已經放棄，點知而家……真係好感恩。」
我都感恩，雖然Abby同Ivy呢兩位同事都比較短暫，但見到識得嘅人咁幸福，做女人都替對方開心。
如是者，我又幫公司搵獵頭，呢次要全職，好快請咗，亦好快走埋，因為新嚟呢個女仔未過試用期就話有咗，佢可能驚我哋唔信，仲拎埋證明文件辭職，傻㗎咩！無論咩理由resign都好，有離心就要放人㗎啦，有BB辭職唔需要畀證明，只係我由此可見佢真係懷孕，究竟呢個position咩事呀？咁旺嘅？全職又係咁，臨時工又係咁。
然後，我哋再搵獵頭請人，嗰陣因為好趕，臨時工都殺住先，最好就長工啦，點知獵頭最終搵咗個未返工已講明有咗嘅女人。
個女人話聽到獵頭講，呢份工係暫時頂住3個月先至嚟做，咁ok啦，畀3個月時間我哋專注請個長工都好吖！
結果公司見嚟見去都唔啱心水，內部搵咗個女仔調部門，個女仔23歲，叫Amy，未結婚，咁樣安全喇啩……
不過安唔安全，仲要問埋安全套同安全期，Amy做咗幾個月之後發現有喜，呢單大件事呀！Amy話佢父母嬲到震，差啲斷絕關係咁滯，唉！其實有咩好嬲吖，23歲都唔細啦！雖然未結婚先有喜，但係咁大個人，女大女世界啦！何況Amy個男朋友仔都肯負責任，佢擺酒都有請公司同事。
咁跟住點？舊同事搬office之後冇耐有BB，請個臨時工又有BB，搵新人有BB，請個41歲都有BB，個temp未嚟已經講明係有BB，內部提升23歲妹妹仔未結婚就有BB，BBBBBBBB，全部都係BB，可以點吖，咪送上祝福，然後再請人囉……然後對上請咗個30歲嘅女仔叫Rachel，呢個做得耐呀，做咗一年半，兩星期辭職，原因係有BB，醫生話佢陀得唔係好穩，所以Rachel決定resign專心養胎……
雖然我係咁用省略號，但都要強調多一次，我係替同事開心，最緊要個個嘅BB都健健康康，我都係女人，明白嘅。
接連幾個都因為生BB而辭職未算橋，最橋係除咗Rachel仲未生，暫時未知仔定女之外，以上全部舊同事都係生仔，Helen, Abby, Ivy, Amy都報晒喜，仲有人送薑醋上嚟，連嗰位一嚟就講明有咗，只會做temp嘅女士都轉咗WhatsApp嘅profile picture，仔嚟嘅，後期我補返啲稅務文件畀佢，大家仲message傾咗幾句。
我老細話，不如將公司呢個位開放，收錢畀人坐一坐求生仔。
唔知下一個新請嘅員工，會唔會好快又報喜呢？（完）
不問學歷 無須經驗 免費睇波 人工8000
https://youtu.be/15mCL4_TaBc