真係好似做戲咁，放工搭電梯落到大堂，我見到女同事P小姐同個男仔傾緊嘢，P小姐望到我之後，一個箭步衝埋嚟撓住我手臂，然後再同個男仔講：「佢就係我新男友。」
嗰條仔戇鳩鳩繼續企喺度，我本能反應縮開自己隻手，唔畀P小姐撓住，連隨講咗句：「你傻㗎！我同你係同事嚟咋！咪搞我啦！」跟住就直接離開。
其實講「咪搞我啦！」係意識到P小姐同嗰條仔應該有啲感情糾紛，我唔想牽涉其中，但你知電光火石間得好少時間，我又冇心理準備一出電梯就畀個女同事撓住，所以表達上未必咁清楚。
唔知P小姐同個男仔後續係點啦！不過第二日返到公司，有個同P小姐好熟嘅同事走嚟話我衰，話我見死不救，仲話我唔識睇當時情況幫手認做P小姐男友……CLS！
同你好熟都話諗下，我同P小姐唔同部門，平時只係工作上接觸，稱唔上係熟，而且佢都係隨機捉住一個人認做男朋友啫，老奉要配合你咩？係咪睇得電視劇多呀？我又唔知嗰條仔乜頭乜路，第日畀人尋仇咪好無辜？
而家P小姐當正我係殺父仇人咁，喺公司會怒睥我，唔知以為我「趙完鬆」，總之大家嘅關係好僵，請問我做錯咩呢？